Home កីឡា លី​ក​អឺរ៉ុប​ច...

លី​ក​អឺរ៉ុប​ចុង​សប្តាហ៍ ៖ Liverpool ទោះ​របួស​ច្រើន​នៅតែ​រំពឹង​ឈ្នះ ខណៈ Man City និង Arsenal ទៅសួរសុខទុក្ខ​ក្រុម​ឡើង​ជើង ស្រប​ពេល​ឈុត​ធំ​អាល្លឺម៉ង់ Leverkusen និង Bayern ប៉ះគ្នា​

​ប្រែ​សម្រួល : កញ្ញា​ដា​លី​ស​/​បាល់ទាត់ ៖ ការប្រកួត​បាល់ទាត់​លី​ក​កំពូល​តំបន់​អឺរ៉ុប​ចុង​សប្តាហ៍​នេះ​បាន​វិលត្រឡប់​មក​ទៀត​ហើយ​។ ការប្រកួត​មាន​ច្រើន​គូ​ចាប់ពី​ថ្ងៃ​សៅរ៍​រហូត​ដល់​ថ្ងៃ​ចន្ទ​ឯណោះ​។ ដោយឡែក​ជំនួប​នៅ​ថ្ងៃ​សៅរ៍​នៅ​អង់គ្លេស មាន​រហូត​៤​គូ ហើយ​យើង​នឹង​លើកយក​៣​គូ​មក​វិភាគ ព្រមទាំង​លី​ក​កំពូល​អាល្លឺម៉ង់​១​គូ​ផងដែរ គឺ​រវាង Leverkusen និង Bayern Munich​។

– EPL : [12] Crystal Palace vs Liverpool [1] ៖ ត្បិត​មាន​បញ្ហា​របួស​កីឡាករ​សំខាន់ៗ​ជាច្រើនរូប ក៏​ហង្ស​ក្រហម Liverpool នៅតែ​ជា​ក្រុម​ល្អ​ដាច់​គេ​នៅក្នុង​លី​ក​កំពូល​អង់គ្លេស​។ នៅ​ប្រកួត​ចុងក្រោយបង្អស់​ពួកគេ​បាន​សបញ្ជាក់​ឱ្យ​ឃើញ​ច្បាស់​ថា​ក្រុម​ការពារ​តំណែង​ជើងឯក​មិនមែន​លេង​លំៗ​នោះទេ ដោយ​គ្របដណ្តប់​ការប្រកួត​ទាំងស្រុង ក្នុងពេល​ផ្តួល​គូប្រជែង​កៀក​បំផុត​របស់​ខ្លួន Tottenham ក្នុង​លទ្ធផល ២-១​។

​គិត​មក​ទល់​ពេល​នេះ ហង្ស​ក្រហម​ឈរ​លើ​កំពូល​តារាង​ដាច់​៣​ពិន្ទុ​។ លើសពីនេះ ក្រុម​លេខ​២ Tottenham មាន​កិច្ចការ​លំបាក​ខ្លាំង ដោយ​ត្រូវ​ទទួល​ភ្ញៀវ​លេខ ៤ Leicester នៅ​ថ្ងៃអាទិត្យ ហើយ​ក្រុម​លេខ​៣ Southampton ត្រូវ​ស្វាគមន៍​ភ្ញៀវ Man City នៅ​ថ្ងៃ​សៅរ៍​។ នេះ​ជា​ឱកាស​ល្អ​របស់​ក្រុម​របស់​លោក​ជួ​ហ្គិន ក្លប់ ដើម្បី​ពង្រីក​ការ​នាំមុខ ៦ ពិន្ទុ​ដាច់ ក្នុងករណី​ក្រុម​គូប្រជែង​ចាញ់​។

​ចំណែក​ក្រុម Crystal Palace ដឹកនាំ​ដោយ​លោក​រ៉​យ ហុត​សុន តាំង​ពី​បើក​រដូវ​កាល​មក​ឈ្នះ​តែ ៣ ដង​គត់ ហើយ​ឈ្នះ​ក្រុម​ទើប​ឡើង​ថ្មី​ទាំង​៣​ទៀត​។ ហើយ​អ្វី​ដែល​គួរឱ្យ​បារម្ភ​គឺ​ពួកគេ​មាន​កំណត់ត្រា​អន់​ណាស់​ពេល​ជួប​ជាមួយ​ហង្ស​ក្រហម​ក្នុង​ប៉ុន្មាន​ឆ្នាំ​មកនេះ​។ ហេតុដូច្នះ ពួកគេ​ថ្ងៃនេះ​មិន​រំពឹង​អ្វី​ក្រៅតែពី​ទប់​កុំឱ្យ​ចាញ់​ហង្ស​ក្រហម​តែប៉ុណ្ណោះ​។

