Home ព័ត៌មានជាតិ សុខាភិបាល កម្ពុជា​បានដា...

កម្ពុជា​បានដាក់​គោលដៅ​ចាក់​វ៉ាក់សាំង​បង្ការ​ជំងឺ​កូ​វីដ​-១៩​ជូន​ប្រជាជន​ឱ្យបាន​ប្រមាណ​១០​លាន​នាក់​

ដោយៈ​ស៊ា​ថាំង​/​ភ្នំពេញៈលោក​វ​ង្សី វិស្សុត រដ្ឋមន្ត្រី​ប្រតិភូ​អម​នាយករដ្ឋមន្ត្រី​និង​ជា​រដ្ឋលេខាធិការ​ប្រចាំការ​ក្រសួង​សេដ្ឋកិច្ច​និង​ហិរញ្ញវត្ថុ​បាន​ដឹកនាំ​កិច្ចប្រជុំ​បន្ទាន់​តាមរយៈ​ប្រព័ន្ធ​វីដេអូ ជាមួយ​ដៃគូ​ពាក់ព័ន្ធ​ដើម្បី​ពិភាក្សា​អំពី​គម្រោង​លទ្ធកម្ម​ទិញ​វ៉ាក់សាំង​បង្ការ​ជំងឺ​កូ​វីដ​-១៩​និង​កម្មវិធី​ចាក់​វ៉ាក់សាំង​បង្ការ​ជំងឺ​កូ​វីដ​-១៩ នៅ​កម្ពុជា​នៅ​ថ្ងៃទី​១៧​ខែធ្នូ​នេះ​។​

លោក​វ​ង្សី វិស្សុត រដ្ឋមន្ត្រី​ប្រតិភូ​អម​នាយករដ្ឋមន្ត្រី​និង​ជា​រដ្ឋលេខាធិការ​ប្រចាំការ​ក្រសួង​សេដ្ឋកិច្ច​និង​ហិរញ្ញវត្ថុ

ថ្លែង​ទៅកាន់​អ្នកចូលរួម​លោក​រដ្ឋមន្ត្រី​ប្រតិភូ​បាន​បញ្ជាក់ថា​កម្ពុជា​បានដាក់​គោលដៅ​ចាក់​វ៉ាក់សាំង​បង្ការ​ជំងឺ​កូ​វីដ​-១៩​ជូន​ប្រជាជន​ឱ្យបាន​ប្រមាណ​១០​លាន​នាក់ ដោយ​ក្នុងនោះ “​មជ្ឈមណ្ឌល​ទទួលបាន​វ៉ាក់សាំង​បង្ការ​ជំងឺ​កូ​វីដ​-១៩ ជាស​កល​” (COVAX Facility) នឹង​ផ្តល់​វ៉ាក់សាំង​បង្ការ​ជំងឺ​កូ​វីដ​-១៩ សម្រាប់​ប្រជាជន​ចំនួន​ពី ៣ ទៅ ៤ លាន​នាក់​។ ដោយឡែក នៅសល់​ប្រមាណ ៦ ទៅ ៧ លាន​នាក់​ទៀត​ដែល​រាជរដ្ឋាភិបាល​ត្រូវ​ផ្តល់ជូន​តាមរយៈ​ការ​ស្វែង​ជំនួយ​ផ្គត់ផ្គង់​ពី​ដៃគូ​អភិវឌ្ឍន៍​ផ្សេងទៀត និង​ដោយ​ការធ្វើ​លទ្ធកម្ម​ទិញ​ដោយ​រាជរដ្ឋាភិបាល​ផ្ទាល់​។ ក្នុងន័យនេះ​កម្ពុជា​បាន​សុំឱ្យ​ដៃគូ​អភិវឌ្ឍន៍​ទាំង​ទ្វេភាគី និង ពហុភាគី ចូលរួម​សហការ​ឱ្យ​កាន់តែ​ជិតស្និទ្ធ​ជាមួយ​ក្រសួងសុខាភិបាល​ដើម្បី​វាយតម្លៃ និង​កំណត់​ចំនួន​វ៉ាក់សាំង​បង្ការ​ជំងឺ​កូ​វីដ​-១៩ ដែល​ត្រូវ​ទិញ និង​ជួយ​កំណត់​មុខសញ្ញា​ក្រុមហ៊ុន​ផលិត​វ៉ាក់សាំង​បង្ការ​ជំងឺ​កូ​វីដ​-១៩ ដែលមាន​ភាពសមស្រប​បំផុត​ទៅនឹង​តម្រូវការ និង​ស្ថានភាព​ជាក់ស្តែង​របស់​ក​ម្ពុ​ជា​។

