Home ព័ត៌មានជាតិ សេដ្ឋកិច្ច សម្ពាធ​សមាគម​...

សម្ពាធ​សមាគម​សេដ្ឋកិច្ច នៅ​ពីក្រោយ​កិច្ចប្រជុំ​ដ៏​ប្រញាប់​រវាង​ថៃ កម្ពុជា ដើម្បី​ជួយ​ដោះស្រាយ សេដ្ឋកិច្ច​តំបន់​

ដោយ​: ភ្នំ​ស្វាយ / ព្រំដែន​កម្ពុជា​-​ថៃ​: សម្ពាធ​របស់​សមាគម​សេដ្ឋកិច្ច​គ្រប់គ្រាន់ ឬ​ហៅថា សេដ្ឋកិច្ច​មូលដ្ឋាន​ថៃ គឺជា​រឿង​នៅ​ពី​ក្រោយខ្នង ទើប​ជំរុញ​អោយ​ភាគី​ថៃ ស្នើ​ភាគី​កម្ពុជា ចូលរួម​ប្រជុំ​ដ៏​ប្រញាប់ លើ​បញ្ហា​បន្ធូរបន្ថយ​ច្បាប់ ស្តីពី​ការគ្រប់គ្រង​ស្ថានការណ៍ គ្រាអាសន្ន ដើម្បី​ជួយ​ដោះស្រាយ​សេដ្ឋកិច្ច​តំបន់ និង​ជីវភាព​ពលរដ្ឋ​។ នេះ​បើ​យោង​មន្ត្រីរដ្ឋបាល ខេត្តបន្ទាយមានជ័យ និង​ខេត្តបាត់ដំបង បាន​ប្រាប់​កាសែត​រស្មី​កម្ពុជា នៅ​ថ្ងៃទី​១៨ ខែធ្នូ ឆ្នាំ​២០២០ ។​

​ការព្រម​ទម្លាយ​ប្រាប់​ដូច្នេះ បន្ទាប់ពី​ប្រតិភូ នៃ​កងទ័ព​ភូមិភាគ​ទី​១ និង​រដ្ឋបាល ខេត្ត​ស្រះកែវ​របស់​ថៃ បាន​អញ្ជើញ​សម​ភាគី​កម្ពុជា គឺ​យោធភូមិ​ទី​៥ និង​រដ្ឋបាល​ខេត្តបាត់ដំបង និង​ខេត្តបន្ទាយមានជ័យ ចូលរួម​កិច្ចប្រជុំ ពិភាក្សា​ការងារ ជាមួយ​ខេត្ត​ស្រះកែវ ប្រទេស​ថៃ ដើម្បី​ជំរុញ​ឲ្យ​មានដំណើរ​សេដ្ឋកិច្ច ក្នុង​តំបន់​ឡើងវិញ បន្ទាប់ពី​បិទ​មួយរយៈ ដោយសារ​ជំងឺ​កូ​វីដ ១៩ ដែល​ធ្វើ​នៅលើ​ស្ពាន​មិត្តភាព នៃ​ច្រកទ្វារព្រំដែន​អន្តរជាតិ​ភ្នំ​ដី ស្រុក​សំពៅ​លូន ខេត្តបាត់ដំបង​-​ច្រកទ្វារព្រំដែន​អន្តរជាតិ ខៅ​ឌិន ស្រុក​ខ្លង​ហាត ខេត្ត​ស្រះកែវ កាលពី​ថ្ងៃទី​១៧ ខែធ្នូ នាពេល​ថ្មីៗ​នេះ ។​

​មន្ត្រី​ខាងលើ បាន​បន្តថាៈ ផ្នែក​ឯកជន​ថៃ គឺ​សមាគម​សេដ្ឋកិច្ច​គ្រប់គ្រាន់​ថៃ បាន​ប្តឹងទៅ​អាជ្ញា​ធរមាន​សមត្ថកិច្ច នៃ​រាជរដ្ឋាភិបាល​ថៃ ពី​ការធ្លាក់ចុះ​សេដ្ឋកិច្ច និង​ជីវភាព​ពលរដ្ឋ​ថៃ ដែល​បង្កឡើង​ពី​វិបត្តិ​សាកល នៃ​ការរីក​រាលដាល ជំងឺ​កូ​វីដ ១៩ ។ ប៉ុន្តែ​មូលហេតុ​ចម្បង​ជាង​នេះ គឺ​នៅ​ទីផ្សារពលកម្ម​ថៃ ដោយឡែក នៅ​តំបន់​ព្រំដែន ដែល​តែង​ពឹង​ទាំងស្រុង លើ​ពលករ​កម្ពុជា ដែល​ចូលទៅ​ប្រទេស​ថៃ ដើម្បី​ធ្វើការ ពិសេស​នៅ​រដូវ​ប្រមូល​ផល​នោះ ឥឡូវនេះ គ្មាន​ពលករ​ឡើយ​។ ដូច្នេះហើយ សមាគម បាន​ស្នើសុំ​អាជ្ញាធរ រដ្ឋាភិបាល​ថៃ អោយជួយ​សម្រួល ឬ​បន្ធូរបន្ថយ​លើ​ច្បាប់ ស្តីពី​ការគ្រប់គ្រង ក្នុងស្ថានភាព​អាសន្ន ដើម្បីអោយ​មាន​លំហូរ ពលករ​កម្ពុជា ចូលទៅ​ធ្វើការ នៅក្នុង​ប្រទេស​ថៃ​បាន ។​

