Home ព័ត៌មានជាតិ សេដ្ឋកិច្ច ជប៉ុន​ផ្ដល់​ថ...

ជប៉ុន​ផ្ដល់​ថវិកា​ជិត​កន្លះ​លាន​ដុល្លារ​សម្រាប់​ការស្ថាបនា​ផ្លូវថ្នល់ ស្តារ​ប្រព័ន្ធធារាសាស្ត្រ និង​ពង្រឹង​សហគមន៍​កសិកម្ម​

ដោយៈ​សុផល​/​ភ្នំពេញ​៖​រដ្ឋាភិបាល​ជប៉ុន​បាន​ឯកភាព​ផ្តល់​ថវិកា​សរុប​ចំនួន​៣៩២.៣៧១​ដុល្លារ​អាម៉េរិក​ដល់​អ​ង្គ​ភាព​ចំនួន​បី​ក្រោម​គ្រោងការណ៍​ជំនួយ​ឧបត្ថម្ភ​ឥត​សំណង​សម្រាប់​គម្រោង​ទ្រង់ទ្រាយ​តូច​សន្តិសុខ​មនុស្សជាតិ (​ជំនួយ​គូ​សាណូ​ណិ​) ។ កិច្ចសន្យា​ផ្តល់ជំនួយ ត្រូវបាន​ចុះហត្ថលេខា​នៅថ្ងៃនេះ​ដោយ​លោក​មិ​កា​មិ​ម៉ាសា​ហ៊ី​រ៉ូ​ឯកអគ្គរាជទូត​វិសាមញ្ញ​និង​ពេញ​សមត្ថភាព​របស់​ប្រទេស​ជប៉ុន​ប្រចាំ​ព្រះរាជាណាចក្រ​កម្ពុជា និង អ្នកតំណាង​អង្គភាព​ទទួល​ជំនួយ​ទាំងបី​។

​ថវិកា​១៩៦,៣៥០​ដុល្លារ ផ្តល់ជូន​មន្ទីរ​សាធារណការ​និង​ដឹកជញ្ជូន​ខេត្តកោះកុង សម្រាប់​គម្រោង​កែលម្អ​ផ្លូវថ្នល់​ក្នុង​ឃុំ​អណ្តូងទឹក ស្រុក​បុ​ទុម​សាគរ ខេត្តកោះកុង​។​ក្នុង​គម្រោង​នេះ ផ្លូវ​ក្រួស​ប្រវែង ៧៥០​ម៉ែត្រ​នឹងត្រូវ​បាន​ចាក់​បេតុង ហើយ​បំពង់​លូ​ចំនួន ២ នឹងត្រូវ​បាន​ត ម្លើ​ង​ដើម្បី​បញ្ចៀស​កុំ​ឲ្យ​មានទឹក​ដក់ នៅ​ស្រុក​បុ​ទុម​សាគរ ខេត្តកោះកុង​។ គម្រោង​នេះ​ត្រូវបាន​រំពឹងថា នឹង​ផ្តល់​អត្ថប្រយោជន៍​ដល់​ប្រជាជន​ជាង ២.៤០០​នាក់ តាមរយៈ​ការទទួលបាន​សេវាសាធារណ ដូចជា សាលារៀន ផ្សារ និង​មណ្ឌល​សុខភាព​ប្រសើរ​ជាង​មុន ព្រមទាំង​បង្កើន​សកម្មភាព​សេដ្ឋកិច្ច​ក្នុង​តំបន់​តាមរយៈ​ការធ្វើ​ឲ្យ​ការដឹកជញ្ជូន​ដំណាំ​កសិកម្ម​មាន​ភាពងាយស្រួល​។​

