Home ព័ត៌មានជាតិ សន្តិសុខ ជិះ​ម៉ូតូ​ដេញ...

ជិះ​ម៉ូតូ​ដេញតាម​ចោរឆក់​ខ្សែក​ជ្រុល​ទៅបុក​ម៉ូតូ​កង់​បី​របួស​បីនាក់​

​ដោយៈ​ស​រិ​ទ្ធ​/​ភ្នំពេញៈ មនុស្ស​ប្រុស​ស្រី​៣​នាក់​បាន​រងរបួស ពេលដែល​ជិះ​ម៉ូតូឌុប​គ្នា​បញ្ច្រាសទិស​ចរាចរណ៍​ដេញតាម​ចោរឆក់​ខ្សែក​នៅតាម​ផ្លូវ​បេតុង​ខាងក្រោយ​សាលារៀន​ណត​ឡាញ ក្នុង​សង្កាត់​ស្ទឹងមានជ័យ​១ ខណ្ឌមានជ័យ ក៍​ជ្រុល​ទៅ​ម៉ូតូ​កង់​បី ដែល​កំពុងធ្វើដំណើរ​តាមផ្លូវ​លេខ​២១៧ ក្នុង​សង្កាត់​ស្ទឹងមានជ័យ​២ ខណ្ឌមានជ័យ ចំ​ពីមុខ​ពេញទំហឹង​កាលពី​វេលា​ម៉ោង​១១ និង​០៥​នាទី​យប់ ថ្ងៃទី​១៨ ខែធ្នូ ឆ្នាំ​២០២០ ។

​តាម​ប្រភពព័ត៌មាន​ពី​ប្រជាពលរដ្ឋ​បាន​ឲ្យ​ដឹងថា មុន​កើតហេតុ មាន​ម៉ូតូ​២​គ្រឿង ដែល​១​គ្រឿង​មិន​ចាំ​ម៉ាក​ជិះ​ដោយ​បុរស​ម្នាក់​ធ្វើដំណើរ​ចេញពី​ផ្លូវ​បេតុង​ខាងក្រោយ​សាលារៀន​ណត​ឡាញ ក្នុងទិសដៅ​ពី​ជើង​ទៅ​ត្បូង​ក្នុង​ល្បឿន​លឿន ឆ្លងកាត់​ផ្លូវ​ព្រះ​មុនី​រ៉េត​មក​បញ្ច្រាសទិស​ចរាច​រណ៍​។ ក្នុងនោះ​ក៏មាន​ម៉ូតូ​១​គ្រឿង​ទៀត​ម៉ាក​ហុងដា​ឌ្រី​ម ស៊េរី​ឆ្នាំ​២០១៧ ពណ៌​ខ្មៅ ពាក់​ស្លាក​លេខ​ភ្នំពេញ 1GI-1646 ជិះ​ឌុប​គ្នា​៣​នាក់ (​ប្រុស​១ ស្រី​២ ) ដេញតាម​ពីក្រោយ​មិន​ប្រយ័ត្ន​ក៏​ជ្រុល​ទៅបុក​ម៉ូតូ​កង់​បី​ដែល​កំពុងធ្វើដំណើរ​ស្រប​ផ្លូវ និង​ដឹក​ភ្ញៀវ​ចំ​ពីមុខ​ពេញទំហឹង បណ្ដាល​ឲ្យ​ភាគី​ខាង​ម៉ូតូ​ហុងដា​ឌ្រី​ម​ជិះ​ឌុប​គ្នា​៣​នាក់​រងរបួស​ធ្ងន់​២​នាក់​និង ស្រាល​ម្នាក់ ។

​បន្ទាប់មក​ប្រជាពលរដ្ឋ​ក៏​សួរ​ទៅកាន់​ជនរងគ្រោះ​ដែល​រងរបួស​ស្រាល​បាន​ប្រាប់ថា ពួកគេ​ត្រូវ​ចោរឆក់​ខ្សែក​បានសម្រេច ទើប​នាំគ្នា​ដេញតាម​ចាប់​ក៏​ជ្រុល​ទៅបុក​ឡំ​ប្រឺ​តា​យ៉ាង​ដូច្នេះ​។ ចំណែក​ជនសង្ស័យ​ដែល​ឆក់​ខ្សែក​ជនរងគ្រោះ​បានសម្រេច​នោះ ក៏បាន​ជិះ​ម៉ូតូ​គេចខ្លួន​ដោយ​សុវត្ថិភាព ។

​ក្រោយ​កើតហេតុ ជនរងគ្រោះ​ប្រុស​ស្រី​ទាំង​៣​នាក់​នេះ ត្រូវ​រថយន្ត​សាមុយ​ដឹក​យកទៅ​សង្គ្រោះ​នៅឯ​មន្ទីរពេទ្យ​ឯកជន​ភ្លាមៗ ។ ចំណែក​ឡំ​ប្រឺ​តា​និង​ម៉ូតូ​ជនរងគ្រោះ​ដែល​រង​ការខូចខាត ត្រូវបាន​សមត្ថកិច្ច​មូល​ដ្ឋា​ន​និង​ជំនាញ​ធ្វើការ​វាស់វែង​យកទៅ​រក្សាទុក​រង់ចាំ​ដោះស្រាយ​គ្នា​តាម​ក្រោយ ៕

ទីតាំងផ្សាយពាណិជ្ជកម្ម

- Advertisment -

Most Popular