​សូមបញ្ជាក់ថាៈ ក្នុង​កិច្ចប្រជុំ​ប្រញាប់​នោះ ភាគី​ថៃ ដឹកនាំ​ដោយ មេបញ្ជាការរង កងទ័ព​ភូមិភាគ​ទី​១ លោក កៀត ពិ​ស័ក្ដិ​ចាន់​ថ្រា អភិបាលខេត្ត​ស្រះកែវ ។ ឯ​ភាគី​កម្ពុជា ដឹកនាំ​ដោយ​លោក ឧ​ត្ត​ម​សេនីយ៍​ទោ ច័ន្ទ រដ្ឋា មេបញ្ជាការរង យោធភូមិភាគ​ទី​៥ លោក អ៊ុំ រាត្រី អភិបាលខេត្ត​បន្ទាយមានជ័យ លោក ងួន រតនៈ អភិបាលខេត្ត​បាត់ដំបង និង​មន្ត្រីរាជការ​ស៊ីវិល កងកម្លាំង​ក្នុង​ក្របខ័ណ្ឌ​សមាជិក គណៈកម្មាធិការ​ភូមិភាគ និង​ក៏​ជា​សមាជិក​គណៈកម្មការ ប្រយុទ្ធ​ប្រឆាំងនឹង​ជំងឺ​កូ​វីដ ១៩​។​

​បំណង​នៃ​កិច្ចប្រជុំ​ពិភាក្សា ពិគ្រោះ​យោបល់​នោះ បាន​ផ្តោត​សំខាន់ ទៅលើ​ការបន្ធូរបន្ថយ​ច្បាប់ ស្ដីពី​ការគ្រប់គ្រង​ស្ថានការណ៍ ក្នុង​គ្រាអាសន្ន នៅក្នុង​ប្រទេស​ថៃ ដើម្បី​សម្រួល​ដល់ ប្រជាពលរដ្ឋ ក្នុង​ការចូលទៅ​ធ្វើការ និង​ប្រកប​អាជីវកម្ម​វិញ​បាន ក្រោយ​ពេលដែល​មានការ​ផ្អាក ជា​បណ្ដោះអាសន្ន ក្នុងកំឡុងពេល នៃ​វិបត្តិ​កូ​វីដ​-១៩ បាន​ផ្ទុះឡើង នៅក្នុង​ប្រទេស​ថៃ និង​ប្រទេស​កម្ពុជា ជាពិសេស ដើម្បី​សម្រួល​ដល់ ការស្ដារ​សេដ្ឋកិច្ច​ឡើងវិញ នៃ​ប្រទេស​ទាំងពីរ ក្រោយ​ទទួលរង​គ្រោះ នូវ​វិបត្តិ​នេះ​ឡើង​។​

​កិច្ចប្រជុំ​នេះ មាន​របៀបវារៈ ចំនួន ៣ សំខាន់​គឺៈ ១-​ឱ្យ​ពលករ​កម្ពុជា ចូលមក​ធ្វើការ​ប្រមូល ផលិតផល​កសិកម្ម នៅ​ប្រទេស​ថៃ ខេត្តបាត់ដំបង និង​ខេត្តបន្ទាយមានជ័យ​។ ២-​ឱ្យ​អាជីវករ​កម្ពុជា ចូលមក​ប្រទេស​ថៃ ដើម្បី​ប្រកប​អាជីវកម្ម នៅក្នុង​ផ្សារ​រោង​ក្លឿ (​ខាង​ខេត្តបន្ទាយមានជ័យ​) និង​៣-​បើក​ដំណើរការ ស្ពាន​មិត្តភាព ណង​អៀន​-​ស្ទឹង​បត់ (​ខាង​ខេត្តបន្ទាយមានជ័យ )​។

