Home ព័ត៌មានជាតិ សង្គម ពិព័រណ៍​រូបថត...

ពិព័រណ៍​រូបថត​ដែលជា​ការផ្លាស់ប្តូរ​វប្បធម៌​ប្រជាប្រិយ​ជនជាតិ​កាន​ស៊ុ នៃ​ប្រទេស​ចិន ក្នុងប្រទេស​កម្ពុជា​

ដោយ​: ស​រិ​ទ្ធ / ភ្នំពេញ​: សមាគម​អ្នកសារព័ត៌មាន​កម្ពុជា​-​ចិន (​សស​កច​-CCJA) រួមសហការ​ជាមួយ​មន្ទីរ​ព័ត៌មាន ខេត្ត​កាន​ស៊ុ នៃ​ប្រទេស​ចិន បាន​ប្រារព្ធ​កម្មវិធី​ពិព័រណ៍​រូបថត​មួយ​ដែលមាន​ប្រធានបទ “​ការអញ្ជើញ​តាម​វិថី​សូត្រ​” ដែលជា​ការផ្លាស់ប្តូរ​វប្បធម៌​ប្រជាប្រិយ ជនជាតិ​កាន​ស៊ុ​នៃ​ប្រទេស​ចិន ក្នុងប្រទេស​កម្ពុជា​។

​កម្មវិធី​នេះ ប្រព្រឹត្តទៅ​ពីថ្ងៃ​ទី​១៨ ដល់ ២៤ ខែធ្នូ ឆ្នាំ​២០២០ នៅ​អគារ​សមាគម​សម្ព័ន្ធ​ខ្មែរ​ចិន នៅ​កម្ពុជា ជាន់​ផ្ទាល់​ដី ស្ថិតក្នុង​បុរី​រុងរឿង សង្កាត់​ព្រែកលៀប ខណ្ឌ​ជ្រោយចង្វារ រាជធានី​ភ្នំពេញ​។​

​ដោយសារ​បញ្ហា​ជម្ងឺ​កូ​វីដ​១៩ ដែល​កំពុង​រាតត្បាត​ជាស​កល កម្មវិធី​ពិព័រណ៍​រូបថត​លើក​នេះ ធ្វើឡើង​តាម​Online ព្រម​គ្នា​ជាមួយ​ខេត្ត​កាន​ស៊ុ ប្រទេស​ចិន​។​
​លោកជំទាវ​បណ្ឌិត​សភាចា​រ្យ ភឿង ស​កុ​ណា រដ្ឋមន្ត្រីក្រសួង​វប្បធម៌ និង វិចិត្រសិល្បៈ និង ឯកឧត្តម Wang Wen Tian ឯកអគ្គរដ្ឋទូត​ចិន​ប្រចាំ​កម្ពុជា ត្រូវបាន​អញ្ជើញ​ជា​អធិបតី​តំណាងឱ្យ​ប្រទេស​កម្ពុជា និង ប្រទេស​ចិន ដើម្បី​ថ្លែង​សុន្ទរកថា​បើក​ជា​និមិត្តរូប​តាម ONLINE​។

​លោក ធៀង វណ្ណដារ៉ុង អនុរដ្ឋលេខាធិការ តំណាង​លោកស្រី​បណ្ឌិតសភា​ចា​រ្យ ភឿង ស​កុ​ណា រដ្ឋមន្ត្រីក្រសួង​វប្បធម៌​និង​វិចិត្រសិល្បៈ​, លោក ផុស សុវណ្ណ ប្រតិភូ​រាជរដ្ឋាភិបាល​ទទួលបន្ទុក​អគ្គនាយក​ព័ត៌មាន និង សោតទស្សន៍ នៃ​ក្រសួង​ព័ត៌មាន​, លោក​ឧកញ៉ា ជុង ឃាង ប្រធាន​សមាគម​ចិន​នៅ​កម្ពុជា​, លោក ទេស សា​រ៉ា​រិ​ទ្ធ សហប្រធាន​សមាគម​អ្នកសារព័ត៌មាន​កម្ពុជា​-​ចិន ភាគី​កម្ពុជា និង លោក លីវ ស៊ា​វ​គ័ង សហប្រធាន​ភាគី​ចិន បាន​ចូលរួម​ក្នុង​កម្មវិធី​ចុច​ប៊ូ​តុង​បើក​ជា​និមិត្តរូប​កាលពី​ថ្ងៃទី​១៥ ខែធ្នូ ឆ្នាំ​២០២០​។​

