Home ព័ត៌មានជាតិ សង្គម ដំរី​ខា​វ៉ាន់...

ដំរី​ខា​វ៉ាន់ យកមក​ពី​ប៉ា​គី​ស្ថាន កំពុង​បន្សាំ​ខ្លួន​ជាមួយនឹង​ដំរី​ញី ៣​ក្បាល នៅ​ខេត្ត​ឧ​ត្ត​មានជ័យ​

​ដោយៈ ដេប៉ូ / ឧ​ត្ត​មាន​ជ័​យៈ ក្នុង​រយៈពេល​ជិត ២០ ថ្ងៃ​មកនេះ ដំរី​ខា​វ៉ាន់ ដែល​ត្រូវបាន គេ​បញ្ជូន ពី​ប្រទេស​ប៉ា​គី​ស្ថាន ឱ្យមក​រស់នៅក្នុង ដែនជម្រកសត្វព្រៃ ប្រទេស​កម្ពុជា​នោះ កំពុង​បាន​បន្សាំ​ខ្លួន​បណ្តើរៗ ហើយ​ជាមួយនឹង​ទីកន្លែង​ថ្មី នៅក្នុង​ទឹកដី​ប្រទេស​កម្ពុជា​។ អ្វីដែល​កាន់តែ​ពិសេស​ជាងនេះទៅទៀត ដំរី​ឈ្មោល ដែល​ធ្លាប់​គេ​ចាត់ទុកថា ឯក​កោ​បំផុត ក្នុង​លោក​មួយ​ក្បាល​នេះ កំពុង​ត្រូវបាន​គេ​ឱ្យ​វា បង្កាត់​ពូជ ជាមួយ​ដំរី​ញី ចំនួន ៣ ក្បាល នៅ​កម្ពុជា​ថែមទៀត​។​

​ពេលនេះ ដំរី​ឈ្មោល​អភ័ព្វ និង​ឯក​កោ ដែលមាន​អាយុ ៣៥ ឆ្នាំ ពេលនេះ លែង​ឯក​កោ ទៀតហើយ បន្ទាប់ពី​មាន​កន្លែង​រស់នៅ យ៉ាង​សុខ​ស្រួល ហើយនឹង អាច​ដើរ​មាន​សេរីភាព វិញ តាម​ស្វែងរក​ចំណី និង​បង្កាត់កូន ក្នុង​ដែនជម្រកសត្វព្រៃ ព្រហ្ម​ទេព ខេត្ត​ឧ​ត្ត​មានជ័យ ក្នុងប្រទេស​កម្ពុជា រយៈពេល ៣ ខែ​ខាងមុខនេះ​។

​លោក នេត្រ ភក្ត្រា រដ្ឋលេខាធិការ និង​ជា​អ្នកនាំពាក្យ ក្រសួងបរិស្ថាន បាន​លើកឡើងថា ក្នុងនាម​រាជរដ្ឋាភិបាល បាន​អរគុណ​ដល់ អង្ក​ការអភិរក្ស​ដែន​ជំរក សត្វព្រៃ​កម្ពុជា បាន​ទទួលយក​ដំរី ខា​វ៉ាន់ មក​ចិញ្ចឹម ដើម្បី​បង្កាត់ ជាមួយ​ដំរី​ញី យក​កូន​។​

​អ្នកនាំពាក្យ​រូបនេះ បានលើកឡើង​ថាៈ ” យើង​ដឹងថា ដំរី​ស្រុក មានការ​លំបាក ក្នុង​បង្កាត់​ពូជ ពីព្រោះ​ដំរី​ស្រុក មានតែ​ប្រមាណ ៧១ ក្បាល ហើយ​កំពុង​ប្រឈម នឹង​ដាច់​ពូជ​ដោយសារ មិនមាន​ការបន្ត​ពូជ​។ ពេលនេះ យើង​ហាក់ដូច​ជាមាន​ក្តីសង្ឃឹម ដោយសារ​មាន​ដំរី​ឈ្មោល ខា​វ៉ាន់ មក​ប៉ា​គី​ស្ថាន ហើយ​កំពុងមាន​កំលាំង មក​បង្កាត់​។ យើង​បង្កាត់​វា ងាយស្រួល រក្សា​ប្រភេទ​ដំរី និង​បន្សាំ​ការប្រែប្រួល​អាកាសធាតុ ព្រោះថា ពិភពលោក បាន​កំពុងតែ មានការ​ប្រែប្រួល អាកាសធាតុ “​។​