​ក្រោយពី​ធ្វើការ​ពិភាក្សា​រួចមក ភាគី​កម្ពុជា និង​ភាគី​ថៃ បានសម្រេច​លទ្ធផល​ដូចជាៈ
​ទី​១.​ខេត្តបាត់ដំបង និង​ខេត្តបន្ទាយមានជ័យ ស្នើ​ឲ្យ​ភាគី​ខេត្ត​ស្រះកែវ អនុវត្ត​វិធានការ​សុខាភិបាល ច​ត្តា​ឡី​ស័ក ១៤ ថ្ងៃ នៅ​ប្រទេស​ថៃ ដល់​ប្រជាពលរដ្ឋ​កម្ពុជា មុននឹង​ចូលទៅ​ធ្វើការ​ធម្មតា ដែល​ក្នុងនោះ ភាគី​ខាង​ខេត្ត​ស្រះកែវ បាន​ឯកភាព​។ ចំណែក​ថៅកែ ឬ​និយោជក ដែល​យក​ប្រជាពលរដ្ឋ​ខ្មែរ ទៅធ្វើ​ការ គឺជា​អ្នកធានា​សុខភាព និង​រ៉ាប់រង​ថ្លៃ​ចំណាយ​ទាំងអស់​ក្នុងកំឡុងពេល​ធ្វើ​ច​ត្តា​ឡី​ស័ក ។​

​ទី​២.​រដ្ឋបាលខេត្ត​បន្ទាយមានជ័យ បានស្នើ​សុំ​ដល់​ភាគី​ខេត្ត​ស្រះកែវ ស្នើឱ្យ​បន្ថែម​ពេលវេលា បើក​ច្រកព្រំដែន​តំបន់​ម៉ាឡៃ (​ដោយ​ប្តូរ​ពេល​បើក​ពី​ម៉ោង ៩​ព្រឹក មក​ម៉ោង ៧​ព្រឹក​វិញ និង​សម្រួល​ឲ្យ​មានការ​ច​រារ​ច​ណ៍ ដឹកជញ្ជូន​ទំនិញ​បាន​)​។ ភាគី​ខេត្ត​ស្រះកែវ ទទួលយក​សំណើ និង​យកទៅ​ពិភាក្សា​បន្ថែម ។​

​ទី​៣.​ក្នុងករណី​ពលករ​កម្ពុជា មាន​ជំងឺ ឬ វិជ្ជមាន​កូ​វីដ​-១៩ ស្នើ​ឲ្យ​ភាគី​ខេត្ត ទទួល​រាប់​រង​ព្យាបាល​។ ករណីនេះ ភាគី​ខេត្ត​ស្រះកែវ មិនទាន់​ឆ្លើយតប និង​យកទៅ​ពិភាក្សា​បន្ថែម ។​

​ទី​៤.​ខេត្តបន្ទាយមានជ័យ ស្នើ​ឲ្យ​មានការ​អនុញ្ញាត ដល់​អាជីវករ អាច​ចូលទៅ​លក់ដូរ​ទំនិញ នៅ​ផ្សារ​រោង​ក្លឿ ដោយ​គោរព​តាម​វិធានការ របស់​ក្រសួងសុខាភិបាល នៃ​ប្រទេស​ទាំង​២ ។ ខាង​ភាគី​ថៃ បាន​ឯកភាព ចំពោះ​ការចូល ទៅ​លក់ដូរ​ជាធម្មតា តែ​ត្រូវធ្វើ​ច​ត្តា​ឡី​ស័ក រយៈពេល ១៤ ថ្ងៃ​។ នេះ​ចំពោះ​អាជីវករ ត្រូវ​ចូលទៅ​លក់ រយៈពេល​យូរ ៣ ទៅ ៤ ខែ ។ ដោយឡែក ចំពោះ​ពលរដ្ឋ​ចូល​ព្រឹក វិល​ល្ងាច ទាំង​ទៅ​ផ្សារ​រោង​ក្លឿ និង​ធ្វើការ​តាម​ព្រំដែន​នោះ ភាគី​ខេត្ត​ទាំង ៣ ពុំទាន់​មានការ ឯកភាព​នោះទេ ដោយ​សុំ​ពិភាក្សា​បន្ត និង​ស្នើសុំ​គោលការណ៍ ទៅ​ប្រមុខ​រាជរដ្ឋាភិបាល នៃ​ប្រទេស​ទាំង ២ សិន ។​

​គួរបញ្ជាក់​ថាៈ ក្នុង​កិច្ចប្រជុំ​ពិភាក្សា​នេះ ភាគី​ខេត្ត​ស្រះកែវ បានរៀបចំ​ព្រាង​កំណត់ហេតុ​រួមមួយ ដោយមាន​ការចុះហត្ថលេខា ៣ ភាគី មាន​ខេត្ត​ស្រះកែវ ខេត្តបាត់ដំបង និង​ខេត្តបន្ទាយមានជ័យ ។ ដោយឡែក ខេត្តបាត់ដំបង និង​បន្ទាយមានជ័យ ស្នើសុំ​យក​សេចក្តីព្រាង កំណត់ហេតុ​រួម​នេះ មក​ពិនិត្យ​ជាមុនសិន និង​ចំណុច​ដែល​ខេត្ត មិនអាច​សម្រេចបាន ខេត្ត​នឹង​ស្នើសុំ​គោល​កាណ៍ ទៅ​ក្រសួងមហាផ្ទៃ នៃ​កម្ពុជា ជាមុនសិន ៕/V​

ទីតាំងផ្សាយពាណិជ្ជកម្ម

- Advertisment -

Most Popular