​ការតាំងពិព័រណ៍​រូបថត​លើក​នេះ បានបង្ហាញ​រូបភាព​ចំនួន ៨០​ផ្ទាំង និង ផ្ទាំងគំនូរ ថាំង ខា ដែលជា​ផ្ទាំងគំនូរ​បត់ Original Paint មួយចំនួន​ផងដែរ​។ ពិព័រណ៍​រូបថត​នេះ មាន​គោលបំណង​ពីរ​ផ្នែក​៖ ផ្នែក​ទី​១ គឺ​ដើម្បី​ឆ្លុះបញ្ចាំង​ពី​បរិស្ថាន​ធម្មជាតិ និង​វប្បធម៌ ទំនៀមទម្លាប់​របស់​ជ​ន​ជាតិ​កាន​ស៊ុ នៃ​ប្រទេស​ចិន និង​ផ្នែក​ទី​២ បង្ហាញ​ពី​ប្រ​សិ​ទិ្ឋ​ភាព​នៃ​ការកាត់បន្ថយ​ភាពក្រីក្រ​ក្នុង​តំបន់​ស្វយ័ត កាន​ណាន ជាទី​វប្បធម៌​ដ៏​ចំណាស់​របស់​ជនជាតិភាគតិច​ទី​បេ និង របៀប​នៃ​ការផ្លាស់ប្តូរ​អន្តរ​កម្ម​រវាង​ជនជាតិភាគតិច​នីមួយៗ នៅក្នុង​ខេត្ត​កាន​ស៊ុ ដែលជា​ខេត្ត​មួយ​ដ៏​សំខាន់​នៃ​វិថី​សូត្រ ក្នុងប្រទេស​ចិន​។​

​លោកស្រី​បណ្ឌិត​សភាចា​រ្យ ភឿង ស​កុ​ណា មានប្រសាសន៍ថា​៖ លោកស្រី​មាន​កិត្តិយស​ដែល​បាន​ចូលរួម​ជាមួយ​ជនរួមជាតិ​ទាំងអស់ និង មិត្តភក្តិ​នៅក្នុង​ពិព័រណ៍​រូបថត ជាពិសេស​ផ្ទាំងគំនូរ​ថាំង ខា នៅពេលនេះ​។ លោកស្រី​ថែមទាំង​បាន​ណែនាំ​ដល់​ភ្ញៀវ​ចូលរួម​ឱ្យបាន​ស្គាល់​ខេត្ត​កាន​ស៊ុ ដែលជា​ទីកន្លែង​កំណើត​វប្បធម៌​ចិន ដ៏​ចំណាស់​មួយ​ស្ថិតនៅ​ភាគ​ពាយ័ព្យ​នៃ​ប្រទេស​ចិន សំបូរ​ទៅដោយ​សក្តានុពល​ខាង ទេសចរណ៍ធម្មជាតិ ជាពិសេស​គឺ វិថី​សូត្រ ដែលជា​ផ្លូវជំនួញ​សូត្រ​ដ៏​ល្បីល្បាញ​កាលពី​បុរាណ បាន​លាត​ស​ន្ឋឹ​ង​ឆ្លងកាត់​ខេត្ត​នេះ​ប្រវែង​ដល់​ទៅ​១.៦០០​គីឡូម៉ែត្រ​ឯណោះ​។​

​លោកស្រី​បាន​គូសបញ្ជាក់ថា ភាគី​ចិន​មានបំណង​បើកទូលាយ​ឱ្យ​ទស្សនិកជន​នៅក្រៅ​ប្រទេស ពិសេស​ប្រជាជន​កម្ពុជា​ស្វែងយល់​ពី​វប្បធម៌ និង ទំនៀមទម្លាប់ របស់​ជនជាតិភាគតិច​នៅ​ភាគ​ពាយ័ព្យ​នៃ​ប្រទេស​ចិន ដែលជា​ផ្នែក​មួយ​សំរាប់​ការកសាង​ស្ពាន​ផ្លាស់ប្តូរ​វប្បធម៌​រវាង​ប្រទេស​ចិន​និង​ប្រទេស​កម្ពុជា​ផងដែរ​។

