Home ព័ត៌មានសំខាន់ៗ ព្រឹត្តិការណ៍...

ព្រឹត្តិការណ៍​ជាតិ​សំខាន់ៗ ប្រចាំ​សប្តាហ៍​

ដោយ​: ម៉េង​ឆៃ​/ ភ្នំពេញ​: កាលពី​ថ្ងៃទី​១៤ ខែធ្នូ ជា​ថ្ងៃ​ខួប​លើក​ទី​២៨ នៃ​ការដាក់បញ្ចូល​រមណីយ​ដ្ឋា​ន​អង្គរ ក្នុង​បញ្ជី​បេតិកភណ្ឌ​ពិភពលោក​របស់​អង្គការ​យូណេស្កូ​។ ដើម្បី​អបអរសាទរ​ដល់​ថ្ងៃ​ខួប​ដ៏​មាន​អត្ថន័យ​នេះ កាលពី​ថ្ងៃទី​១៤ ខែធ្នូ ប្រមុខ​រាជរដ្ឋាភិបាល​កម្ពុជា​សម្តេច​តេ​ជោ ហ៊ុន សែន បានប្រកាស​ពី​ការប្តេជ្ញាចិត្ត​មុតមាំ​រប​ស់​កម្ពុជា​ក្នុង​ការបន្ត អភិរក្ស​បេតិកភណ្ឌ​រមណីយដ្ឋាន​អង្គរ​។​សម្តេច​តេ​ជោ​ហ៊ុនសែន​អះអាងថា​បច្ចុប្បន្ន​អង្គរវត្ត​បានក្លាយ​ជា​គោលដៅ​ទេសចរណ៍​លេខ​១​នៅលើ​ពិភពលោក​។​រមណីយដ្ឋាន​អង្គរ​ជា​សម្បត្តិ​បេតិកភណ្ឌ​ដ៏​មានតម្លៃ​របស់​ប្រជាជន​កម្ពុជា​និង​ពិភពលោក​ទាំងមូល ដូច្នេះ​កូន​ខ្មែរ​គ្រប់រូប ត្រូវតែ​បំពេញ​កាតព្វកិច្ច​របស់​ខ្លួន​ថែរក្សា ការពារ សម្បត្តិ​បេតិកភណ្ឌ​វប្បធម៌​មួយ​នេះ​ឲ្យ​បានល្អ និង​គង់វង្ស​។​

​កាលពី​ថ្ងៃទី​១៥ ខែធ្នូ សម្តេច​តេ​ជោ​នាយករដ្ឋមន្ត្រី​កម្ពុជា​បានប្រកាស​ថ្លែង​សារ​ពិសេស ទៅកាន់​ជនរួមជាតិ ពាក់ព័ន្ធ​នឹង​ស្ថានភាព​ជំងឺ​កូ​វីដ​១៩ និង​ដំណើរការ​នៃ​ការបញ្ជាទិញ​វ៉ាក់សាំង​កូ​វីដ​។ សម្តេច​តេ​ជោ បានប្រកាស​ពី​ជោគជ័យ ក្នុងការ​គ្រប់គ្រង​បាន​នូវ​ព្រឹ​ត្ត​ការណ៍​សហគមន៍​២៨​វិច្ឆិកា តែ​មិនទាន់​បិទ​បញ្ចប់​នៅឡើយ​ទេ​។ សម្តេច​តេ​ជោ ហ៊ុន សែន ក៏បាន​ប្រកាស​ពី​ការត្រៀម​ថវិកា ចន្លោះ​ពី ១០០ ទៅ ២០០​លាន​ដុល្លារ ដើម្បី​បញ្ជ​ទិញ​វ៉ាក់សាំង​ប្រឆាំង​ជំងឺ​កូ​វីត​១៩ ដោយ​ប្រើប្រាស់​យន្តការ​កូ​វ៉ា​ក់ ( COVAX ) ផងដែរ​។​