​លោក​បាន​មានប្រសាសន៍ថាៈ ” រាជរដ្ឋាភិបាល បាន​ជួយ​យ៉ាងសកម្ម ក្នុងការ​សម្រប សម្រួល ក្នុង​ការនាំ​ដំរី​ឈ្មោល ខា​វ៉ាន់ មក​រស់នៅក្នុង​ទឹកដី​អាស៊ី​។ ដំរី​ឈ្មោះ ខា​វ៉ាន់​ដែលជា ដំរី​ដ៏​ឯកោ​បំផុត នៅលើ​លោក ទីបំផុត​លែង​ឯកោ​ទៀតហើយ ក្រោយពេល​ត្រូវបាន​បញ្ជូន​ពី ប្រទេស​ប៉ា​គី​ស្ថាន ឱ្យមក​រស់នៅក្នុង ដែនជម្រកសត្វព្រៃ នៃ​ប្រទេស​កម្ពុជា ចាប់តាំងពី ថ្ងៃទី​៣០ ខែវិច្ឆិកា ឆ្នាំ​២០២០ មក​។ រហូតមកទល់​ពេលនេះ ដំរី​ខា​វ៉ាន់ បាន​ផ្តើម​ជីវិត​ថ្មី និង​ក្តីសង្ឃឹម​ថ្មី​របស់ខ្លួន នៅក្នុង​ជម្រក​ថ្មី ដែល​ប្រទេស​កម្ពុជា បាន​ផ្តល់ជូន​រយៈពេល​ជិត ២០ ថ្ងៃ​ហើយ ហើយ​ដំរី​ខា​វ៉ាន់ ក៏បាន​បន្ស៊ាំ​ខ្លួន បាន​យ៉ាង​ល្អ​នឹង​បរិស្ថាន​ថ្មី ហើយ​ជាង​នេះ គឺ​ការធ្វើទំនាក់ទំនង​ជាប្រចាំ ជាមួយ​ដំរី​ញី ទាំង ៣ ក្បាល “​។​

​លោក​បាន​បញ្ជាក់ថាៈ ” កម្ពុជា​បានផ្តល់​ជម្រក​ថ្មី ផ្តល់​ជីវិត​ថ្មី និង​ផ្តល់​ក្តីសង្ឃឹម​ថ្មី ដល់​ដំរី ដ៏​ឯកោ​មួយ​នេះ​។ ដំរី​ខា​វ៉ាន់ ជា​ដំរី​ឈ្មោល មាន​អាយុ ៣៥ ឆ្នាំ ត្រូវបាន​ក្រុម​អភិរក្ស​សត្វព្រៃ ជួយសង្គ្រោះ ពី​សួនសត្វ​មួយ នៃ​ប្រទេស​ប៉ា​គី​ស្ថាន តាមរយៈ​ការតស៊ូ ផ្នែក​ច្បាប់​ហើយ ចុងក្រោយ តុលា​កំពូល​របស់​ប៉ា​គី​ស្ថាន បានសម្រេច​ឱ្យ​ដំរី ខា​វ៉ាន់ ត្រូវមាន​សេរីភាព និង​បញ្ជូនមក​រស់នៅ ក្នុងព្រៃ​ធម្មជាតិ នៃ​ដែនជម្រកសត្វព្រៃ របស់​ប្រទេស​កម្ពុជា ” ។​

​លោក​រដ្ឋលេខាធិការ បាន​បន្ថែម​ឱ្យដឹងថាៈ ” ផ្ទះ​ថ្មី​របស់​ដំរី​ខា​វ៉ាន់ នៅក្នុង​ប្រទេស​កម្ពុជា គឺ​ស្ថិតនៅក្នុង​ដែនជម្រកសត្វព្រៃ គូ​លេន ព្រហ្ម​ទេព ក្នុងភូមិ​សាស្ត្រ ខេត្ត​ឧ​ត្ត​រ​មានជ័យ ដែលជា​តំបន់ការពារធម្មជាតិ​មួយ ក្នុងចំណោម​តំបន់ ការពារ​ធម្មជាតិ និង​របៀង​អភិរក្ស ជីវៈចម្រុះ ទាំង ៦៨ កន្លែង​របស់​ប្រទេស​កម្ពុជា​។ កម្ពុជា ដែល​ត្រូវបាន​ទទួលស្គាល់ ដោយ​ពិភពលោក​ថា សម្បូណ៌​ដោយ​ជីវចម្រុះ​ជាច្រើន ក្នុងនោះ ប្រភេទ​សត្វ​កម្រ​ជិត ផុត​ពូជ​បំផុត ជិត​ផុត​ពូជ និង​ប្រភេទ​សត្វ ដែល ទទួល​ការគំរាមកំហែង គឺមាន​វត្តមាន នៅក្នុង​ប្រទេស​កម្ពុជា​” ។​

​លោក​បាន​បញ្ជាក់ថាៈ ដំរី​ខា​វ៉ាន់ គឺជា​ប្រភេទ​ដំរី​អាស៊ី ដែលជា​ប្រភេទ​រង​ការគំរាមកំហែង ហើយ​កម្ពុជា មាន​ប្រភេទ​ដំរី​អាស៊ី​នេះ ចន្លោះ​ពី ៤០០ ទៅ ៦០០ ក្បាល ដែល​កំពុងតែ​រស់នៅ ក្នុងព្រៃ​នៃ​តំបន់ការពារធម្មជាតិ របស់​កម្ពុជា ក្នុង​ខេត្តរតនគិរី និង​មណ្ឌលគិរី និង​នៅក្នុង តំបន់​ជួរ​ភ្នំ​ក្រវ៉ា​ញ​។ កម្ពុ​ជាមាន​ដំរី​ស្រុក​ប្រមាណ​ជាង ៧០ ក្បាល​ផងដែរ​។​

