Home ព័ត៌មានជាតិ សង្គម ​រថយន្ត​គិលាន...

​រថយន្ត​គិលានសង្គ្រោះ ដែល​ថ្នាក់លើ​ផ្តល់ ត្រូវ​បែងចែក ដល់​មន្ទីរពេទ្យ​នានា​

​ដោយៈ ភ្នំ​ស្វាយ / បន្ទាយ​មាន​ជ័​យៈ នៅក្នុង​ពិធី​ប្រគល់ ទទួល រថយន្ត​គិលានសង្គ្រោះ (Ambulance) ៥​គ្រឿង ដល់​មន្ទីរពេទ្យ​នានា​ក្នុង​ខេត្ត កាលពី​ថ្ងៃទី​១៦ ខែធ្នូ ឆ្នាំ​២០២០ លោក អ៊ុំ រាត្រី អភិបាលខេត្ត​បន្ទាយ មានជ័យ បាន​ថ្លែង ដោយ​ដាក់​ក្ដី​សង្ឃឹមថាៈ រថយន្ត​សង្គ្រោះបន្ទាន់​ទាំងនេះ នឹង​បានជា​មធ្យោបាយ ដ៏​ប្រសើរឡើង សម្រាប់​បម្រើ​ការងារ លើ​ផ្នែក​សុខាភិបាល កាន់​តែមាន​លទ្ធផល​ល្អ និង​ប្រសិទ្ធភាព​ថែមទៀត ពិសេស​ជា​មធ្យោបាយ ជួយ​ក្នុងការ​សង្គ្រោះ​អ្នកជំងឺ និង​ការងារ​កិច្ចប្រតិបត្តិការ ប្រយុទ្ធ​នឹង​ជំងឺ​កូ​វីដ​-១៩ បាន​ទាន់ពេលវេលា និង​មាន​ប្រសិទ្ធភាព​។​

​មន្ត្រី​នៃ​មន្ទីរ​សុខាភិបាល ខេត្តបន្ទាយមានជ័យ បាន​ប្រាប់​កាសែត​រស្មី​កម្ពុជា កាលពី​ថ្ងៃទី​១៦ ធ្នូ នេះ​ថាៈ រថយន្ត​គិលានសង្គ្រោះ​ទាំងនេះ ជា​អំណោយ​របស់ ក្រសួងសុខាភិបាល ជូន​ដល់​មន្ទីរពេទ្យ​ខេត្ត និង​ក្រុង​-​ស្រុក ។ សម្រាប់​ខេត្តបន្ទាយមានជ័យ នាពេលនេះ ទទួលបាន ៥ គ្រឿង គឺ ៣ គ្រឿង ម៉ាក​តូយ៉ូតា ជា​ផលិតផល​របស់​ជប៉ុន និង ២ គ្រឿង​ទៀត ជា​ផលិតផល​របស់​ប្រទេស​ចិន ដោយ​បែងចែក​ដល់​មន្ទីរពេទ្យ ចំនួន ៥ រួមមានៈ ១.​មន្ទីរពេទ្យ​ខេត្ត មិត្តភាព​កម្ពុជា ជប៉ុន មង្គល​បូរី , ២.​មន្ទីរពេទ្យបង្អែក​ស្រុក​ម៉ាឡៃ , ៣.​មន្ទីរពេទ្យបង្អែក ក្រុង​សិរីសោភ័ណ , ៤.​មន្ទីរពេទ្យបង្អែក ក្រុង​ប៉ោយប៉ែត និង ៥.​មន្ទីរ​សុខាភិបាល​ខេត្ត ។

​លោក ខេង ស៊ុម ប្រធាន​ក្រុមប្រឹក្សា​ខេត្ត និង​លោក​វេជ្ជបណ្ឌិត ឡេ ច័ន្ទ​សង្វាត ប្រធាន​មន្ទីរ​សុខាភិបាល​ខេត្ត ព្រមទាំង​អនុប្រធាន ប្រធាន​មន្ទីរពេទ្យ​ខេត្ត និង​មន្ទីរពេទ្យបង្អែក​ស្រុក ក្រុង ៤ ទៀត ក៏បាន​ចូលរួម​ក្នុង​ពិធី​ប្រគល់​ទទួល រថយន្ត​សង្គ្រោះបន្ទាន់​នោះ នា​បរិវេណ​សាលាខេត្ត ៕/V​

ទីតាំងផ្សាយពាណិជ្ជកម្ម

- Advertisment -

Most Popular