​ចំណែក​ថវិកា​ចំនួន ៩០,១៥៨ ដុល្លារ​សម្រាប់​គម្រោង​ស្តារ​ប្រព័ន្ធធារាសាស្ត្រ​រោងដំរី ខេត្តកំពង់ឆ្នាំង​បាន​ត្រូវ​ផ្តល់ជូន​មន្ទីរ​ធនធានទឹក និង​ឧតុនិយម​ខេត្តកំពង់ឆ្នាំង​។​ក្នុង​គម្រោង​នេះ​ទំនប់ទឹក​ចាស់​មួយ​ដែលមាន​ប្រវែង​៩៤០​ម៉ែត្រ​នឹងត្រូវ​បាន​ស្ដារឡើងវិញ​ក្នុងស្រុក​រលាប្អៀរ​ខេត្តកំពង់ឆ្នាំង​។​គម្រោង​នេះ​ត្រូវបាន​រំពឹងថា​នឹង​ផ្តល់​ផលប្រយោជន៍​ដល់​ប្រជាជន​ក្នុង​តំបន់​ជាង​២,៣០០​នាក់​ដោយ​ធានា​ក្នុងការ​ផ្គត់ផ្គង់​ទឹក​ប្រកបដោយ​ប្រសិទ្ធភាព​សម្រាប់​សកម្មភាព​កសិកម្ម​ហើយ​ទំនប់ទឹក​ដែល​ស្តារ​រួច​នោះ​នឹង​ត្រូវបាន​ប្រើ​ជា​មធ្យោបាយ​ធ្វើដំណើរ​ដើម្បី​ដឹកជញ្ជូន​ដំណាំ​កសិកម្ម បាន​យ៉ាង​ងាយ​ដែលជា​លទ្ធផល​នឹងធ្វើ​ឲ្យ​គុណភាព​នៃ​ជីវិត​របស់​ពួកគាត់​មាន​ភាពប្រសើរឡើង​។​

​ចំពោះ​មន្ទីរ​កសិកម្ម​រុក្ខាប្រមាញ់​និង​នេសាទ​ខេត្ត​មណ្ឌល​គី​រី​បានទទួល​ថវិកា​១០៥.៨៦៣​ដុល្លារ​សម្រាប់​គម្រោង​ពង្រឹង​សហគមន៍​កសិកម្ម​នៅ​ស្រុក​កោះ​ញែក​និង​ក្រុង​សែន​មនោ​រម្យ​។​ក្នុង​គម្រោង​នេះ​ឃ្លាំង​ស្តុក​និង​ម៉ាស៊ីនកិនស្រូវ​នឹងត្រូវ​បានផ្តល់​ជូន​នៅ​សហគមន៍​កសិកម្ម​សាមគ្គី​មាន​រិ​ទ្ធ នៅ​ស្រុក​កោះ​ញែក​។ មជ្ឈមណ្ឌល​ប្រមូលផ្តុំ​វេច​ខ្ចប់​និង​ចែកចាយ​កសិផល​រួម​ជាមួយនឹង​បន្ទប់​ត្រជាក់ រក្សា​កសិផល​ក៏​នឹង​ត្រូវបាន​សាងសង់​នៅក្នុង​សហគមន៍​កសិកម្ម​សាមគ្គី​មនោ​រម្យ ក្រុង​សែន​មនោ​រម្យ ខេត្ត​មណ្ឌល​គី​រី​។ គម្រោង​នេះ​ត្រូវបាន​រំពឹងថា​កសិករ​ប្រហែល ៦០ នាក់​ដែលជា​សមាជិក​នៃ​សហគមន៍ កសិកម្ម និង ប្រជាជន​៣៩០ គ្រួសារ​នៅក្នុង​ទីតាំង​គម្រោង​នឹង​ទទួលបាន​អត្ថប្រយោជន៍​ពី​ការកែលម្អ​គុណភាព​ផលិតផល​កសិកម្ម​រប​ស់​ពួកគាត់​និង​ខ្សែសង្វាក់​តម្លៃបន្ថែម​លើ​អាជីវកម្ម​របស់​សហគម​ន៍ក សិ​កម្ម​។​

​សូមជម្រាបថា​ជំនួយ​ទាំងនេះ​គឺ​ផ្អែកលើ​ការប្តេជ្ញាចិត្ត​របស់​សហ​ប្រធាន​នៃ​កិច្ចប្រជុំ​រដ្ឋមន្ត្រីការបរទេស​មេគង្គ​-​ជប៉ុន លើក​ទី ១៣ នៅ​ថ្ងៃទី ៩ ខែកក្កដា​ឆ្នាំ ២០២០ ដែល​បាន​ថ្លែងថា “​ការអនុវត្ត​ជំនួយឥតសំណង​សម្រាប់ គម្រោង​ទ្រង់ទ្រាយ​តូច សន្តិសុខ​មនុស្សជាតិ​ឆ្នាំ​២០២០ ក្រោម​គំនិត​ផ្តួចផ្តើម​គូ​សាណូ​ណ៌​មេគង្គ​សម្រាប់ គោលដៅ​អភិវឌ្ឍន៍​ប្រកបដោយ​ចីរភាព ដែលមាន​ទឹកប្រាក់​សរុប ៩១​លាន​ដុល្លារ​អាមេរិក ដែល​រៀបចំ ឡើង​ក្នុង​គោលបំណង​ទ្រទ្រង់​ការអភិវឌ្ឍ​សេដ្ឋកិច្ច និង​សង្គមកិច្ច នៅតាម​ភូមិ​ស្រុក ថ្នាក់មូលដ្ឋាន​ទូទាំង តំបន់​មេគង្គ​”​។​

