ក្រុមហ៊ុន​ឥណ្ឌា​៤​ចុះ​កិច្ចព្រមព្រៀង​ផលិត​វ៉ាក់សាំង​កូវី​ដ​១៩​ចំនួន​៣០០​លាន​ដូ​សអោយ​រុស្ស៊ី​

ប្រែ​សម្រួលៈ​វាសនា​/​មុំ​បៃ​៖ ឥណ្ឌា​នឹង​ផលិត​វ៉ាក់សាំង​រុស្ស៊ី​Sputnik V​ចំនួន​៣០០​លាន​ដូ​សនៅ​ឆ្នាំក្រោយ នេះ​បើ​តាម​ការបញ្ជាក់​ពី​មន្ត្រី​រុស្ស៊ី​ម្នាក់​។​

​ស្ថានទូត​រុស្ស៊ី​ប្រចាំ​នៅ​ក្រុង​ញូ​វ ដេល្លី បាន​និយាយ​កាលពី​ថ្ងៃ​សុក្រ​ថា រុស្ស៊ី​បាន​ធ្វើតេស្តិ៍​រួច​ហើយ​សំណាក​ដំបូងៗ​នៃ​វ៉ាក់សាំង Sputnik V​ដែល​ត្រូវបាន​ផលិត​នៅ​ឥណ្ឌា ។​

​លោក​គី​រី​ល ឌី​មី​ទ្រី​វ ប្រធាន​មូលនិធិ​វិនិយោគ​ផ្ទាល់​រុស្ស៊ី បាន​ប្រាប់​ទូរទស្សន៍ Rossiya 24 TV​ថា «​នៅ​ឥណ្ឌា យើង​មាន​កិច្ចព្រមព្រៀង​ជាមួយ​ក្រុមហ៊ុន​ផលិត​ធំៗ​ចំនួន​៤ ។​ឥណ្ឌា​នឹង​ផលិត​វ៉ាក់សាំង​ប្រមាណ​៣០០​លាន​ដូស ឬ​ច្រើន​ជា​នេះ​សំរាប់​យើង​នៅ​ឆ្នាំក្រោយ​»​។​

​ឥណ្ឌា​ជា​អ្នក​ផលិត​វ៉ាក់សាំង​ធំ​បំផុត​នៅក្នុង​លោក​និង​ឧស្សាហកម្ម​ឳ​សថ​របស់​ប្រទេស​នេះ​បើកដៃ​អោយ​បង្កើន​សមត្ថភាព​និង​ការវិនិយោគ​នៅ​ពេល​ប្រទេស​នានា​លើ​ពិភពលោក​ប្រញាប់ប្រញាល់​រក​វ៉ាក់សាំង​​កូវី​ដ​១៩​មក​ចាក់​អោយ​ប្រជាជន​ខ្លួន​។​

​ក្រុមហ៊ុន​Hetero Biopharma​បានប្រកាស​កិច្ចព្រមព្រៀង​មួយ​ជាមួយ​មូលនិធិ​វិនិយោគ​ផ្ទាល់​រុស្ស៊ី​ដើម្បី​ផលិត​វ៉ាក់សាំង​Sputnik V​ជាង​១០០​លាន​ដូស ក្រៅពីនេះ​គេ​នៅ​មិនទាន់​ដឹងថា​ក្រុម​ណា​ខ្លះ​ទៀត​​បាន​ចុះ​កិច្ចព្រមព្រៀង​ផលិត​វ៉ាក់សាំង​អោយ​រុស្ស៊ី​។​

​ពួក​មន្ត្រី​ឥណ្ឌា​បាន​និយាយថា គេ​អាច​អនុម័ត​ប្រើ​វ៉ាក់សាំង​ខ្លះ​សំរាប់​គ្រាអាសន្ន​នៅ​ប៉ុន្មាន​សប្តាហ៍​ខាងមុខ​។​តាំងពី​មុន​មក​មាន​តែ​វ៉ាក់សាំង​របស់​Oxford-AstraZeneca, Pfizer /BioNTech ​និង​របស់​ក្រុមហ៊ុន​ឥណ្ឌា Bharat Biotech​ប៉ុណ្ណោះ​ដែល​ត្រូវបាន​អនុញ្ញាត​អោយ​ប្រើប្រាស់​ក្នុង​គ្រាអាសន្ន​។​

​ក្រសួង​សុខាភិបាល​ឥណ្ឌា​កាលពី​ថ្ងៃ​សុក្រ បាន​រាយការណ៍​ការឆ្លង​វីរុស​កូរ៉ូណា​ថ្មី​ចំនួន​២២.៨៩០​នាក់ ធ្វើអោយ​ប្រទេស​នេះ​មាន​អ្នក​ឆ្លង​សរុប​ជិត​១០​លាន​នាក់ ហើយ​ចំនួន​ស្លាប់​សរុប​កើន​ដល់​១៤៤.៧៨៩​នាក់​៕

 

 

ទីតាំងផ្សាយពាណិជ្ជកម្ម

- Advertisment -

Most Popular