– EPL : [3] Southampton vs Manchester City [9] ៖ Southampton រដូវ​កាល​នេះ​លេង​ល្អ​មែនទែន ដោយ​ឈរ​នៅ​លេខ​៣​ក្នុង​តារាង​ពិន្ទុ EPL​។ មានតែ Liverpool និង Chelsea ប៉ុណ្ណោះ​ដែល​ស៊ុត​ចូល​ទី​ច្រើនជាង Southampton ហើយ​ដោយហេតុថា Spurs ត្រូវ​ពាក់​ស្នែង​ជល់​នឹង Leicester នៅ​ថ្ងៃអាទិត្យ នេះ​ជា​ឱកាស​ដែល​កូនក្រុម​របស់លោក រ៉ាល់ ហា​សិន​ហ៊ុល ត្រូវ​យកឈ្នះ​លើ Man City ឡើង​មក​លេខ​២​។

​ពួកគេ​ក៏​មិន​ងាយ​រំពឹង​ឈ្នះ​លើ​ក្រុម​មេឃ​ខៀវ Man City ងាយៗ​ដែរ ត្បិត​មេឃ​ខៀវ​លេង​មិន​សូវ​ល្អ​នៅ​រដូវ​កាល​នេះ​ក្តី​។ កូនក្រុម​របស់​លោក​ប៉េប ហ្គាឌី​អូ​ឡា ដែល​ជា​អតីត​ជើងឯក Premier League ឆ្នាំ​នេះ​ហាក់​ត្រដាបត្រដួស​ខ្លាំងណាស់ រហូតមកទល់​ពេលនេះ​ហើយ​នៅតែ​មិន​អាច​ហក់​ចូល​ចំណាត់ថ្នាក់​កំពូល​ទាំង ៦ បាន​ទៀត​។ នេះ​សបញ្ជាក់​ថា ពួកគេ​កំពុង​មាន​បញ្ហា​ទម្រង់​លេង​មែនទែន​ហើយ​។

​តែ​ទោះ​យ៉ាងណា គុណភាព​និង​បទពិសោធន៍​របស់​កីឡាករ City នី​មួយៗ​នៅតែ​ល្អ​ជាង​ក្រុម Southampton​។ ហើយ​ពួកគេ​ក៏​មាន​ប្រវត្តិ​ល្អ​ខ្លាំង​ផង​ដែរ​ពេល​ប៉ះ Southampton ។ ប៉ុន្តែ​ដោយសារ​ក្រុម​ម្ចាស់ផ្ទះ​ឥឡូវ​ឡើង​ជើង​ខ្លាំង​មិន​ដូច​ពីមុន ពួក​គេ​រំពឹង​ធ្វើ​ព្យុះ​ភ្លៀង និង​អាច​សង្ឃឹម​ឈ្នះ​លើ City ឬ​យ៉ាងហោច​ក៏​ស្មើ​ដែរ​។​

– EPL :  [5] Everton vs Arsenal [15] ៖ បន្ទាប់​ពី​ធ្លាក់ចុះ​ទម្រង់​លេង​ប៉ុន្មាន​ប្រកួត​មុននេះ ឥឡូវ​ក្រុម​ស្ករ​គ្រាប់ Everton កំពុង​ចាប់ផ្តើម​រក​ឃើញ​ទម្រង់​លេង​ល្អ​របស់​ខ្លួន​មក​វិញ​ហើយ ដោយ​ផ្តួល​សុទ្ធតែ​ក្រុម​ខ្លាំង គឺ Chelsea និង Leicester ដូច្នេះ​វា​ជា​កម្លាំង​ជំរុញ​ដ៏​ខ្លាំងក្លា​មួយ នៅ​ពេល​ពួកគេ​ទទួល​ក្រុម​កាំភ្លើង​ធំ​គ្រាប់​ជ័រ Arsenal ។

