ដោយៈ សរិទ្ធ / ភ្នំពេញៈ ជនសង្ស័យចំនួន បីនាក់ ដែលជាប់ពាក់ព័ន្ធករណី ជួញដូរគ្រឿង ញៀន ទម្ងន់ជិត ១០ គីឡូក្រាម បានត្រូវសមត្ថកិច្ចនគរបាល មន្ទីរប្រឆាំងគ្រឿងញៀន បញ្ជូនមកតុលាការ នៅព្រឹកថ្ងៃទី១៩ ខែធ្នូ ឆ្នាំ២០២០ ដើម្បីចាត់ការតាមច្បាប់។ លោក ប្លង់ សុផល ព្រះរាជអាជ្ញារង អមសាលាដំបូង រាជធានីភ្នំពេញ កំពុងសាកសួរ ជនសង្ស័យទាំង បីនាក់នេះ។
ជនសង្ស័យទាំង បីនាក់នេះ បានត្រូវនគរបាល មន្ទីរប្រឆាំងគ្រឿងញៀន សហការជា មួយនគរបាល ខេត្តបន្ទាយមានជ័យ ក្រោមការសម្របសម្រួល នីតិវិធីពីលោក មាស ច័ន្ទពិសិដ្ឋ ព្រះរាជអាជ្ញា អមសាលាដំបូង ខេត្តបន្ទាយមានជ័យ បានចុះបង្ក្រាបករណី ជួញដូរគ្រឿងញៀន ក្នុងភូមិសាស្ត្រក្រុងប៉ោយប៉ែត កាលពីថ្ងៃទី១៥ ខែធ្នូ ឆ្នាំ២០២០ដោយ ឃាត់ខ្លួនជនសង្ស័យ ចំនួន បីនាក់ មានស្រី១នាក់ រួមនឹងវត្ថុតាងគ្រឿងញៀន ជាង ១០ ប្រភេទ ទម្ងន់ជិត ១០ គីឡូក្រាម និងអាវុធខ្លី ១ ដើម។
សមត្ថកិច្ច បានបញ្ជាក់ថាៈ ការចុះបង្ក្រាបករណី ចែកចាយគ្រឿងញៀនដ៏ធំនេះ គឺកម្លាំង ជំនាញ បានសហការគ្នា យ៉ាងល្អ ដើម្បីធ្វើការត្រួតពិនិត្យ និងឆែកឆេរ រហូតឈានដល់ ការឃាត់ខ្លួន ជនសង្ស័យ និងស្វែងរកវត្ថុតាង ចំនួន ២ ទីតាំង។
សមត្ថកិច្ច បានបញ្ជាក់ទៀតថាៈ ទីតាំងទី១ ឃាត់ខ្លួនជនសង្ស័យ ចំនួន២នាក់ មានឈ្មោះ ទី យៀង អាយុ៤៣ឆ្នាំ និងឈ្មោះ ហុង ម៉េង អាយុ១៦ឆ្នាំ ទាំងពីរនាក់ ត្រូវជាម្តាយ និងកូនប្រុស រស់នៅនៅភូមិក្បាលស្ពាន១ សង្កាត់-ក្រុងប៉ោយប៉ែត រឹបអូសបានវត្ថុតាងមានចំនួន ២ វ៉ាលីស សង្ស័យមានសារធាតុញៀន និងបន្តចុះបង្ក្រាបទីតាំងទី២ ឃាត់ខ្លួនជនសង្ស័យម្នាក់ ឈ្មោះ សេង ដាលីសិទ្ធិ ហៅ ចិន ភេទប្រុស អាយុ៤០ឆ្នាំ ស្នាក់នៅបន្ទប់ជួល ស្ថិតភូមិប៉ាលិ លេយ្យ១ សង្កាត់-ក្រុងប៉ោយប៉ែត រឹបអូសវត្ថុតាង រួមមាន កេសដែកចំនួន ១ ដាក់គ្រឿង ញៀន និងអាវុធខ្លី ១ ដើម។ វត្ថុតាងទាំងនេះ មានគ្រឿងញៀន ជាង ១០ ប្រភេទ ទម្ងន់ជិត ១០ គីឡូក្រាម មានម្សៅសថ្លា ប្រភេទមេតំហ្វេតាមីន ហៅខេទឹកក, ម្សៅក្រាមពណ៌ស ប្រភេទមេតំហ្វេតាមីន ហៅខេ គ្រឿងញៀន ប្រភេទកេតាមីនដប គ្រឿងញៀនជាច្រើន ប្រភេទទៀត និងអាវុធខ្លីស៊េរីទំនើប ១ដើម មាន២បង់ និងគ្រាប់មួយចំនួនទៀតត្រូវបាន រៀបចំឯកសារ ប្រគល់ជូនទៅមន្ទីរ ប្រឆាំងគ្រឿងញៀន នៃក្រសួងមហាផ្ទៃ ដើម្បីបន្ត ចាត់ការតាមនីតិវិធី៕/V-PC
