Home ព័ត៌មានជាតិ វប្បធម៌ ​ការជួសជុល​ខ្...

​ការជួសជុល​ខ្លោងទ្វារ ប្រាសាទ​តា​នៃ ផ្នែក​ខាងកើត នឹង​បញ្ចប់​ចុងឆ្នាំ ២០២០

​ដោយៈ អង្គរតូច / សៀមរាបៈ ការងារ​ជួសជុល​ខ្លោងទ្វារ ខាងកើត​របស់ ប្រាសាទ​តា​នៃ នឹង​បញ្ចប់​នៅ​ចុងឆ្នាំ ២០២០ នេះ​។​

​លោក ស៊ា សុភា​រុន បុរាណ​វិទូ នៃ​នាយកដ្ឋាន​អភិរក្ស​ប្រាសាទ ក្នុង​ឧទ្យាន​អង្គរ និង​បុរាណវិទ្យា​បង្ការ និង​ជា​ប្រធាន​គម្រោង​ជួសជុល បានឱ្យដឹងថាៈ ការជួសជុល​ខ្លោងទ្វារ ខាងកើត ប្រាសាទ​តា​នៃ ដែល​បានចាប់ផ្តើម​ជួសជុល តាំងពី​ឆ្នាំ​២០១៩ មកដល់ពេលនេះ បានសម្រេច ៩០% ហើយៗ គ្រោង​នឹង​បញ្ចប់ ចុងឆ្នាំ​២០២០​។ ការងារ​នេះ គឺ​ក្រោម​កិច្ចសហការ រវាង​អាជ្ញាធរ​ជាតិ​អប្សរា និង​វិទ្យាស្ថាន​ជាតិ ស្រាវជ្រាវ​មរតក​វប្បធម៌ នៃ​ទីក្រុង​តូ​ក្បូ ប្រទេស​ជប៉ុន ដើម្បី​អភិរក្ស លើក​តម្លៃ​ប្រវត្តិ​ស្ថាបត្យកម្ម សំណង់​បុរាណ ឱ្យមាន​ភាព​មាំទាំ គង់វង្ស យូរអង្វែង រួច​ចាក​ផុតពី​ភាព​ខ្ទេចខ្ទាំ ដើម្បី​បន្ត​រក្សាទុក ជា​កេរ​មរតក ដល់​កូនចៅ​ខ្មែរ ជំនាន់​ក្រោយ​។​

​លោក​បាន​បន្តទៀតថាៈ បញ្ហា​ប្រឈម​ខ្លាំង​របស់ ខ្លោងទ្វារ​ខាងកើត ប្រាសាទ​តា​នៃ ដែល​តម្រូវឱ្យមាន ការជួសជុល​គឺ បណ្តាលមកពី​រចនាសម្ព័ន្ធ របស់​ខ្លោងទ្វារ បាន​រំកិល​ចេញ ពី​ទីតាំង​ដើម ថ្ម​ជញ្ជាំង​គ្រប់​ជ្រុង​ប្រេះ ក្រៀក​ចេញពី​គ្នា ដែល​ប្រឈម​នឹង​ការបាក់​រលំ​។ ថ្ម​ដំបូល បាន​ជ្រុះ​ធ្លាក់ ស្ទើរ​ទាំងស្រុង ចំណែក​ថ្ម​ដំបូល ដែល​នៅសល់ ពុំមាន​ស្ថេរភាព ដោយ​ឫស និង​ដើម ឈើ​ចាក់​ចូល បំផ្លាញ​រចនាសម្ព័ន្ធ​ថ្ម រួម​នឹង​គុណភាព​ថ្ម ចុះខ្សោយ​ផង បាន​បំផ្លាញ រចនា​សម្ពន្ធ​គ្រឹះ មិនអាច ទ្រ​លំនឹង​តួ​ប្រាសាទ បាន​រឹងមាំ​ដូច​មុន​។​

​លោក​បាន​បញ្ជាក់ថាៈ អំឡុងពេល​ជួសជុល​នេះ អាជ្ញាធរ​ជាតិ​អប្សរា បានធ្វើ​កំណាយ​ស្រាវជ្រាវ ប្រទះឃើញ​កុល​ភាជន៍ ជាច្រើន​បំណែក និង​ព្រះ​សិរ លោក​កេ​សូ ផងដែរ​។​

​ចំណែក​លោក ព្រំ សុភ​ក្តិ មន្ត្រី​បច្ចេកទេស ជួសជុល​ចម្លាក់ នៃ​អាជ្ញាធរ​ជាតិ​អប្សរា បានឱ្យដឹងថាៈ ចំពោះ បច្ចេកទេស នៃ​ការជួសជុល​លើ​ថ្ម ដែល​ខូចខាត គឺ យើង​ត្រូវ​ប្រើ​បច្ចេកទេស ជួសជុល តាមបែប​សម័យ​ទំនើប ដែល​យើង​បាន​រៀនសូត្រ ពី​អ្នកជំនាញ សមស្រប​តាម លក្ខណៈ​បច្ចេកទេស របស់​គណៈកម្មាធិការ អន្ដរជាតិ អាយ​ស៊ី​ស៊ី​-​អង្គរ​។​

​លោក​បាន​បន្ថែមទៀតថាៈ ចំពោះ​ថ្ម​ដែល​ពុកផុយ​ខ្លាំង យើង​ត្រូវ​យកមក​ពង្រឹង ដោយ​ប្រើប្រាស់​ផលិតផល សម្រាប់​ចាក់​ពង្រឹង​ឡើងវិញ​។ ចំពោះ​ថ្ម​ដែល បាក់បែក​តិចតួច យើង​ត្រូវយក​វា​មក​បិទ​ផ្គុំ សម្អាត​ស្លែ ហើយ​សម្រាប់​ថ្ម ដែល​បាក់បែក ទ្រង់ទ្រាយ​ធំ យើង​ត្រូវដាក់​ស្នូល​ដែក ដែល​អត់​ច្រេះ ដើម្បី​ត​ភ្ជាប់​វា ឡើងវិញ​។ ជា​លទ្ធផល​ក្រុមការងារ​យើង បាន​ជួសជុល​ថ្ម ដែល​បាក់បែក​បាន ចំនួន​ជាង ៣០០ ដុំ ៕/V​

ទីតាំងផ្សាយពាណិជ្ជកម្ម

- Advertisment -



Most Popular