​ក្រុម​ស្ករ​គ្រាប់​សព្វថ្ងៃ​ឈរ​នៅ​លេខ​៥​ចាញ់​លេខ​២ Spurs តែ​២​ពិន្ទុ​ប៉ុណ្ណោះ​។ នៅ​ថ្ងៃ​សៅរ៍​នេះ ក្រុម​លេខ​២ Tottenham ប៉ះ​លេខ​៤ Leicester និង​ក្រុម​លេខ​៣ Southampton ប៉ះ Man City ដូច្នេះ​នេះ​ជា​ឱកាស​ល្អ​បំផុត​ដែល​កូនក្រុម​របស់​លោក​កា​ឡូ​ស អាន់​សេ​ឡូ​ទី អាច​ឡើង​មក​លេខ​២ ប្រសិនបើ​គូប្រជែង​កំពូល​តារាង​ភ្លាត់ស្នៀត​ស្មើ​ឬ​ចាញ់​។ អ្វី​ដែល​ពួកគេ​ត្រូវ​ធ្វើ​គឺ​ចាត់ការ​ក្រុម​កាំភ្លើង​ធំ Arsenal ឱ្យបាន​។​

​កូនក្រុម​របស់លោក មី​ឃែល អាតិតា ឈរ​នៅ​ចំណាត់ថ្នាក់​លេខ​១៥ និង​មិន​ទាន់​ឈ្នះ​សោះ​នៅ ៩ ប្រកួត​ចុងក្រោយ​នៃ​ការប្រកួត​១៣​លើ​ក្នុង EPL​។ ក្នុងចំណោម​៩​ប្រកួត​ដែល​មិន​ដែល​ឈ្នះ​នោះ គឺ​មាន​បរាជ័យ​រហូត​ដល់​៧​លើក​ទៅហើយ​។

​ដោយហេតុ​ថា Everton កំពុង​ឡើង​ជើង ហើយ​ក្រុម​កាំភ្លើង​ធំ​កំពុង​ធ្លាក់ចុះ​ទម្រង់​លេង​ខ្លាំង​មែនទែន យើង​រំពឹង​ក្រុម​ស្ករ​គ្រាប់​នឹង​លុត​ក្រុម​កាំភ្លើង​ធំ​យ៉ាងតិច​២​គ្រាប់​ឡើងទៅ​។

– Bundesliga : [1] Leverkusen vs Bayern Munich [2] ៖ ថ្ងៃ​សៅរ៍​នេះ កីឡដ្ឋាន Bay Arena នឹង​បើកទ្វារ​ស្វាគមន៍​ក្រុម​កំពូល​តារាង​ទាំងពីរ​របស់​អាល្លឺម៉ង់​។ Leverkusen នឹង​ពាក់​ស្នែង​ជល់​ជាមួយ​ក្រុម​ម្ចាស់​តំណែង​ជើងឯក Bayern Munich ដើម្បី​រក្សា​តំណែង​លេខ​១​របស់ខ្លួន​។ ជា​ក្រុម​តែមួយគត់​ដែល​មិន​ស្គាល់​ពាក្យ​ថា​ចាញ់​នៅ​អាល្លឺម៉ង់ ក្រុម Leverkusen ចូល​មក​ប្រកួត​នេះ​គឺ​ពោរពេញ​ដោយ​ទំនុកចិត្ត ក្រោយ​ផ្តួល Koln ផុយៗ ៤-០​។

Bayern Munich បាន​ប្រកួត​ចាញ់​១​លើក​ក្នុងចំណោម ១២ លើក​នៅ​រដូវ​កាល​នេះ​។ បរាជ័យ​មួយ​នេះ​គឺ​កើត​ឡើង​នៅ​ក្រៅ​ទឹកដី​។ ប៉ុន្តែ​ក្រុម Bayern លេង​ល្អ​ខ្លាំង​ណាស់​នៅ​រដូវ​កាល​នេះ​។ ពួកគេ​មក​ទឹកដី Bay Arena ថ្ងៃ​សៅរ៍​នេះ ក្រោយ​ឈ្នះ ២-១ លើ Wolfsburg​។ Bayern Munich មក​ទឹកដី​របស់ Leverkusen ចុងក្រោយបង្អស់​គឺ​ឈ្នះ ៤-២ ហើយ​ជួប​ម្ចាស់ផ្ទះ ៧ លើកចុងក្រោយ​ចាញ់​តែ​ម្តង​គត់​។

​ដោយហេតុ​ថា Leverkusen មិន​ដែល​ចាញ់​សោះ​នៅ​រដូវ​កាល​នេះ ហើយ Bayern ក៏​មិន​អន់​នោះដែរ ដូច្នេះ​យើង​រំពឹង​ម្ចាស់ផ្ទះ​ស្មើ​ឬ​ឈ្នះ​។​

​តារាង​ការប្រកួត​លី​ក​អឺរ៉ុប​ចុង​សប្តាហ៍ ៖

ទីតាំងផ្សាយពាណិជ្ជកម្ម

- Advertisment -



Most Popular