Home ព័ត៌មានសំខាន់ៗ កម្ពុជា នៅតែ​...

កម្ពុជា នៅតែ​បន្ត​ឈ្នះ​លើ​សមរភូមិ​កូ​វីដ​!

​ដោយ​៖ ម៉េង​ឆៃ​/ ភ្នំពេញ​: កាលពី​ព្រឹក​ព្រលឹម​ថ្ងៃទី​១៩ ខែធ្នូ ក្រសួងសុខាភិបាល បានប្រកាសថា មាន​អ្នកជំងឺ​កូ​វីដ​១៩ ចំនួន ៤​នាក់​ទៀត បានជា​សះស្បើយ​។ ក្នុងនោះ មាន ២​នាក់ ជា​អ្នកពាក់ព័ន្ធ​នឹង​ព្រឹត្តិការណ៍​សហគមន៍​២៨​វិច្ឆិកា​។ រីឯ​អ្នកជា​សះស្បើយ ២​នាក់​ទៀត ជា​អ្នកធ្វើដំណើរ​មកពី​ប្រទេស​ជប៉ុន និង​ម៉ាលី​។ កាលពី​ថ្ងៃទី​១៨ ខែធ្នូ មិនមាន​អ្នក​ឆ្លង​ថ្មី​ទេ​។​

​កម្ពុជា​មិនមាន​អ្នក​ឆ្លង​ជំងឺ​កូ​វីដ​១៩​ថ្មី គឺ​ចាប់តាំងពី​ថ្ងៃទី​១៥ ខែធ្នូ​។ ផ្ទុយទៅវិញ កម្ពុជា​យើង មាន​អ្នកជា​សះស្បើយ​ជា​បន្តបន្ទាប់​។ ក្នុងនោះ គិតពី​ថ្ងៃទី​២៨​វិច្ឆិកា មកដល់​ថ្ងៃទី​១៩ ខែធ្នូ​នេះ ព្រឹត្តិការណ៍​ឆ្លង​សហគមន៍​២៨​វិច្ឆិកា មាន​អ្នក​ឆ្លង​សរុប ៤១​នាក់​។ ក្នុងនោះ ក៏មាន​អ្នកជា​សះស្បើយ កើនឡើង​ដល់ ៣០​នាក់​ហើយ គិត​ត្រឹម​ថ្ងៃទី​១៩ ខែធ្នូ​នេះ​។​

​ដោយឡែក នៅ​ទូទាំងប្រទេស គិត​ត្រឹម​ម៉ោង ៧​ព្រឹក ថ្ងៃទី​១៩ ខែធ្នូ ក្រសួងសុខាភិបាល រកឃើញ​អ្នក​ឆ្លង​ជំងឺ​កូ​វីដ​១៩ សរុប​ចំនួន ៣៦២​នាក់​។ ក្នុងនោះ ៣៤៥​នាក់ ត្រូវបាន​ព្យាបាល​ជាសះស្បើយ និង ១៧​នាក់ កំពុង​សម្រាក​ព្យាបាល នៅ​មន្ទីរពេទ្យ​។​

​ព្រឹត្តិការណ៍​ឆ្លង​សហគមន៍​ថ្ងៃទី​២៨ ខែវិច្ឆិកា មាន​អ្នក​ប៉ះពាល់ ដែល​បានធ្វើ​តេស្ត រក​មេរោគ​កូ​វីដ​១៩ សរុប​ចំនួន​ជាង ១៨០០០​នាក់ នៅ​ភ្នំពេញ និង​នៅតាម​បណ្តា​ខេត្ត​ជាច្រើន​ទៀត​។ ក៏ប៉ុន្តែ​ការធ្វើ​តេស្ត ៣​លើក និង​ការធ្វើ​ច​ត្តា​ឡី​ស័ក ទ្រង់ទ្រាយ​ធំ លើក​ទី​១ បាន​បិទ​បញ្ចប់ កាលពី​ថ្ងៃទី​១២-១៣ ខែធ្នូ ។ ចំណែក​ការធ្វើ​តេស្ត និង​ការធ្វើ​ច​ត្តា​ឡី​ស័ក ក្រុមទី​២ ក៏បាន​បញ្ចប់​កាលពី​ថ្ងៃទី​១៨ ខែធ្នូ ដោយ​ក្រសួងសុខាភិបាល ប្រកាសថា មាន​អ្នក​ធ្វើតេស្ត សរុប​ប្រមាណ ៣៥០០​នាក់ ហើយ​លទ្ធផល ដែល​បាន​វិភាគ​ដោយ​វិទ្យាស្ថាន​ប៉ាស្ទ័រ​កម្ពុជា ជិត ៣០០០ សំណាក កាលពី​ថ្ងៃទី​១៨ ខែធ្នូ គឺមាន​លទ្ធផល​អវិជ្ជមាន​វីរុស​កូ​វីដ​១៩ ទាំងអស់​។ នៅសល់​សំណាក ៥៣០​សំណាក​ទៀត ត្រូវធ្វើ​វិភាគ​បន្ត នៅ​ថ្ងៃទី​១៩ ខែធ្នូ​នេះ​។​

