Home ព័ត៌មានអន្តរជាតិ កងទ័ពជើងទឹក​អ...

កងទ័ពជើងទឹក​អាម៉េរិក​នឹង​បន្ត​សម្ញែង​អំណាច​នៅ​តំបន់​ប៉ាស៊ីហ្វិក​ដើម្បី​ទប់ទល់​ចិន​

ប្រែ​សម្រួល : កញ្ញា​ដា​លី​ស ៖ យោធា​អាម៉េរិក​បាន​ព្រមាន​កាលពី​ថ្ងៃ​ព្រហស្បតិ៍​ទី​១៧​ធ្នូ​ថា នាវាចម្បាំង​របស់​ខ្លួន​នឹង “​សម្ញែង​អំណាច​ខ្លាំង​ជាង​មុន​” សំរាប់​អ្វីដែល​អាម៉េរិក​ចាត់ទុកជា​ការ​ឆ្លើយតប​ទៅនឹង​ការ​​រំលោភ​ច្បាប់​អន្តរជាតិ ដោយ​សំដៅ​ជាពិសេស​ទៅ​លើ​រដ្ឋាភិបាល​ក្រុង​ប៉េកាំង ដែល​មាន​មហិច្ឆតា​វាតទី​នៅក្នុង​សមុទ្រ​ចិន​ខាងត្បូង​។​

​នៅក្នុង​ឯកសារ​មួយ​ដែល​កំណត់​វត្ថុបំណង​សម្រាប់​កងទ័ពជើងទឹក កង​ម៉ា​រី​ន​និង​ឆ្មាំ​សមុទ្រ​អាម៉េរិក​សម្រាប់​ឆ្នាំ​ខាង​មុខ មន្ទីរ​បញ្ច​កោណ​បាន​សង្កត់ធ្ងន់​ថា​ប្រទេស​មួយចំនួន​ជាពិសេស​រុស្ស៊ី​និង​ចិន​កំពុង​​ប្រជែង​តុល្យភាព​អំណាច​នៅក្នុង​តំបន់​សំខាន់ៗ​និង​កំពុង​ព្យាយាម​បំផ្លាញ​សណ្តាប់ធ្នាប់​ពិភពលោក​ដែល​មាន​ស្រាប់​។

​ឯកសារ​នោះ​បាន​និយាយថា “​កងកម្លាំង​ជើង​ទឹក​ដែល​ត្រូវបាន​ដាក់ពង្រាយ​នៅលើ​ពិភពលោក​របស់​យើង​បាន​ធ្វើ​អន្តរ​កម្ម​ជាមួយ​នាវាចម្បាំង​និង​យន្តហោះ​ចិន​និង​រុស្ស៊ី​រាល់ថ្ងៃ​” ដោយ​កត់សម្គាល់ឃើញ “​ការកើនឡើង​ភាព​គឃ្លើន​របស់​ពួកគេ​” និង ហៅ​ចិន​ថា “​ការគំរាមកំហែង​ជា​យុទ្ធសាស្ត្រ​យូរអង្វែង​បំផុត​”​។​

​ឧបទ្ទវហេតុ​ចុង​ក្រោយ​រវាង​កងទ័ពជើងទឹក​អាម៉េរិក​និង​ចិន​បាន​កើតឡើង​នៅ​ចុងខែ​សីហា​នៅពេល​ដែល​រដ្ឋាភិបាល​ក្រុង​ប៉េកាំង​និយាយថា​ខ្លួន​បាន​បណ្តេញ​នាវាចម្បាំង​អាម៉េរិក​ចេញពី​ប្រជុំ​កោះ​​ប៉ា​រ៉ា​សែ​ល​ដែល​មាន​ជម្លោះ​។​

​មហាអំណាច​អាស៊ី​មួយ​នេះ​បាន​អះអាង​កាន់កាប់​កោះ​ស្ទើរតែ​ទាំងអស់​នៃ​សមុទ្រ​ចិន​ខាងត្បូង ជា​ទឹកដី​ទាមទារ​ដោយ​ប្រទេស​ដទៃ​ទៀត​នៅក្នុង​តំបន់​រួម​មាន​វៀតណាម ម៉ាឡេស៊ី ហ្វីលីពីន​និង​ព្រុយ​ណេ​។​