​ក្នុងពេល​ថ្លែង​សារ​ទៅកាន់​ជនរួមជាតិ កាលពី​ថ្ងៃទី​១៥ ខែធ្នូ សម្តេច​តេ​ជោ ហ៊ុន សែន ក៏បាន​ប្រកាស​បន្តដំណើ​រ​ការផ្តល់​សាច់ប្រាក់​ដល់​គ្រួសារ​ក្រីក្រ ក្នុងអំឡុងពេល​ប្រយុទ្ធ​ប្រឆាំងនឹង​ជំងឺ​កូ​វីដ​១៩ នៅ​ជុំ​ទី​៤ រយៈពេល ៣​ខែ​តទៅទៀត ចាប់ពី​ខែមករា ឆ្នាំ​២០២១​។ កម្មវិធី​ផ្តល់​សាច់ប្រាក់ ដែល​ចាប់ផ្តើម​ពី​ខែមិថុនា ឆ្នាំ​២០២០ មកដល់ពេលនេះ រាជរដ្ឋាភិបាល បាន​ចំណាយ ប្រមាណ ១៦៥ លាន​ដុល្លារ​ហើយ​។

​ក្នុងពេល​ថ្លែង​សារ​ទៅកាន់​ជនរួមជាតិ កាលពី​ថ្ងៃទី​១៥ ខែធ្នូ សម្តេច​តេ​ជោ នាយករដ្ឋមន្ត្រី ហ៊ុន សែន ក៏បាន​ប្រកាស សម្រេច​ឲ្យ​សិស្ស​ថ្នាក់​ទី​១២​ជាប់​បាក់​ឌុប​ទាំងអស់គ្នា​ដោយ​មិនចាំបាច់​ប្រឡង​។​សម្តេច​ក៏បាន​ប្រកាស​អនុញ្ញាត​ឲ្យ​សិស្ស​ថ្នាក់​ទី​៩​ដែល​ទើប​ប្រឡង​ឌី​ប្លូ​ម​រួច​កាលពី​ថ្ងៃទី​៣០​វិច្ឆិកា​ក៏​ជាប់​ដោយ​ស្ថាពរ​ដូច​សិស្ស​បាក់​ឌុប​ដែរ​។​នេះ​ដោយសារតែ​បញ្ហា​កូ​វីដ​១៩ ដែល​បន្ត​អូសបន្លាយ ពិសេស​ព្រឹត្តិការណ៍​សហគមន៍ ថ្ងៃ​២៨​វិច្ឆិកា ដែល​មិនទាន់​បិទ​បញ្ចប់​នៅឡើយ​។​

​ស្ថាប័ន​រដ្ឋសភា និង​ក្រសួងមហាផ្ទៃ បានចាប់ផ្ដើម​ការបំពេញ​ការងារ​ជា​ប្រក្រតីភាព​ឡើងវិញ​ហើយ បន្ទាប់ពី​បាន​ផ្អាក និង​ស្ថិតក្រោម​បន្ទាត់​ប្រុងប្រយ័ត្ន​អស់​រយៈពេល​ជាច្រើន​ថ្ងៃ ដោយសារ​ពាក់ព័ន្ធ​នឹង​ព្រឹត្តិការណ៍​សហគមន៍​២៨​វិច្ឆិកា​។ កាលពី​ថ្ងៃទី​១៥ ខែធ្នូ ក្រសួងសុខាភិបាល​បានប្រកាស​រកឃើញ​ករ​ណី​វិជ្ជមាន​ជំងឺ​កូ​វីដ​១៩​ថ្មី ចំនួន ៣​នាក់​ទៀត ក្នុងនោះ ម្នាក់​ពាក់ព័ន្ធ​នឹង​ព្រឹត្តិការណ៍​សហគមន៍​២៨​វិច្ឆិកា​។ យ៉ាងណាក៏ដោយ ក៏មាន​អ្នកពាក់ព័ន្ធ​នឹង​ព្រឹត្តិការណ៍​សហគមន៍ ៣​នាក់​ដែរ បានជា​សះស្បើយ កាលពី​ថ្ងៃទី​១៥ ខែធ្នូ​។

​កាលពី​ថ្ងៃទី​១៦ ខែធ្នូ ក្រសួង​ធនធានទឹក និង​ឧតុនិយម បានប្រកាសថា ចាប់ពី​ថ្ងៃទី​១៦ ខែធ្នូ រហូតដល់​ថ្ងៃទី​២២ ខែធ្នូ ខាងមុខ ប្រទេស​កម្ពុជា ទទួលរង​អាកាសធាតុ​ចុះ​ត្រជាក់ ដែលមាន​សីតុណ្ហភាព ចន្លោះ​ពី ១៧ ឬ​ថ្ងៃ​១៨ អង្សា​សេ​។ ឆ្លើយតប​នឹង​ស្ថានភាព​អាកាសធាតុ​ចុះ​ត្រជាក់​នេះ ក្រសួង​ធនធានទឹក ក៏បាន​អំពាវនាវ​ដល់​សាធារណជន ពិសេស​កងទ័ព​រស់នៅ និង​ឈរជើង​នៅ​តំបន់​ជួរ​ភ្នំ​ដងរែក និង​ខ្ពង់រាប​ឦសាន ត្រូវ​យកចិត្តទុកដាក់ ថែរក្សា​សុខភាព​អំឡុងពេល​ចុះ​ត្រជាក់​នេះ​។​

