Home ព័ត៌មានជាតិ សន្តិសុខ ស្ពាន​អាកាស​ថ...

ស្ពាន​អាកាស​ថ្មើរជើង​នៅ​ស្តុ​ប​សន្ធរម៉ុក​សម្រេចបាន​ច្រើន​ភាគរយ​ហើយ

​ដោយៈ​រ៉ា​ម៉ន​/​ភ្នំពេញៈ ស្ពាន​អាកាស​ថ្មើរជើង​នៅ​ទីតាំង​ស្តុ​ប​សន្ធរម៉ុក​ជាប់​ព្រំប្រទល់ សង្កាត់​ចំនួន​៣​នោះ គឺ​សង្កាត់​ទឹកល្អក់​ទី​១ សង្កាត់​ផ្សារ​ដេប៉ូ​ទី​២ និង​សង្កាត់​ផ្សារ​ដេប៉ូ​ទី​៣ ខណ្ឌទួលគោក មកដល់ពេលនេះ​ការដ្ឋាន​ទាំងមូល​បានសម្រេច​ជាច្រើន​ភាគរយ​ហើយ ហើយ​ពេល​ដ៏​ខ្លី​នេះ​នឹង​ស្ទូច​ដាក់​តួ​ស្ពាន​។​

​លោក​សាំ ពិសិដ្ឋ ប្រធាន​មន្ទីរ​សាធារណការ និង​ដឹកជញ្ជូន​រាជធានី​ភ្នំពេញ បានឱ្យដឹង​នៅ​ព្រឹក​ថ្ងៃទី​១៨ ធ្នូ​នេះ​ថា​៖ ការដ្ឋាន​ស្ពាន​អាកាស​ថ្មើរជើង​ទាំងមូល នៅ​ទីតាំង​ស្តុ​ប​សន្ធរម៉ុក មកដល់ពេលនេះ បាន​បុកគ្រឹះ និង​ចាក់​តំឡើង​សរសរ​បាន​រួចរាល់​៣​ដើម​ហើយ គឺ​នៅសល់​១​ដើម​ទៀត​។ ពេល​ដ៏​ខ្លី​នេះ​យើង​នឹង​ស្ទូច​ដាក់​តួ​ស្ពាន​ហើយ ។​ ស្ពាន​អាកាស​ថ្មើរជើង​នៅត្រង់​មុខ​សាលាបឋមសិក្សា​សន្ធរម៉ុក​នេះ ត្រូវ​សាង់សង់​នៅលើ​ចំណុច​ផ្លូវ​ប្រសព្វ​ទាំង​៤​ទិស គឺ​សាងសង់​កាត់​ទទឹងផ្លូវ​ម៉ៅ​សេទុង​២​ខ្សែ និង​កាត់​ទទឹងផ្លូវ​កម្ពុជា​ក្រោម​២​ខ្សែ ដើម្បី​បង្កលក្ខណៈ​ងាយស្រួល​ដល់​សិស្សានុសិស្ស បាន​ឆ្លងកាត់​ស្ពាន​នេះ ដោយ​សុវត្ថិភាព ទោះ​ពួកគេ​មកពី​ទិស​ខាង​ណាក៏ដោយ​។​

​គួរ​បញ្ជាក់ថា មកដល់ពេលនេះ​រាជធានី​ភ្នំពេញ​មាន​ស្ពាន​អាកាស​ថ្មើរជើង​ចំនួន​៤​កន្លែង ហើយ​ក្នុងនោះ​រួម​មាននៅ​តំបន់​ជម្ពូ​វ័​ន្ត ខណ្ឌ​ពោធិ៍​សែន​ជ័យ មាន​ចំនួន​២​កន្លែង និង​នៅ​តំបន់​ភ្លើងស្តុប​នាង គ​ង្ហី​ង​មាន​ចំនួន​១​កន្លែង និង​នៅ​ផ្សារ​ដើម​គរ​មាន​មួយកន្លែង​ទៀត​។

​បើតាម​គម្រោង​រដ្ឋបាល​រាជធានី​ភ្នំពេញ​នឹង​កសាង​ស្ពាន​អាកាស​ថ្មើរ ជើង​ចំនួន​២៥​ទីតាំង​ទៀត​នៅក្នុង​រាជធានី​ភ្នំពេញ ដើម្បី​ឆ្លើយតប​ទៅនឹង​ប្រទេសជាតិ​មានការ​អភិវឌ្ឍ និង​ទីក្រុង​មាន​ភាព​ស៊ី​វិ​ល័យ និង​បង្កលក្ខណៈ​ងាយស្រួល ដល់​ប្រជាពលរដ្ឋ​ឆ្លងកាត់​ផ្លូវ​ប្រកបដោយ​សុវត្ថិភាព​៕​

ទីតាំងផ្សាយពាណិជ្ជកម្ម

- Advertisment -



Most Popular