​បើ​មើ​លពី​ស្ថានភាព​ជំងឺ​កូ​វីដ​១៩ ពិសេស​ក្នុង​ព្រឹត្តិការណ៍​សហគមន៍​២៨​វិច្ឆិកា ដែល​រាជរដ្ឋាភិបាល គ្រប់គ្រង​បាន​ហើយ ចាប់តាំងពី​ថ្ងៃទី​១៥ ខែធ្នូ ហើយ​បើទោះបីជា​មិនទាន់​បញ្ចប់​ទាំងស្រុង​ពិតមែន តែ​ក៏​មិនមាន​ឆ្លង​រាលដាល​តទៅទៀត​ឡើយ​។​

​ឆ្លងកាត់​ការធ្វើ​តេស្ត និង​ធ្វើ​ច​ត្តា​ឡី​ស័ក ដែល​បាន​បិទ​បញ្ចប់ ក្នុង​ទ្រង់ទ្រាយ​ធំ ចំនួន ២​លើក គឺ​នៅ​ថ្ងៃទី​១២-១៣ ខែធ្នូ និង​នៅ​ថ្ងៃទី​១៨ ខែធ្នូ​នេះ ច្បាស់​ណាស់​ថា ព្រឹត្តិការណ៍​ឆ្លង​សហគមន៍​២៨​វិច្ឆិកា គឺ​ស្ទើរតែ​បញ្ចប់​ការឆ្លង​រាលដាល​ទាំងស្រុង​ហើយ​។​

​ការបន្ត​ទទួលបាន​ជោគជ័យ​លើ​សមរភូមិ​កូ​វីដ​១៩ នៅ​កម្ពុជា រាប់ទាំង​ព្រឹត្តិការណ៍​សហគមន៍​២៨​វិច្ឆិកា នៅ​លើក​នេះ គឺ​យ៉ាងហោចណាស់ ៦​លើក​ធំៗ​ហើយ ដែល​កម្ពុជា ក្រោម​ការដឹកនាំ​របស់​សម្តេច​តេ​ជោ ហ៊ុន សែន បាន​យកឈ្នះ​ជា​បន្តបន្ទាប់ លើ​សមរភូមិ ប្រឆាំង​កូ​វីដ​១៩​។​