​ដើម្បី​ទប់ទល់​នឹង​ចិន សហរដ្ឋ​អាម៉េរិក​ដែល​ជា​ភាគី​ក្រៅ​តំបន់​បាន​និង​កំពុង​បញ្ជូន​នាវា​ទៅកាន់​តំបន់​នេះ​ឱ្យបាន​ញឹកញាប់​ដើម្បី​អនុវត្ត​នូវ​អ្វី​ដែល​ខ្លួន​ហៅ​ថា “​ប្រតិបត្តិការ​ដើម្បី​សេរីភាព​នាវាចរណ៍​”​ហើយ​ដើម្បី​រក្សាបាន​នូវ​ប្រៀប​ឈ្នះ​ជា​យុទ្ធសាស្ត្រ​លើ​កងទ័ពជើងទឹក​ចិន ដែល “​រីក​ទំហំ​ធំ​ជាង​ពីរ​ទសវត្សរ៍​មុន​៣​ដង​” កងទ័ពជើងទឹក​អាម៉េរិក​គ្រោង​នឹង​ធ្វើ​ទំនើបកម្ម​ជាមួយ​នាវា​តូចៗ រហ័សរ​ហួន និង អាច​បញ្ជា​ពី​ចម្ងាយ​បាន​។​

​សេចក្តីថ្លែងការណ៍​បាន​និយាយថា នាវា​អាម៉េរិក “​ក៏​នឹង​ទទួលយក​ហានិភ័យ​យុទ្ធសាស្ត្រ​ដែល​អាច​គណនា​បាន និង​ប្រកាន់ខ្ជាប់​នូវ​ជំហរ​រឹងមាំ​បន្ថែម​ទៀត​នៅក្នុង​ប្រតិបត្តិការ​ប្រចាំថ្ងៃ​របស់​យើង​”​។​

​សម្រាប់​ឧត្តមនាវីទោ ជេ បាយ​ណាំ នោះ​មានន័យថា “​ត្រូវ​មាន​ការឆ្លើយតប​កាន់តែ​រឹងមាំ និង​ត្រូវ​សម្ញែង​អំណាច​កាន់តែ​ខ្លាំង​”​។​

​លោក​និយាយថា “​កាលពីមុន​ឥរិយាបថ​របស់​យើង គឺ​បន្ថយ​ជម្លោះ​។ យើង​ធ្លាប់បាន​ដកថយ​និង​កាត់បន្ថយ​ហានិភ័យ​ក្នុងការ​ពើបប្រទះ​ជា​លក្ខណៈ​បុគ្គល​មួយៗ​” ដោយ​កត់សម្គាល់ថា កងទ័ពជើងទឹក “​បាន​សុខចិត្ត​ចុះ​ញ៉ម​” តាមរយៈ​វិធីសាស្ត្រ​នេះ​។​

​ឯកសារ​មន្ទីរ​បញ្ច​កោ​ណ​បានបញ្ជាក់​ថា​កងទ័ពជើងទឹក​អាម៉េរិក​ក៏​នឹង​ឃើញ​មាន​វត្តមាន​កាន់តែ​ច្រើន​ឡើង​នៅក្នុង​តំបន់​ប៉ាស៊ីហ្វិក កន្លែង​ដែល​ខ្លួន​នឹង​”​ស្វែងរក​និង​កត់ត្រា​រាល់​សកម្មភាព​របស់​​គូ​ប្រជែង​របស់​យើង ដែល​រំលោភ​លើ​ច្បាប់​អន្តរជាតិ លួច​យក​ធនធាន និង​រំលោភ​លើ​អធិបតេយ្យភាព​របស់​ប្រជាជាតិ​ដទៃទៀត​”៕

​នាវា​អាម៉េរិក​នឹង​បង្ហាញ​វត្តមាន​ញឹកញាប់​ជាង​មុន​នៅ​តំបន់​ប៉ាស៊ីហ្វិក

ទីតាំងផ្សាយពាណិជ្ជកម្ម

- Advertisment -

Most Popular