Home ព័ត៌មានអន្តរជាតិ អតីត​ប្រធានាធ...

អតីត​ប្រធានាធិបតី​ប៊ុយ​រុនឌី​ស្លាប់ដោយ​កូវី​ដ​១៩

​ប្រែ​សម្រួលៈ​វាសនា​៖ អតីត​ប្រធានាធិបតី​ប៊ុយ​រុនឌី លោក​ព្យែរ ប៊ុយ​យ៉ូ​យ៉ា បាន​ស្លាប់​ដោយ​ជំងឺ​កូវី​ដ​១៩​នៅ​ក្រុងប៉ារីស​ក្នុង​អាយុ​៧១​ឆ្នាំ នេះ​បើ​តាម​ការបញ្ជាក់​របស់​សាច់ញាតិ​លោក​កាលពី​ថ្ងៃ​សុក្រ​។​ការ​​ស្លាប់​នេះ​កើតឡើង​ប៉ុន្មាន​សប្តាហ៍​ក្រោយ​លោក​បាន​លាឈប់​ពី​តំណាង​ពិសេស​របស់​អង្គការ​សហភាព​អាហ្វ្រិក​ប្រចាំ​នៅ​ម៉ាលី​និង តំបន់​សា​ហែល​។​

លោក​ព្យែរ ប៊ុយ​យ៉ូ​យ៉ា

​លោក ប៊ុយ​យ៉ូ​យ៉ា បាន​ចូល​ដេកពេទ្យ​នៅ​ទីក្រុង​បា​ម៉ាកូ​របស់​ម៉ាលី កាលពី​ថ្ងៃ​ពុធ​និង​ត្រូវបាន​ជម្លៀស​មក​ដល់​ក្រុងប៉ារីស ប្រទេស​បារាំង​កាលពី​ថ្ងៃ​ល្ងាច​ព្រហស្បតិ៍​។ ប្រភព​ព័ត៌មាន​បាន​និយាយថា​​លោក​បាន​ស្លាប់​នៅលើ​ឡានពេទ្យ​ក្នុង​ក្រុងប៉ារីស​កាលពី​យប់​ថ្ងៃ​ព្រហស្បតិ៍​។​

​លោក​ប៊ុយ​យ៉ូ​យ៉ា​ត្រូវបាន​កាត់ទោស​កំបាំ​ង​មុខ​អោយ​ជាប់គុក​មួយជីវិត​ចំពោះ​បទ​ចោទ​ប្រព្រឹត្ត​ឃាតកម្ម​លើ​អ្នក​ស្នង​តំណែង​ពី​លោក​នៅ​ឆ្នាំ​១៩៩៣​និង​កាលពី​ខែ​វិច្ឆិកា​បាន​លាឈប់​ពី​តំណាង​ពិសេស​​របស់​អង្គការ​សហភាព​អាហ្វ្រិក​។​

​ជា​ជនជាតិ​ភាគតិច ទុត​ស៊ី និង​មក​ពី​គ្រួសារ​ខ្សត់ខ្សោយ​មួយ លោក​ប៊ុយ​យ៉ូ​យ៉ា បាន​ចាប់ផ្តើម​ការងារ​ក្នុង​ជួរ​យោធា មុនពេល​ឡើង​កាន់​អំណាច​ក្នុង​រដ្ឋប្រហារ​មួយ​នា​ឆ្នាំ​១៩៨៧​។​ក្នុងអំឡុងពេល​កាន់​អំ​​ណា​ច​ក្នុង​អាណត្តិ​ដំបូង លោក​បាន​ខិតខំ​ធ្វើការ​ឆ្ពោះទៅ​រក​ប្រព័ន្ធ​លទ្ធិប្រជាធិបតេយ្យ​ខ្លាំង​ឡើង​នៅក្នុង​ប្រទេស​តូច​មួយ​ក្នុងចំណោម​ប្រជាជាតិ​តូចៗ​បំផុត​នៅ​អាហ្វ្រិក​។​លោក​បាន​លាឈប់​នៅ​ឆ្នាំ​១៩៩៣​ក្នុង​ការបោះឆ្នោត​តាម​បែប​ប្រជាធិបតេយ្យ​លើកដំបូង​របស់​ប្រទេស ហើយ​គូប្រជែង​មក​ពី​ក្រុម​ជនជាតិ ហ៊ូ​ទូ បាន​ឡើងកាន់​តំណែង​ជំនួស​។​

​តែ​ពួក​ទាហាន​មក​ពី​ក្រុម​ជនជាតិ​ទុត​ស៊ី បានសម្លាប់​ប្រធានាធិបតី អ៊ិន​ដា​ដាយេ ក្រោយ​លោក​ចូលកាន់​តំណែង​បាន​៤​ខែ​។​ឃាតកម្ម​នេះ​បាន​រុញ​ប៊ុយ​រុនឌី​អោយ​ធ្លាក់​ចូល​ក្នុង​សង្គ្រាមស៊ីវិល​រាប់​ឆ្នាំ រវាង​​ក្រុម​ជនជាតិ​ភាគច្រើន​ហ៊ូ​ទូ និង​ពួក​ភាគតិច​ទុត​ស៊ី​។​

​ប៊ុយ​យ៉ូ​យ៉ា បាន​ចូល​កាន់តំណែង​ប្រធានាធិបតី​ជា​ថ្មី​ក្រោយ​រដ្ឋប្រហារ​មួយ និង​បាន​ស្ថិតក្នុង​មុខ​តំណែង​នេះ​ពី​ឆ្នាំ​១៩៩៦​ដក់​២០០៣​។​

​នៅ​ឆ្នាំ​២០០០ លោក​ចាន​ចុះ​កិច្ចព្រមព្រៀង​ក្រុង​អា​រូ​សា ក្នុង​បំណង​បញ្ចប់​សង្គ្រាម​ស៊ីវិល​ដែល​បាន​សម្លាប់​មនុស្ស​ប្រមាណ​៣០០.០០០​នាក់​រវាង​ឆ្នាំ​១៩៩៣​និង​២០០៦​។​លោក​បាន​ចុះចេញ​ពី​តំណែង​នៅ​ឆ្នាំ​២០០៣ ស្រប​តាម​លក្ខខណ្ឌ​ក្នុង​កិច្ចព្រមព្រៀង​៕

ទីតាំងផ្សាយពាណិជ្ជកម្ម

- Advertisment -

Most Popular