​ព្រះករុណា​ជា​អ​ម្ចាស់ជីវិតលើត្បូង ព្រះបាទ​សម្ដេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា កាលពី​ព្រឹក​ថ្ងៃទី​១៧ ខែធ្នូ បាន​យាង​ជា​ព្រះរាជាធិបតីភាព​ដ៏​ខ្ពង់​ខ្ពស់បំផុត ក្នុង​ព្រះ​រាជពិធី​សម្ពោធ​អគារ​ពុទ្ធិកវិទ្យាល័យ​ជម្ពូ​វ័ន​សែន​ជ័យ និង​សមិទ្ធផល​នានា នៅ​វត្ត​ជម្ពូ​វ័ន​។ វត្ត​ជម្ពូ​វ័ន ស្ថិតនៅតាម​ផ្លូវជាតិ​លេខ​៤ ក្នុង​សង្កាត់​ចោមចៅ​ទី​៣ ខណ្ឌ​ពោធិ៍​សែន​ជ័យ រាជធានី​ភ្នំពេញ​។

​កាលពី​ថ្ងៃទី​១៥ ខែធ្នូ សម្តេច​តេ​ជោ ហ៊ុន សែន បាន​ផ្ញើ​សារលិខិត អបអរសាទរ​លោក ចូ បៃ​ដិ​ន ជា​ប្រធានាធិបតី​ជាប់ឆ្នោត​ថ្មី​របស់​សហរដ្ឋអាមេរិក​។ ក្នុង​សារលិខិត សម្តេច​តេ​ជោ ហ៊ុន សែន បាន​បញ្ជាក់ថា តាងនាម​ឱ្យ​រាជរដ្ឋាភិបាល និង​ប្រជាជន​កម្ពុជា សម្តេច​មាន​កិត្តិយស​ដ៏​ធំធេង និង​សេចក្ដីសោមនស្ស​រីករាយ​ឥតឧបមា សូម​សម្ដែង​នូវ​អំណរ​សាទរ​ជូន​ចំពោះ​ឯកឧត្តម ដែល​បាន​ជាប់ឆ្នោត​ជា​ប្រវត្តិសាស្ត្រ ជា​ប្រធានាធិបតី​សហរដ្ឋអាមេរិក​ទី ៤៦​។ តាម​សម្តេច​តេ​ជោ បទពិសោធ​ជាច្រើន រួម​នឹង​ភាពជា​អ្នកដឹកនាំ​ដ៏​វៀងវៃ​របស់​ឯកឧត្តម គឺជា​កត្តា​សត្យានុម័ត ក្នុងការ​ទទួលបាន​នូវ​ទំនុកចិត្ត​ពី​ប្រជាជន​អាមេរិក​។ សម្តេច​មាន​ជំនឿ​យ៉ាង​មុតមាំ​ថា «​ក្រោម​ការដឹកនាំ​របស់​ឯកឧត្តម សហរដ្ឋអាមេរិក នឹង​បន្ត​រីកចម្រើន​ទៅមុខ និង​រួមចំណែក​នាំឱ្យ​ពិភពលោក មាន​សេរីភាព និង​វិបុលភាព​កាន់តែ​ល្អប្រសើរ​ថែមទៀត​»​។​

