Home ព័ត៌មានអន្តរជាតិ អាម៉េរិក​ចុះ​...

អាម៉េរិក​ចុះ​បញ្ជីខ្មៅ​ក្រុមហ៊ុន​ចិន​ជាច្រើន រួម​ទាំង​ក្រុមហ៊ុន​ផលិត​បន្ទះ​ឈីប​លំដាប់​កំពូល SMIC និង​ក្រុមហ៊ុន​ផលិត​ដ្រូ​ន​ធំ​បំផុត​របស់​ពិភពលោក DJI

​ប្រែ​សម្រួល : កញ្ញា​ដា​លី​ស​/​វ៉ាស៊ីនតោន ៖ សហរដ្ឋ​អាម៉េរិក​បាន​បន្ថែម​ក្រុមហ៊ុន​ចិន​ជា​ច្រើន​រួម​ទាំង​ក្រុមហ៊ុន​ផលិត​បន្ទះ​ឈីប​កំពូល SMIC និង​ក្រុមហ៊ុន​ផលិត​ដ្រូ​ន​ចិន SZ DJI Technology Co Ltd ទៅក្នុង​បញ្ជីខ្មៅ​ពាណិជ្ជកម្ម​កាលពី​ថ្ងៃ​សុក្រ​ទី​១៨​ធ្នូ ខណៈ​រដ្ឋបាល​របស់​ប្រធានាធិបតី​ដូណាល់ ត្រាំ​បាន​បង្កើន​ភាព​តានតឹង​ជាមួយ​ចិន​នៅក្នុង​សប្តាហ៍​ចុងក្រោយ​របស់​គាត់​នៅក្នុង​មុខ​តំណែង​។​

​ទីភ្នាក់ងារ​សារព័ត៌មាន​រ៉​យ​ទ័របាន​រាយការណ៍​ដំ​បូង​គេ​អំពី​ការបន្ថែម​ឈ្មោះ​ក្រុមហ៊ុន SMIC និង​ក្រុមហ៊ុន​ផ្សេង​ទៀត​ទៅ​ក្នុង​បញ្ជីខ្មៅ​កាលពី​ព្រឹក​ថ្ងៃ​សុក្រ​។ ​ចំណាត់ការ​នេះ​ត្រូវ​គេ​មើលឃើញ​ថា​ជា​សកម្មភាព​ចុងក្រោយ​នៅក្នុង​កិច្ចខិតខំ​ប្រឹងប្រែង​រប​ស់លោក​ប្រធានាធិបតី​ត្រាំ​មកពី​គណបក្ស​សាធារណរដ្ឋ​ដើម្បី​ធ្វើឱ្យ​គេ​ឃើញច្បាស់​ថា​គាត់​តឹងតែង​ទៅលើ​ចិន​​ដើម្បី​ជា​ផ្នែក​មួយ​នៃ​ការប្រយុទ្ធ​តស៊ូ​រយៈពេល​វែង​រវាង​ទីក្រុង​វ៉ាស៊ីនតោន​និង​ប៉េកាំង​ជុំវិញ​បញ្ហា​ពាណិជ្ជកម្ម​និង​បញ្ហា​សេដ្ឋកិច្ច​ជា​ច្រើន​ទៀត​។​

​ក្រសួង​ពាណិជ្ជកម្ម​អាម៉េរិក​បាន​និយាយថា សកម្មភាព​ប្រឆាំងនឹង​ក្រុមហ៊ុន SMIC​គឺ​ផ្តើមចេញ​ពី​កិច្ច​ប្រឹងប្រែង​របស់​ក្រុង​ប៉េកាំង​ដើម្បី​ប្រើប្រាស់​បច្ចេកវិជ្ជា​ស៊ីវិល​សម្រាប់​គោលបំណង​យោធា​និង​​ភស្តុតាង​នៃ​សកម្មភាព​នានា​រវាង​ក្រុមហ៊ុន SMIC និង​ក្រុមហ៊ុន​ឧស្សាហកម្ម​យោធា​ចិន​ពាក់ព័ន្ធ​ជាច្រើន​។​

​លោក​រដ្ឋមន្ត្រី​ពាណិជ្ជកម្ម វី​ល​បួ រ៉ូ​ស បាន​និយាយ​នៅក្នុង​សេចក្តីថ្លែងការណ៍​មួយ​ថា​ក្រសួង​ពាណិជ្ជកម្ម​នឹងមិន​អនុញ្ញាត​ឱ្យ​បច្ចេកវិជ្ជា​ទំនើប​របស់​សហរដ្ឋ​អាម៉េរិក​ជួយ​កសាង​យោធា​របស់​សត្រូវ​ដែល​​ឆ្លាត​វាងវៃ​ខ្លាំង​ឡើង​នោះ​ទេ​។​

​ក្រសួង​ក៏​បាន​និយាយ​ផងដែរ​ថា​ខ្លួន​កំពុង​បន្ថែម​ក្រុមហ៊ុនដ្រូន​ធំជាងគេ​បំផុត​របស់​ពិភពលោក DJI ទៅក្នុង​បញ្ជីខ្មៅ​រួម​ជាមួយ​ក្រុមហ៊ុន AGCU Scientech ក្រុមហ៊ុន​ឧបករណ៍​និង​សម្ភារៈ​វិទ្យាសាស្ត្រ​​ជាតិ​ចិន និង​ក្រុមហ៊ុន​គួង​ជី​គ្រុប សម្រាប់​ការរំលោភ​លើ​សិទ្ធិមនុស្ស​ទ្រង់ទ្រាយ​ធំ​។​

​រដ្ឋមន្ត្រី​ក្រសួង​ការបរទេស​អាម៉េរិក​លោក ម៉ៃ ផ​ម​ផេវ បាន​បន្ថែម​នៅក្នុង​សេចក្តីថ្លែងការណ៍​ដាច់ដោយឡែក​មួយ​ថា “​សហរដ្ឋ​អាម៉េរិក​នឹង​ប្រើប្រាស់​រាល់​វិធានការ​ឆ្លើយតប​ដែល​អាច​រក​បាន​រួម​ទាំង​​សកម្មភាព​នានា​ដើម្បី​រារាំង​ក្រុមហ៊ុន​និង​ស្ថាប័ន​ចិន​ពី​ការកេងប្រវ័ញ្ច​ទំនិញ​និង​បច្ចេកវិជ្ជា​របស់​សហរដ្ឋអាម៉េរិក​ក្នុង​គោលបំណង​ព្យាបាទ​”៕

​ក្រុមហ៊ុន​ផលិត​ដ្រូ​ន​ចិន SZ DJI Technology Co Ltd ឥឡូវ​ជាប់​ក្នុង​បញ្ជីខ្មៅ​របស់​អាម៉េរិក​ហើយ

ទីតាំងផ្សាយពាណិជ្ជកម្ម

- Advertisment -

Most Popular