​ឆ្នាំ​២០២០ កំពង់ឆ្នាំង ទទួលបាន​គម្រោង សាច់ប្រាក់​ពលកម្ម ជីក​ប្រឡាយ​ជើង​ក្អែប បាន ១០០ ខ្សែ​


​ដោយៈ ប​.​ខុន / ភ្នំពេញៈ ខេត្តកំពង់ឆ្នាំង នៅ​ឆ្នាំ​២០២០ ទទួលបាន​គម្រោង​សាច់ប្រាក់​ពលកម្ម ជីក​ស្តារ​ប្រឡាយ​ជើង​ក្អែប ចំនួន ១០០ ខ្សែ ស្មើនឹង​ប្រវែង ៦៧.១៨៤ ម៉ែត្រ បន្ទាប់ពី​នៅ ក្នុង​ឆ្នាំ​២០១៩ ទទួលបាន​ចំនួន ៩១ ខ្សែ ស្មើ​ប្រវែង ៤៥.០១១ ម៉ែត្រ ដែល​មកទល់នឹង​ពេលនេះ គម្រោង​ទាំងនោះ អនុវត្តបាន​រួចរាល់​ហើយ​។​

​លោក ដោក ប៊ុន​ថុ​ន ប្រធាន​មន្ទីរ​ធនធានទឹក និង​ឧតុនិយម ខេត្តកំពង់ឆ្នាំង បាន​ប្រាប់​ឱ្យ​រស្មី​កម្ពុជា ដឹង​នៅ​ថ្ងៃទី​១៥ ខែធ្នូ​ថាៈ ឆ្នាំ​២០០​នេះ ខេត្តកំពង់ឆ្នាំង ទទួល បាន​ប្រឡាយ​ជើង​ក្អែប ចំនួន​១០០​ខ្សែ តាមរយៈ​គម្រោង​សាច់ ប្រាក់​ពលកម្ម​ជំហាន​២ ដែល​រាជរដ្ឋាភិបាល បាន​បង្កើតឡើង សម្រាប់​ឆ្នាំ ២០២០-២០២២ ដែល​មកទល់ពេលនេះ ប្រឡាយ​ទាំង ១០០ ខ្សែ បានធ្វើ​រួចហើយ​។​

​ប្រធាន​មន្ទីរ​ខាងលើ បានបញ្ជាក់​ថាៈ ប្រឡាយ​ជើង​ក្អែប ចំនួន ១០០ ខ្សែ ដែលមាន​ប្រវែង​សរុប ៦៧.១៨៤ ម៉ែត្រ ដោយ​ត​ភ្ជាប់​ពី​ប្រព័ន្ធធារាសាស្ត្រ ក្នុងស្រុក​សាមគ្គី​មានជ័យ​, កំពង់លែង​, រលាប្អៀរ​, ទឹកផុស និង​ស្រុក​បរិ​បណ៍ ដោយមាន​អ្នកចូលរួម ចំនួន ៩.៤០៦ នាក់ ស្រោចស្រព​បាន​លើ​ផ្ទៃដី ចំនួន​ប្រមាណ​ជា ៥.៧៤០ ហិកតា និង​មាន​អ្នកទទួលផល ចំនួន ១១.៥៣៨ នាក់​។​

​លោក ដោក ប៊ុន​ថុ​ន បានឱ្យដឹង​ទៀតថាៈ ប្រឡាយ​ជើង​ក្អែប ប្រវែង​ចំនួន ១០០ ខ្សែ​នេះ ជា​គម្រោង​សាច់ប្រាក់​ពលកម្ម ជំហាន​២ សម្រាប់​ឆ្នាំ ២០២០ និង នៅមាន​សម្រាប់ ឆ្នាំ​២០២១-​ឆ្នាំ​២០២២ ទៀត​។ កាល​ក្នុង​ឆ្នាំ​២០១៩ ខេត្តកំពង់ឆ្នាំង ទទួលបាន​គម្រោង​សាច់ប្រាក់​ពលកម្ម ជំហាន​ទី​១ ចំនួន ៩១ ខ្សែ ស្មើនឹង​ប្រវែង ៤៥.០១១ ម៉ែត្រ ។ គម្រោង​សាច់ប្រាក់​ពលកម្ម​នេះ បាន​ជួយ​នាំ​ទឹក ពី​ប្រឡាយ​មេ ប្រឡាយ​រង ទៅដល់​ស្រែ​ឆាប់រហ័ស ។ អ្នកចូលរួម​ជីក​ស្តារ ប្រឡាយ​ជើង​ក្អែប​នេះ មិន​ត្រឹម​តែមាន​ការងារ​ធ្វើ បាន​ប្រាក់ចំណូល​ប្រចាំថ្ងៃ​នោះទេ គឺ​ថែមទាំង​បាន​ទឹក ចូលដល់​ស្រែ​ថែម​ទៀតផង​។​