​លោក​ឧ​ញ៉ា សុខ ហុង ប្រធាន​អង្ក​ការអភិរក្ស​ដែនជម្រកសត្វព្រៃ​កម្ពុជា បានឱ្យដឹងថាៈ ខា​វ៉ាន់ ត្រូវបាន​យកមក​ពី ប្រទេស​ប៉ា​ហ្គី​ស្ថាន កាលពី​ថ្ងៃទី​៣០ វិច្ឆិកា កន្លងមកហើយ​បាន យកមក​ដាក់ ឲ្យ​រស់នៅ​ដែន​ជំរក​សត្វព្រៃ គូលែន​ព្រហ្ម​ទេព ស្ថិតនៅ​ក្នុងភូមិ​អូរ​តា​ម៉េង ឃុំ​អន្លង់វែង ស្រុក​អន្លង់វែង ខេត្ត​ឧ​ត្ត​រ​មានជ័យ ដើម្បី បង្កាត់​ពូជ ជាមួយ​ដំរី​ក្នុងស្រុក​។​

​លោក​បាន​បន្តថាៈ ដំរី​នេះ មាន​ប្រវត្តិ​អភ័ព្វ ភាព​អភ័យ​ណាស់ ដោយសារ​ខា​វ៉ាន់ បានកើត នៅ​ប្រទេស​ស្រីលង្ការ ប៉ុន្តែ​ត្រូវបាន​លក់ ទៅ​ប្រទេស​ប៉ា​គី​ស្ថាន តាំងពី​មាន​អាយុ ១ ឆ្នាំ​មកម្ល៉េះ​។ លោក​បាន​បញ្ជាក់ថាៈ ” រឿង​ខា​វ៉ាន់ ទម្រាំ​មកដល់​កម្ពុជា គឺមាន​ប្រវត្តិ​វែង ឆ្ងាយ​ណាស់ ដោយ​ក្នុងនោះ វា​រស់នៅក្នុង​សួនសត្វ មាន​ដៃគូ​មួយ​ក្បាល តែ​ដៃគូ​របស់​វា បាន​ងាប់​ចោល នៅ​ឆ្នាំ​២០១២ ធ្វើឱ្យ ខា​វ៉ាន់ ឯក​កោ ដោយពេល​ខ្លះ វា​យក​ក្បាល​ជល់​នឹង ជញ្ជាំង​ថ្មី ទាំង​ជើង ជាប់​ច្រ​វ៉ា​ក់​។ អ៊ីចឹង​យើង​ទម្រាំ​យក​វា មក​បាន​ចំណាយពេល​ជាង ៥ ឆ្នាំ រហូតដល់​មានការ​តតាំង​ក្តី តាម​ផ្នែក​តុលាការ​ថែមទៀត ” ។​

​ជាមួយគ្នា​នោះដែរ លោក​ឧ​ញ៉ា ក៏បាន​ឱ្យដឹងថាៈ លោក​នឹង​អភិរក្ស​សត្វ នៅ ដែន​ជម្រក​សត្វ គូ​លេន ព្រហ្ម​ទេព ដែល​នៅពេល​ខាងមុខ នឹង​ក្លាយជា​កន្លែង ទេសចរណ៍ ដែល​សំបូរ​ទៅ ដោយ​សត្វ​ចម្រុះ​។ លោក​បាន​បញ្ជាក់ថាៈ លោក​មានគំនិត​យកស​ត្វ​ដំរី ទាំង​ប៉ុន្មាន មក​រស់នៅ​ដែនជម្រកសត្វព្រៃ គូ​លេន ព្រហ្ម​ទេព ទាំងអស់ ដើម្បី​ឲ្យ​ពួកវា រស់នៅ​ជា លក្ខណៈ​ធម្មជាតិ​។​

​យ៉ាងណាក្តី បើតាម​អ្នកនាំពាក្យ ក្រសួងបរិស្ថាន បានឱ្យដឹង​ដែរ​ថា តាម​ការប៉ាន់ស្មាន ផែនការ​សកម្មភាពរ​យៈ​ពេល ១០ ឆ្នាំ ដើម្បី​អភិរក្ស​សត្វ​ដំរីព្រៃ​អាស៊ី​នេះ ត្រូវការ​ថវិកា​ចំនួន ៤០,៥ លាន​ដុល្លារ​សហរដ្ឋអាមេរិក ដែលជា​គម្រោង​ថវិកា រំពឹងថា នឹង​បានមកពី​ប្រភព រួមបញ្ចូល​គ្នា ទាំង​កញ្ចប់​ថវិកា​រាជរដ្ឋាភិបាល អង្គការ​មិនមែន​រដ្ឋាភិបាល និង​ដៃគូ​អភិវឌ្ឍន៍ នានា​៕/V-PC

ទីតាំងផ្សាយពាណិជ្ជកម្ម

- Advertisment -

Most Popular