Home ព័ត៌មានអន្តរជាតិ អ៊ីស្រាអែល​ធ្...

អ៊ីស្រាអែល​ធ្វើតេស្តិ៍​ប្រព័ន្ធ​ការពារមី​ស៊ីល សំដៅ​ទប់ទល់​អ៊ីរ៉ង់

​ប្រែ​សម្រួល : កញ្ញា​ដា​លី​ស​/​ហ្ស៊េ​រុយ​សាឡឹម ៖ ក្រសួង​ការពារជាតិ​អ៊ីស្រាអែល​បាន​និយាយ​កាលពី​ថ្ងៃ​អង្គារ​ថា​ខ្លួន​បាន​ធ្វើ​សមយុទ្ធ​បាញ់​គ្រាប់​ពិត​ជា​បន្តបន្ទាប់​ដោយ​ជោគជ័យ​ជាមួយ​នឹង​ប្រព័ន្ធ​ការពារ​មី​ស៊ី​ល​រយៈ​ចម្ងាយ​ឆ្ងាយ​របស់ខ្លួន ដោយ​ផ្តល់​ការការពារ​ប្រឆាំង​នឹង​ការគំរាមកំហែង​នានា​ដែល​បង្កឡើង​ដោយ​អ៊ីរ៉ង់​ដែល​ជា​សត្រូវ​និង​បណ្តា​ក្រុម​តំណាង​របស់​អ៊ីរ៉ង់​នៅតាម​ព្រំដែន​ខាងជើង​និង​ខាងត្បូង​របស់​អ៊ីស្រាអែល​។​

​ក្រុម​មន្ត្រី​ការពារ​ជាតិ​បាន​និយាយថា នេះ​ជា​លើក​ទី​១​ហើយ​ដែល​ពួកគេ​បាន​ធ្វើ​ការសាកល្បង​រួម​បញ្ចូល​គ្នា​នូវ​សមាសធាតុ​ផ្សេងៗ​គ្នា​នៃ​ប្រព័ន្ធ​ការពារ​មី​ស៊ី​ល “​ច្រើន​ស្រទាប់​” របស់​ប្រទេស​នេះ​។ ប្រព័ន្ធ​ទាំង​នោះ​រួមមាន​Arrow សម្រាប់​ស្ទាក់ចាប់​មី​ស៊ី​ល​រយៈ​ចម្ងាយ​ឆ្ងាយ ប្រព័ន្ធ​David’s Sling សម្រាប់​បាញ់​ទម្លាក់​មី​ស៊ី​ល​ចម្ងាយ​មធ្យម និង ប្រព័ន្ធ Iron Dome​ដែល​ប្រើ​អស់​ជាច្រើន​ឆ្នាំ​​ដើម្បី​ការពារ​ប្រឆាំង​នឹង​ការបាញ់​រ៉ុក្កែត​ចូល​ពី​តំបន់​ហ្គា​ហ្សា​ស្ទ្រី​ប​។​

​លោក ម៉ូ​សេ ផា​ថែ​ល ប្រធាន​អង្គការ​ការពារ​តំបន់​មជ្ឈិមបូព៌ា​របស់​អ៊ីស្រាអែល បាន​និយាយ​ថា​សមយុទ្ធ​នេះ​បាន​បង្ហាញ​នូវ​វិធីសាស្ត្រ​ពហុ​ស្រទាប់​ដើម្បី​ដោះស្រាយ​ជាមួយ​នឹង​ការគំរាមកំហែង​​នានា​ដែល​រួមបញ្ចូល​ប្រព័ន្ធ​ទាំងបី​។​

​លោក​និយាយថា “​ដោយ​ប្រើប្រាស់​វិធីសាស្ត្រ​នេះ ការគំរាមកំហែង​ផ្សេងៗ​គ្នា​អាច​ត្រូវបាន​កំណត់​និង​បាញ់​ស្ទាក់​តាមរយៈ​ការសម្របសម្រួល​និង​អន្តរ​ប្រតិបត្តិការ​ពេញលេញ​រវាង​ប្រព័ន្ធ​ទាំង​បី​”​។​

​អ៊ីស្រាអែល​ប្រឈមមុខ​នឹង​ការគំរាមកំហែង​ដោយ​គ្រាប់​រ៉ុក្កែត​និង​មី​ស៊ី​លពី​ក្រុម​សកម្មប្រយុទ្ធ​ប៉ាឡេ​ស្ទីន​នៅ​តំបន់​ហ្គា​ហ្សា ពី​ក្រុម​សកម្មប្រយុទ្ធ​និកាយ​ស៊ី​អ៊ី​ត​គាំទ្រ​ដោយ​អ៊ីរ៉ង់​នៅ​លី​បង់ ដែល​នៅ​ជិតខាង និង​ពី​អ៊ីរ៉ង់​។

​ក្រុមមន្ត្រី​បាន​សម្តែង​ការព្រួយបារម្ភ​អំពី​ការអភិវឌ្ឍ​អាវុធ​រយៈ​ចម្ងាយ​ឆ្ងាយ​របស់​អ៊ីរ៉ង់​និង​អ្វី​ដែល​ពួកគេ​និយាយថា​ពួក​ហេស​ប៊ូ​ឡា​កំពុង​ព្យាយាម​នាំ​ចូល​ឬ​អភិវឌ្ឍ​មី​ស៊ី​ល​ដែល​មាន​សមត្ថភាព​អាច​វាយប្រហារ​ស្ទើរតែ​គ្រប់​ទីកន្លែង​នៅក្នុង​ប្រទេស​អ៊ីស្រាអែល ជាមួយ​ភាព​វាយ​ចំ​គោលដៅ​ច្បាស់លាស់​ខ្ពស់​៕

​អ៊ីស្រាអែល​សាកល្បង​ប្រព័ន្ធ​ការពារ​មី​ស៊ី​ល​៣​ប្រភេទ​កាលពី​ថ្ងៃ​អង្គារ

ទីតាំងផ្សាយពាណិជ្ជកម្ម

- Advertisment -

Most Popular