​លោក Wang wen tian ឯកអគ្គរដ្ឋទូត​ចិន​ប្រចាំ​កម្ពុជា បាន​សម្ដែង​នូវ​អំណរ​សាទរ​យ៉ាង​កក់ក្តៅ​បំផុត ជូន​ចំពោះ​គ្រប់​បណ្ដា​ភាគី​ទាំងអស់​ដែល​បាន​ខិតខំ​ជំរុញ​ការផ្លាស់ប្តូរ​វប្បធម៌​ចិន និង​កម្ពុជា​។​

​លោក​គូសបញ្ជាក់ថា ប្រទេស​ចិន​និង​កម្ពុជា គឺជា​ប្រទេសជិតខាង​ល្អ​ដែលមាន​ភាពជិតស្និទ្ធ​និង​រួសរាយ​រាក់ទាក់​បំផុត និង​ជា​សហគមន៍​ជោគវាសនា​រួម​ប្រកបដោយ​អត្ថន័យ​យុទ្ធសាស្ត្រ ហើយ​ប្រទេស​ទាំងពីរ​បានរួម​សុខ​ទុក្ខ​និង​តែង​ជួយ​គ្នា​ទៅវិញទៅមក​គ្រប់​កាលៈទេសៈ​។

​លោ​កថា​ប្រទេស​ចិន​និង​កម្ពុជា ជា​ប្រទេស​ដ៏​ចំណាស់​ដែលមាន​អរិយធម៌​ដ៏​ស្រស់​ផូរផង់​ក្នុង​ប្រវត្តិសាស្ត្រ​ដ៏​អស្ចារ្យ ជាពិសេស​នោះ​គឺ​ប្រាសាទ Dunhuang Mogao ក្នុង​ខេត្ត​កាន​ស៊ុ​(Gansu)​ប្រទេស​ចិន និង​ប្រាសាទអង្គរវត្ត​ក្នុងប្រទេស​កម្ពុជា ដែលជា​សម្បត្តិ​វប្បធម៌​សិល្បៈ​កម្រិត​កំពូល​សម្រាប់​កិច្ចទំនាក់ទំនង​និង​សិក្សា​ពីគ្នា​ទៅវិញទៅមក​លើ​អរិយធម៌​មនុស្សជាតិ បាន​បង្កប់​នូវ​អត្ថន័យ​មរតក​ជា​ប្រវត្តិសាស្ត្រ​សម្រាប់​ភាពស្និទ្ធស្នាល​នៃ​មនុស្សសាស្ត្រ​ប្រទេស​ទាំងពីរ​។

​លោក​សង្កត់ធ្ងន់ថា​៖ បច្ចុប្បន្ននេះ ជម្ងឺ​កូ​វីដ​១៩​នៅតែ​បន្ត​យាយី​លើ​សកលលោក តែ​វា​ពុំបាន​រារាំង​ដល់​មនោសញ្ចេតនា​រវាង​ប្រជាជន​នៅ​បណ្ដា​ប្រទេស​លើ​ពិភពលោក​នោះទេ​។ លោក​ជឿជាក់ថា សប្តាហ៍​ផ្លាស់ប្តូរ​វប្បធម៌​ជនជាតិ​កាន​ស៊ុ ដែល​រៀបចំ​សម្រាប់​កម្ពុជា មិន​ត្រឹមតែ​អាចជួយ​ដល់​ភាគី​មិត្ត​យល់​កាន់តែច្បាស់​អំពី​ខេត្ត​កាន​ស៊ុ​នោះទេ ជាពិសេស​គឺ​ការស្វែងយល់​កាន់តែច្បាស់​អំពី​វប្បធម៌ ដ៏​ស្រស់​ផូរផង់​ក្នុង​ក្រុង​ស្វយ័ត​កាន​ណាន​(Gannan)​នៃ​ជនជាតិ​ចាង (Zang) នឹង​បង្កើតជា​កម្លាំង​បញ្ចូល​ថ្មី​មួយទៀត សម្រាប់​កិច្ច​កសាង​សហគមន៍​ជោគវាសនា​រួម​រវាង​ចិន​និង​កម្ពុជា​៕

ទីតាំងផ្សាយពាណិជ្ជកម្ម

- Advertisment -

Most Popular