Home ព័ត៌មានជាតិ សេដ្ឋកិច្ច ៩​ខែ​ឆ្នាំ​២០...

៩​ខែ​ឆ្នាំ​២០២០: ជនបរទេស​ចូលមក​កម្ពុ​ជាជាង ១​លាន ៦​សែន​នាក់

ដោយ​: មុនី​រ័ត្ន / ភ្នំពេញ​: ជនបរទេស​ចំនួន​ជាង ១​លាន ៦​សែន​នាក់ មាន​ជាង ២០០​សញ្ជាតិ បាន​ចូលមក​ប្រទេស​កម្ពុជា ក្នុង​រយៈពេល ៩​ខែ ឆ្នាំ​២០២០​នេះ ដោយ​ការចូល​មកនេះ គឺមាន​ឯកសារ​គ្រប់គ្រាន់ និង​ចូលមក​ស្របច្បាប់​។ នេះ​បើតាម​ការបញ្ជាក់​របស់​អគ្គនាយកដ្ឋាន​អន្តោប្រវេសន៍ នៃ​ក្រសួងមហាផ្ទៃ ថ្លែងប្រាប់​រស្មី​កម្ពុជា​។

​នាយ​ឧ​ត្ត​ម​សេនីយ៍ កែវ វណ្ណ​ថន អគ្គនាយករង នៃ​អគ្គនាយកដ្ឋាន​អន្តោប្រវេសន៍ និង​ជា​អ្នកនាំពាក្យ​បានបញ្ជាក់​ឲ្យ​ដឹងថា រយៈពេល​០៩​ខែ ឆ្នាំ​២០២០ ជនបរទេស​ចូលមក​កម្ពុជា សរុប​ចំនួន 1,622,822​នាក់ មាន 216 សញ្ជាតិ ភាគច្រើន​ជា​ជនជាតិ​ចិន​។ ហើយ​ជនបរទេស​ចូលមក​ទាំងអស់ សុទ្ធ​តែមាន​ឯកសារ​គ្រប់គ្រាន់ និង​ចូលមក​ស្របច្បាប់​។

​នាយ​ឧ​ត្ត​ម​សេនីយ៍ កែវ វណ្ណ​ថន បាន​បន្តទៀតថា ក្នុងចំណោម 1,622,822​នាក់​នោះ​មាន​អ្នក​ទេសចរណ៍​ចំនួន 1.165.283​នាក់ ស្មើនឹង 71.81%​។ ពាណិជ្ជករ មាន​ចំនួន 257.346​នាក់ ស្មើនឹង​15.86% និង​ផ្សេងៗ ការទូត ផ្លូវការ ។​ល​។ មាន 12.33%​។​

​អគ្គនាយករង នៃ​អគ្គនាយកដ្ឋាន​អន្តោប្រវេសន៍​បានបញ្ជាក់​ទៀតថា ក្នុង​រយៈពេល ០៩​ខែ​ដើម ឆ្នាំ​២០២០ បាន​បណ្តេញ​ជនបរទេស​សរុប ៥៤២​នាក់ មាន​៤០​សញ្ជាតិ ភាគច្រើន​លួច​ស្នាក់នៅ​ខុសច្បាប់​លើស​ទិដ្ឋាការ និង​គ្មាន​លិខិតឆ្លងដែន​។​

​យោងតាម​របាយការណ៍​ស្ថិតិ​របស់​អគ្គនាយកដ្ឋាន​អន្តោប្រវេសន៍​បាន​ឲ្យ​ដឹងថា ចាប់ពី​ឆ្នាំ​២០១៤ រហូតមកដល់​ឆ្នាំ​២០២០ (​រយៈពេល ៧​ឆ្នាំ​) អគ្គនាយកដ្ឋាន​អន្តោប្រវេសន៍​បាន​បណ្តេញ​ជនបរទេស​ចេញពី​កម្ពុជា​ទៅ​ស្រុកកំណើត​វិញ​មាន​ចំនួន​សរុប ១៧៣២៩​នាក់ (​ស្រី​២៩៨១​នាក់​) មាន ១០៤​សញ្ជាតិ​។ ក្នុងចំណោម​ជនបរទេស​ដែល​បាន​បណ្តេញចេញ ១៧៣២៩​នាក់ ក្នុងនោះ​ជនជាតិ​វៀតណាម​ច្រើនជាងគេ គឺ ១១៥៩១​នាក់ (​ស្រី ២១៦៦​នាក់​) , ជនជាតិ​ចិនដីគោក​ចំនួន ២៩៩៦​នាក់ (​ស្រី ៤៩៣​នាក់​) , ជនជាតិ​នី​ហ្សេ​នី​យ៉ា ចំនួន ៥៣៥​នាក់ (​ស្រី ១២​នាក់​) , ជនជាតិ​ចិនតៃវ៉ាន់ ចំនួន ៣៥៥​នាក់ (​ស្រី ២៣​នាក់​) និង​ជនជាតិ​អាម៉េរិក ចំនួន ១០៨​នាក់ (​ស្រី ៤​នាក់​)៕​

ទីតាំងផ្សាយពាណិជ្ជកម្ម

- Advertisment -

Most Popular