ដោយៈ ភ្នំស្វាយ/កំពង់ធំៈ ស្នងការដ្ឋាននគរបាលខេត្តកំពង់ធំ បានប្រាព្ធពិធីបញ្ចុះបឋម សិលា បើកការដ្ឋាន សាងសង់សាលប្រជុំថ្មីមួយ នៅក្នុងបរិវេណ ស្នងការដ្ឋាន នៅពេល លោកស្នងការថ្មី បានទៅបំពេញការងារ បានជាង ២ ខែ ពោលគឺបន្ទាប់ពីជាង ១ខែមុន បានបើកការសាងសង់ អគារស្នាក់នៅ និងផ្ទះបាយ សម្រាប់កងកម្លាំងអន្តរាគមន៍ ។
លោកឧត្តមសេនីយ៍ទោ ម៉ែន លី ស្នងការនគរបាល ខេត្តកំពង់ធំ នាព្រឹកថ្ងៃទី១៦ ខែធ្នូ ឆ្នាំ២០២០ បានឲ្យដឹងថាៈ ដោយសារឃើញថា អង្គភាពស្នងការដ្ឋាន មិនទាន់មានសាល ប្រជុំ ទើបលោកបានដឹកនាំ កងកម្លាំងសាងសង់សាលប្រជុំ ដែលមានទំហំធំទូលាយបន្តិច និងទាន់សម័យអភិវឌ្ឍន៍ អោយបានសមរម្យ ដើម្បីបង្ករលក្ខណៈងាយស្រួលក្នុងការ បំពេញភារកិច្ច កិច្ចប្រជុំនានា ជាពិសេសបើកវគ្គបណ្ដុះបណ្ដាល រយៈពេលខ្លីលើវិស័យ ធនធានមនុស្ស ដល់កងកម្លាំង ។
លោកបានបន្តថាៈ សាលប្រជុំ ដែលកំពុងដំណើរការសាងសង់ មានទំហំ ១១ ម៉ែត្រ × ៣៦ ម៉ែត្រ ជញ្ជាំងអំពីឥដ្ឋ ដំបូលប្រក់ហ្វីប្រូ មានបន្ទប់ដាច់ដោយឡែក គឺចែកចេញជាបន្ទប់រង់ចាំ , សាលប្រជុំតូច , សាលប្រជុំធំ , បន្ទប់អនាម័យ ហើយក៏បំពាក់ទៅដោយ គ្រឿងអេឡិច ត្រូនិក បរិក្ខារ បម្រើការងាររដ្ឋបាល ជំនាញ ទំនាក់ទំនង ។ អគារថ្មីនេះ អាចចំណាយ ថវិកាប្រមាណ ១៤៧.០០០ ដុល្លារស.រ.អា ៕PC
