Home ព័ត៌មានជាតិ សន្តិសុខ បុរស​ម្នាក់ ក...

បុរស​ម្នាក់ កំពុងបើក​ម៉ូតូ​តាមផ្លូវ ត្រូវ​ខ្មាន់កាំភ្លើងបាញ់ប្រហារឱ្យស្លាប់​

ដោយៈ ស​រិ​ទ្ធ – សម្បត្តិ,មុនីរ័ត្ន / ភ្នំពេញៈ បុរស​ម្នាក់ ជា​អ្នក​គួ​ក​ជេរ​ដី និង​គួ​ក​ជេរ​រថយន្ត ព្រមទាំង​រកស៊ី​ចងការ ប្រាក់ ផង​នោះ កំពុងបើក​ម៉ូតូ តាមផ្លូវ បាន​ត្រូវ​ខ្មាន់កាំភ្លើង ដេញតាម​បាញ់ប្រហារ ចំនួន ៤ គ្រាប់ តែ​ត្រូវ​ចំនួន ៣​គ្រាប់ (និងខុស​ទៅ​ត្រូវ​ដី ​១ គ្រាប់) បណ្តាលឱ្យ​រងរបួស​ធ្ងន់ ហើយ​បាន​បាត់បង់​ជីវិត នៅពេល​បញ្ជូន ទៅដល់​មន្ទីរពេទ្យ​។ ហេតុការណ៍​នេះ បានកើត​ឡើង កាលពី​ម៉ោង ៣ រសៀល ថ្ងៃទី​១៧ ខែធ្នូ ឆ្នាំ​២០២០ នៅ​ចំណុច​ភូមិ​ទួល​កី សង្កាត់​ភ្លើង​ឆេះ​រទេះ ខណ្ឌ​កំបូល ។​

​ពាក់ព័ន្ធ​នឹង​ករណីនេះ សមត្ថកិច្ច បានដាក់​ការសង្ស័យ ជា​ជំហាន​ដំបូង​ថា ជា​ករណី​គំនុំ ប៉ុន្តែ​ទោះបីជា យ៉ាងណាក៏ដោយ សមត្ថកិច្ច កំពុងធ្វើការ​ស៊ើបអង្កេត ស្រាវជ្រាវបន្ថែមទៀត​។​

​សមត្ថកិច្ច បានឱ្យដឹងថាៈ បុរសរងគ្រោះ ឈ្មោះ នៅ ចំណាន អាយុ ៤៥ ឆ្នាំ ជា​អ្នក​គួ​ក​ជេរ​ដី និង​គួ​ក​ជេរ​រថយន្ត ព្រមទាំង​រកស៊ី​ចងការ​ប្រាក់ មាន​លំនៅ ក្នុងភូមិ​ដំណាក់​ត្រ​យឹ​ង សង្កាត់ ចោមចៅ​ទី​២ ខណ្ឌ​ពោធិ៍​សែន​ជ័យ រាជធានី​ភ្នំពេញ ។ ជនរងគ្រោះ បើក​ម៉ូតូ​ម៉ាក ភី​ស៊ី​អិ​ច ពណ៌​ស ពាក់​ស្លាក​លេខ ភ្នំពេញ 1ID-7477 ។​គ្រឿងអលង្ការ​និង​របស់​​មានតម្លៃ​នៅលើ​ខ្លួន​ជនរងគ្រោះ និង​ម៉ូតូ គឺ​មិនមាន​ការបាត់បង់​នោះទេ​។

សមត្ថកិច្ច បានបញ្ជាក់ថាៈ នៅពេលចុះដល់កន្លែងកើតហេតុ សមត្ថកិច្ច បានពិនិត្យ​ជាក់ស្តែង ​និង​រើស​សំបក​គ្រាប់​ ទៅ​រក្សាទុក​រង់ចាំ​ស្រាវជ្រាវ​ តាម​ចាប់​ជនដៃដល់ ​យកទៅ​ផ្តន្ទាទោស​ តាមច្បាប់។ បច្ចុប្បន្ន សព​ជនរងគ្រោះ ត្រូវបាន​ក្រុមគ្រួសារ ដឹក​ចេញ​មន្ទីរពេទ្យ​កាល់ម៉ែត យកទៅ​តម្កល់​ធ្វើបុណ្យ តាម​ប្រពៃណី នៅ​វត្ត​ទួល​សុភា​ឃួន ក្នុងភូមិ​ព្រៃទា សង្កាត់​ចោមចៅ​ទី​៣ ខណ្ឌ​ពោធិ៍​សែន​ជ័យ​៕PC /V

ទីតាំងផ្សាយពាណិជ្ជកម្ម

- Advertisment -

Most Popular