Home ព័ត៌មានអន្តរជាតិ អាម៉េរិក​ដាក់...

អាម៉េរិក​ដាក់​ទណ្ឌកម្ម​លើ​ក្រុមហ៊ុន​ដឹក​ប្រេង​និង​គីមី​នៅ​វៀតណាម​ចំពោះ​ការរកស៊ី​ជាមួយ​អ៊ីរ៉ង់​

​ប្រែ​សម្រួល : កញ្ញា​ដា​លី​ស​៖​ក្រសួងការបរទេស​អាម៉េរិក​កាលពី​ថ្ងៃ​ពុធ​ទី​១៦​ធ្នូ​បាន​ដាក់​ទណ្ឌកម្ម​លើ​ក្រុមហ៊ុន​ដឹកជញ្ជូន​ប្រេង​និង​គីមី​នៅ​វៀតណាម​ចំពោះ​ការចូលរួម​នៅក្នុង​ប្រតិបត្តិការ​ដ៏​សំខាន់​មួយ​​សម្រាប់​ការដឹកជញ្ជូន​ផលិតផល​ប្រេង​ពី​ប្រទេស​អ៊ីរ៉ង់ នេះ​យោងតាម​សេចក្តីថ្លែងការណ៍​របស់​ក្រសួង​។​

​រដ្ឋមន្ត្រីការបរទេស​ម៉ៃ ផ​ម​ផេវ បាន​សរសេ​រលើ Twitter ដោយ​ប្រកាស​អំពី​ទណ្ឌកម្ម​នេះ​យ៉ាង​ដូច្នេះ “​នៅថ្ងៃនេះ សហរដ្ឋ​អាម៉េរិក​បាន​ដាក់​ទណ្ឌកម្ម​លើ​អង្គភាព​ចំនួន ៥​សម្រាប់​ការចូលរួម​ដោយ​ចេតនា​​ក្នុង​ការដឹកជញ្ជូន​ប្រេង​អ៊ីរ៉ង់​ឬ​ផលិតផល​ឥន្ធនៈ​គីមី ដែល​ប្រាក់ចំណូល​ទទួលបាន​ត្រូវ​របប​នេះ​ប្រើប្រាស់​ដើម្បី​អនុវត្ត​របៀបវារៈ​ដ៏​សាហាវ​របស់ខ្លួន​។​យើង​នឹង​មិន​រួញរា​ក្នុង​ការតាមរក​ពួក​អ្នក​ដែល​ប៉ុនប៉ង​​គេចវេស​ពី​ទណ្ឌកម្ម​នោះឡើយ​”​។​

​ទណ្ឌកម្ម​ក៏​ត្រូវបាន​ដាក់​លើ​នាយក​គ្រប់គ្រង​ក្រុមហ៊ុន​លោក វ៉ូ ង៉ុក ភុង ផងដែរ “​សម្រាប់​ការ​បម្រើការ​ជា​នាយក​ប្រតិបត្តិ​ក្រុមហ៊ុន​”​។​

​ក្រសួងការបរទេស​អាម៉េរិក​និយាយថា “​ទន្ទឹម​គ្នា​នេះ​ដែរ ក្រសួង​រតនាគារ​កំពុង​ដាក់​ទណ្ឌកម្ម​លើ​អង្គភាព​ចំនួន ៤ ដោយ​អនុលោម​តាម​មាត្រា E.O ១៣៨៤៦​ចំពោះ​ការផ្តល់​ជំនួយ​ជា​សម្ភារៈ​ឬ​ការគាំទ្រ​​ដល់​ក្រុមហ៊ុន Triliance Petrochemical Co. Ltd. ដែល​ត្រូវបាន​ដាក់​ទណ្ឌកម្ម​ដោយ​សហរដ្ឋ​អាម៉េរិក​។ ក្រុមហ៊ុន​ទាំងនោះ​រួមមាន Donghai International Ship Management Limited និង Petrochem South East Limited ដែល​មាន​មូលដ្ឋាន​នៅ​ចិន ក៏​ដូចជា​ក្រុមហ៊ុន Alpha Tech Trading FZE និង​ក្រុមហ៊ុន Petroliance Trading FZE​ដែល​មាន​មូលដ្ឋាន​នៅ​អារ៉ាប់​រួម​​អេ​មី​រ៉ាត​”៕

ក្រុមហ៊ុន​ដឹក​ប្រេង​និង​គីមី​នៅ​វៀតណាម​ត្រូវបាន​អាម៉េរិក​ដាក់ទណ្ឌកម្ម​ចំពោះ​ការ​ធ្វើ​ប្រតិបត្តិការ​ជាមួយ​អ៊ីរ៉ង់​

ទីតាំងផ្សាយពាណិជ្ជកម្ម

- Advertisment -

Most Popular