​គម្រោង​សាច់ប្រាក់ ពលកម្ម​ជំហាន​ទី​២ ដែល​រាជរដ្ឋាភិបាល បង្កើតឡើង សម្រាប់​ឆ្នាំ​២០២០- ២០២២ បានចាប់ផ្តើម​អនុវត្ត​ជាមួយនឹង​ថវិកា សរុប​ចំនួន ៤៥១ ប៊ី​លាន​រៀល ដឹកនាំ​អនុវត្ត ដោយ​ក្រសួង​អភិវឌ្ឍន៍ជនបទ ក្រសួង​ធនធានទឹក និង​ឧតុនិយម និង​អគ្គិសនី​កម្ពុជា មាន​គោលដៅ​ចូលរួម​កាត់បន្ថយ ភាពក្រីក្រ លើកកម្ពស់​ជីវភាព និង​សុខមាលភាព​រស់នៅ របស់​ប្រជាជន​ជនបទ និង​ប្រជាកសិករ​ក្រីក្រ ដែល​ត្រូវធ្វើឡើង តាមរយៈ​ការបង្កើត​ឱកាស​ការងារ រយៈពេល​ខ្លី តាម​កម្មវិធី សាច់ប្រាក់​ពលកម្ម ដែល​នឹង​ជួយ​ដោះស្រាយ ជីវភាព​បន្ទាន់ ក្នុង​រយៈពេល​ខ្លី​ផង ក៏ដូចជា​បង្កើតជា​ទុន សម្រាប់​ការវិនិយោគ​បន្ត លើ​របរ​កសិកម្ម ឬ​មុខរបរ​សម ស្រប​ដទៃទៀត​។​

​គម្រោង​ខាងលើនេះ គាំទ្រ​ហិរញ្ញប្បទាន​ពី​រាជរដ្ឋាភិបាល​កម្ពុជា ក្នុង​គោល បំណង​ចូលរួម​កាត់បន្ថយ​ភាពក្រីក្រ លើកកម្ពស់​ជីវភាព និង​សុខមាលភាព របស់​ប្រជាជន នៅ​តំបន់​ជនបទ និង​ប្រជាកសិករ​ក្រីក្រ ដែល​ត្រូវធ្វើឡើង តាមរយៈ​ការបង្កើត​ឱកាស​ការងារ រយៈពេល​ខ្លី តាម​កម្មវិធី​សាច់ប្រាក់​ពលកម្ម ដែល​នឹង​ជួយ​ដោះស្រាយ ជីវភាព​បន្ទាន់ ក្នុង​រយៈពេល​ខ្លី​ផង និង​បង្កើតជា​ទុន សម្រាប់​ការវិនិយោគ​បន្ត លើ​របរ​កសិកម្ម ឬ​មុខរបរ​សមស្រប ដទៃទៀត​ផងដែរ និង​ការអភិវឌ្ឍ​ហេដ្ឋារចនាសម្ព័ន្ធ ផ្លូវលំ​ជនបទ និង​លូបង្ហូរទឹក ក្នុង​តំបន់​ទីប្រជុំជន​។​

​គម្រោង​សាច់ប្រាក់​ពលកម្ម ជំហាន​២ សម្រាប់​ឆ្នាំ​២០២០-២០២២ ត្រូវបាន​រាជរដ្ឋាភិបាល សម្រេច​ឱ្យ​អនុវត្ត កាលពីដើម​ខែមីនា ឆ្នាំ​២០២០ បន្ទាប់ពី​ការអនុវត្ត គម្រោង​ជំហាន​ទី​១ ដែល​អនុវត្ត ពី​ឆ្នាំ​២០១៧ ដល់ ២០១៩ បាន​ជោគជ័យ នៅលើ​ខេត្ត​គោលដៅ​ចំនួន ១២ ដោយ​ចំណាយ​ទុន​សរុប ២១៥,៤ ប៊ី​លាន​រៀល​រួច​៕/V​

ទីតាំងផ្សាយពាណិជ្ជកម្ម

- Advertisment -



Most Popular