​កិច្ចប្រជុំ​ខាងលើនេះ​មានការ​អញ្ជើញ​ចូលរួម​ពី​លោក​រដ្ឋមន្ត្រី​ក្រសួងសុខាភិបាល​,​តំណាង​ក្រសួងការបរទេស​និង​សហប្រតិបត្តិការ​អន្តរជាតិ​,​ដៃគូ​អភិវឌ្ឍន៍​ពាក់ព័ន្ធ​នានា​ទាំង​ពហុភាគី​និង​ទាំង​ទ្វេភាគី​ដែល​រួមមាន​អង្គការ​សុខភាព​ពិភពលោក​(WHO)​អង្គការ​យូ​នី​សេ​ហ្វ​(UNICEF), ធនាគារអភិវឌ្ឍន៍អាស៊ី (ADB), ធនាគារពិភពលោក (WB), សហភាព​អឺរ៉ុប​ប្រចាំ​កម្ពុជា (EU), មូលនិធិ​សកល (GF), អង្គការ GAVI (The GAVI Alliance), COVAX Facility, ស្ថានទូត​អូស្ត្រាលី​, ចិន​, ជប៉ុន​, រុស្សី​, សហរដ្ឋអាមេរិក​, ចក្រភព​អង់គ្លេស​, សាធារណរដ្ឋ​កូរ៉េ និង​បារាំង ជាដើម​។

​លោក​វ​ង្សី វិស្សុត​បាន​បន្ថែមទៀត​ថា​រាជរដ្ឋាភិបាល​សូម​ស្វាគមន៍ ចំពោះ​ការចូលរួមចំណែក​ពី​គ្រប់​ដៃគូ​ទាំង​អស់ទាំង​ក្នុង​រូប​ភាពជា ជំនួយ​បច្ចេកទេស ឬ​ហិរញ្ញប្បទាន​ឥត​សំណង ឬ ជា​កម្ចី​ដែលមាន​សម្បទាន​ខ្ពស់ ចំពោះ​ថវិកា​សម្រាប់​លទ្ធកម្ម​ទិញ​វ៉ាក់សាំង និង​ថវិកា​សម្រាប់​ចំណាយ​ប្រតិបត្តិការ​ក្នុងការ​អនុវត្ត​កម្មវិធី​ចាក់​វ៉ាក់សាំង ហើយ​រាជរដ្ឋាភិបាល​នឹងធ្វើ​ការបំពេញបន្ថែម ក្នុងករណី​មានការ​ខ្វះខាត​។
​ប្រភព​ក្រសួង​សេដ្ឋកិច្ច​និង​ហិរញ្ញវត្ថុ​បានបញ្ជាក់​ថា​ជាការ​ឆ្លើយតប​ក្នុង​បណ្តា​ដៃគូ​អភិវឌ្ឍន៍​នានា​ទាំង​ពហុភាគី​និង​ទ្វេភាគី​បាន​ថ្លែង​កោតសរសើរ​និង​វាយតម្លៃ​ខ្ពស់​ចំពោះ​កិច្ចខិតខំ​ប្រឹងប្រែង របស់​រាជរដ្ឋាភិបាល​ក្នុង​ភាពជា​ម្ចាស់​ប្រកបដោយ​បុ​រេ​សកម្ម​លើ​កិច្ចការ​ប្រយុទ្ធប្រឆាំង​នឺង​ជំងឺ​រាតត្បាត​ជាស​កល​នេះ​និង​បានបង្ហាញ​ជំហរ​ច្បាស់លាស់​ក្នុងការ​ត្រៀមខ្លួន​ជាស្រេច ក្នុង​បន្ត​សកម្ម​ចូលរួម​ជាមួយ​រាជរដ្ឋាភិបាល​ថែមទៀត​៕​សរន

ទីតាំងផ្សាយពាណិជ្ជកម្ម

- Advertisment -

Most Popular