​លោក​មិ​កា​មិ​ម៉ាសា​ហ៊ី​រ៉ូ​ឯកអគ្គរាជទូត​វិសាមញ្ញ​និង​ពេញ​សមត្ថភាព​របស់​ប្រទេស​ជប៉ុន​ប្រចាំ​ព្រះរាជាណាចក្រ​កម្ពុជា​បាន​ថ្លែង​ក្នុង​ពិធី​ចុះហត្ថលេខា​ថា​៖​លោក​សង្កេត ឃើញថា​នាពេល​ថ្មីៗ​នេះ ប្រទេស​កម្ពុជា​បាននិងកំពុង មានការ​អភិវឌ្ឍ​យ៉ាង​ឆាប់រហ័ស​។ ទោះជា​យ៉ាងណាក៏ដោយ​លោក​ក៏​ទទួលស្គាល់ថា​នៅតែមាន​បញ្ហា​ប្រឈម​មួយចំនួន​ដែល​ត្រូវ​ដោះស្រាយ​ដើម្បី​លើកកម្ពស់​គុណភាព​ជីវភាព​របស់​ប្រជាជន​។​ប្រទេស​ជប៉ុន​នឹង​បន្ត​ចូលរួមចំណែក​ក្នុងការ​ដោះស្រាយ​បញ្ហា​ប្រឈម​ទាំងនោះ​តាមរយៈ​ក្របខ័ណ្ឌ​សហប្រតិបត្តិការ សេដ្ឋកិច្ច​និង​អភិវឌ្ឍន៍​ផ្សេងៗ រួមទាំង “​គូ​សាណូ​ណ៌​”​។​

 

​ជំនួយឥតសំណង​គូ​សាណូ​ណ៌​របស់​ជប៉ុន​បានចាប់ផ្តើម​នៅ​ប្រទេស​កម្ពុជា​នៅ​ឆ្នាំ​១៩៩១​ដើម្បី​គាំទ្រ​ដល់​កិច្ចខិតខំ​ប្រឹងប្រែង​រប​ស់​កម្ពុជា​ក្នុងការ​អភិវឌ្ឍ​និង​ស្ថាបនា​ប្រទេស​ឡើងវិញ​នៅតាម​កម្រិត​មូលដ្ឋាន​។​គម្រោង​ជំនួយ​នេះ​មាន​ទិសដៅ​ការពារ​ជន​ងាយ​រងគ្រោះ​ពី​កត្តា​មួយចំនួន​ដូចជា​ភាពក្រីក្រ​និង​ភាព​អកុសល​ដែល​អាច​គំរាមកំហែង​ដោយផ្ទាល់​ដល់​ជីវភាព​រស់នៅ​ការចិញ្ចឹម​ជីវិត​និង​សេចក្តីថ្លៃថ្នូរ​របស់​ពួកគេ​ក៏ដូចជា​ជួយ​ជំរុញ​នូវ​ភាពម្ចាស់ការ​លើ​ខ្លួនឯង​របស់​ប្រជា​សហគមន៍​។​ចាប់តាំងពី​ឆ្នាំ​១៩៩១​រដ្ឋា ភិ​បាលជ​ប៉ុន​បានផ្តល់​ថវិកា​ជាង​៦២​លាន​ដុល្លារ​អាមេរិក​ដល់​អាជ្ញាធរ​មូលដ្ឋាន​និង​អង្គការក្រៅរដ្ឋាភិបាល​ដើម្បី​អនុវត្ត​គម្រោង​គូ​សាណូ​ណ៌​ចំនួន​៦៣៥​គម្រោង​នៅ​ទូទាំងប្រទេស​កម្ពុជា​៕​សរន​

ទីតាំងផ្សាយពាណិជ្ជកម្ម

- Advertisment -



Most Popular