​សម្ដេច តេ​ជោ ហ៊ុន សែន នាយករដ្ឋមន្ត្រី​នៃ ព្រះរាជាណាចក្រ​កម្ពុជា បាន​ផ្ញើ​សារលិខិត ទៅកាន់​វេទិកា​និពន្ធ​នាយក​សារព័ត៌មាន​កម្ពុ​ជា ដែល​រៀបចំឡើង​ដោយ​ក្លិប​អ្នកកាសែត​កម្ពុជា នៅ​ថ្ងៃទី​១៩ ខែធ្នូ​នេះ​។ សម្តេច បានស្នើ​អោយ​អ្នកសារព័ត៌មាន​ទាំងអស់ ចូលរួម​ប្រយុទ្ធ​ប្រឆាំងនឹង​ជំងឺ​កូ​វីដ​-១៩ តាមរយៈ​ការផ្សព្វផ្សាយ​ព័ត៌មាន​អប់រំ និង​វិធានការ​សុវត្ថិភាព​របស់​ក្រសួងសុខាភិបាល ជូន​ប្រជាពលរដ្ឋ​ឲ្យ​បាន​យល់ដឹង​ច្បាស់ ដើម្បី​រួមគ្នា​ប្រឆាំង ទប់ស្កាត់ និង​លុបបំបាត់​ការឆ្លង​រីក​រាលដាល​នៃ​ជំងឺ​កូ​វីដ​-១៩ ដែល​កំពុង​ឆ្លង​ចូល​សហគមន៍​កម្ពុជា​។

​នៅពេល​អង់គ្លេស ចេញពី​សហភាព​អឺរ៉ុប​ជា​ផ្លូវការ​ហើយ​នោះ ប្រទេសមួយ​នេះ នឹងមិន​អនុវត្ត​ការដក​ប្រព័ន្ធ​អនុគ្រោះ​ពន្ធ «​អ្វីៗ​គ្រប់​មុខទំនិញ​លើកលែងតែ​សព្វាវុធ EBA» ពី​កម្ពុជា​ឡើយ​។ នេះ​បើតាម​ការបញ្ជាក់​ពី​លោកស្រី Tina Redshaw ឯកអគ្គរាជទូត​អង់គ្លេស ប្រចាំ​កម្ពុជា ក្នុងជំនួប​ជាមួយ​ឧបនាយករដ្ឋមន្ត្រី រដ្ឋមន្ត្រី​ក្រសួងការបរទេស​កម្ពុជា លោក ប្រាក់ សុខុន​។

​កាលពី​ព្រឹក​ថ្ងៃទី​១៩ ខែធ្នូ ក្រសួងសុខាភិបាល បានប្រកាសថា មាន​អ្នកជំងឺ​កូ​វីដ​១៩ ចំនួន ៤​នាក់​ទៀត បានជា​សះស្បើយ​។ ក្នុងនោះ មាន ២​នាក់ ជា​អ្នកពាក់ព័ន្ធ​នឹង​ព្រឹត្តិការណ៍​សហគមន៍​២៨​វិច្ឆិកា​។ រីឯ​អ្នកជា​សះស្បើយ ២​នាក់​ទៀត ជា​អ្នកធ្វើដំណើរ​មកពី​ប្រទេស​ជប៉ុន និង​ម៉ាលី​។ កាលពី​ថ្ងៃទី​១៨ ខែធ្នូ មិនមាន​អ្នក​ឆ្លង​ថ្មី​ទេ​។​

​គិតពី​ថ្ងៃទី​២៨​វិច្ឆិកា មកដល់​ថ្ងៃទី​១៩ ខែធ្នូ​នេះ ព្រឹត្តិការណ៍​ឆ្លង​សហគមន៍​២៨​វិច្ឆិកា មាន​អ្នក​ឆ្លង​សរុប ៤១​នាក់​។ ក្នុងនោះ ក៏មាន​អ្នកជា​សះស្បើយ កើនឡើង​ដល់ ៣០​នាក់​ហើយ គិត​ត្រឹម​ថ្ងៃទី​១៩ ខែធ្នូ​នេះ​។​

​ដោយឡែក នៅ​ទូទាំងប្រទេស គិត​ត្រឹម​ម៉ោង ៧​ព្រឹក ថ្ងៃទី​១៩ ខែធ្នូ ក្រសួងសុខាភិបាល រកឃើញ​អ្នក​ឆ្លង​ជំងឺ​កូ​វីដ​១៩ សរុប​ចំនួន ៣៦២​នាក់​។ ក្នុងនោះ ៣៤៥​នាក់ ត្រូវបាន​ព្យាបាល​ជាសះស្បើយ និង ១៧​នាក់ កំពុង​សម្រាក​ព្យាបាល នៅ​មន្ទីរពេទ្យ​៕​សរន

ទីតាំងផ្សាយពាណិជ្ជកម្ម

- Advertisment -



Most Popular