​លើក​ទី​១-​ក្រោយ​កម្ពុជា រកឃើញ​អ្នក​កើត​ជំងឺ​កូ​វីដ​១៩ ដំបូង កាលពី​ថ្ងៃទី​២៧ ខែមករា ឆ្នាំ​២០២០ លើ​បុរស​ជនជាតិ​ចិន មកពី​ទីក្រុង​វ៉ូ​ហាន ដែលជា​កន្លែង​ផ្ទុះ​ជំងឺ​កូ​វីដ​១៩ ដំបូង​គេ រួចមក គឺ​នៅ​ថ្ងៃទី​០៤ ខែកុម្ភៈ ឆ្នាំ​២០២០ សម្តេច​តេ​ជោ នាយករដ្ឋមន្ត្រី ហ៊ុន សែន បាន​ដឹកនាំ​គណៈប្រតិភូ​ជាន់ខ្ពស់​កម្ពុជា រួមទាំង​កូនប្រុស​ច្បង​របស់​សម្តេច គឺ​លោក ហ៊ុន ម៉ា​ណែ​ត ធ្វើដំណើរ​តាម​យន្តហោះ ទៅកាន់​ទីក្រុង​ប៉េកាំង ប្រទេស​ចិន ដើម្បី​ជួប​មេដឹកនាំ​ចិន ពិសេស​ជួប​លោក​ប្រធានាធិបតី​ចិន ស៊ី ជី​ង​ភីង​។​
​ក្នុង​ដំណើរ​ទស្សនកិច្ច​របស់​សម្តេច​តេ​ជោ ហ៊ុន សែន ទៅកាន់​ប្រទេស​ចិន ដែល​កាលណោះ ចិន​កំពុង​រីក​រាលដាល​ជំងឺ​កូ​វីដ​១៩ យ៉ាងខ្លាំង​នោះ គឺ​សម្តេច​តេ​ជោ ហ៊ុន សែន ជា​មេដឹកនាំ​បរទេស ដំបូង​គេ ដែល​បាន​ទៅ​ជាន់​ទឹកដី​ចិន តាំងពី​មានការ​ប្រកាស​វិធានការ​អាសន្ន ទប់ទល់​នឹង​ការ​ផ្ទុះឡើង​នៃ​វីរុស​កូ​រ៉ូ​ណា នៅក្នុង​ប្រទេស​ចិន ដែល​បានចាប់ផ្ដើម​ផ្ទុះឡើង​ដំបូង នៅក្នុង​ចុងខែ​ធ្នូ ឆ្នាំ​២០១៩ នៅ​ទីក្រុង​វូ​ហាន នៃ​ខេត្ត​ហូ​ប៉ី​។
​លើក​ទី​២-​គេ​នៅ​ចាំបាន​ថា សម្តេច​តេ​ជោ នាយករដ្ឋមន្ត្រី ហ៊ុន សែន បាន​យកឈ្នះ​លើ​សង្គ្រាម​ប្រឆាំង​កូ​វីដ​ជាថ្មីទៀត ដោយ​ប្រើ​បេះដូង​មនុស្សធម៌ និង​សប្បុរសធម៌ តាមរយៈ​ការជួយ​សង្គ្រោះ​ដល់​អ្នកទេសចរ​ចម្រុះ​ជាតិ​សាសន៍​ជាង ២០០០​នាក់ នៅលើ​នាវា​ទេសចរណ៍​របស់​សហរ​ដ្ឋ​អាមេរិក ឈ្មោះ វ៉េ​ស​ស្ទើ​ដាំ (Westerdam)​។ គឺ​នៅ​ថ្ងៃទី​១៤ ខែកុម្ភៈ ឆ្នាំ​២០២០ កម្ពុជា បានអនុញ្ញាត​ឲ្យ​នាវា​ទេសចរណ៍​នេះ ចូល​ចត​នៅ​កំពង់ផែ​ក្រុងព្រះសីហនុ ខណៈ​ប្រទេស​ចំនួន​៦ រួមមាន​៖ ប្រទេស ជប៉ុន កូរ៉េខាងត្បូង ហ្វីលីពីន តៃវ៉ាន់ និង​ហ្គា​ម (Guam) បាន​បដិសេធ មិនឱ្យ​កប៉ាល់​នេះ ចូល​ចត ដោយ​បារម្ភ​ខ្លាច​ឆ្លង​ជំងឺ​COVID-19​។​

​មិន​ត្រឹមតែ​អនុញ្ញាត​ឲ្យ​នាវា​ទេសចរណ៍​អាមេរិក វ៉េ​ស​ស្ទើ​ដាំ ចូល​ចត​នៅ​កំពង់ផែ​ប៉ុណ្ណោះ​ទេ គឺ​សម្តេច​តេ​ជោ ហ៊ុន សែន បាន​អញ្ជើញ​ទៅ​ទទួល​ស្វាគមន៍​ដោយផ្ទាល់ និង​ចាប់ដៃ ព្រមទាំង​ជូន​បាច់ផ្កា ដល់​ក្រុម​អ្នកទេសចរ​ចម្រុះ​ជាតិ​សាសន៍ នៅពេល​ចុះ​ពី​នាវា​ទេសចរណ៍ ដើម្បី​បន្តដំណើរ​កម្សាន្ត​នៅ​កម្ពុជា និង​ឡើង​យន្តហោះ វិលត្រឡប់ ទៅកាន់​ប្រទេស​កំណើត​វិញ ថែម​ទៀតផង​។​

​ជ័យជម្នះ​លើក​ទី​៣ របស់​កម្ពុជា លើ​សង្គ្រាម​កូ​វីដ គឺ​អំឡុង​ដើមខែ​មីនា ឆ្នាំ​២០២០ មាន​ខ្មែរឥស្លាម​ជាច្រើន​នាក់ បាន​ឆ្លង​ជំងឺ​កូ​វីដ​១៩ បន្ទាប់ពី​ខ្មែរឥស្លាម​ជាច្រើន​នាក់ នៅ​កម្ពុជា​ទាំងនោះ បាន​ទៅ​ចូលរួម​ក្នុង​ពិធី​សាសនា នៅ​ជិត​ទីក្រុង​កូ​ឡា​ឡាំ​ពួរ ប្រទេស​ម៉ាឡេស៊ី កាលពី​ថ្ងៃទី​៣ ខែមីនា ឆ្នាំ​២០២០​។ ក្នុង​ពិធី​នោះ មាន​អ្នកចូលរួម​ឆ្លង​វីរុស​កូ​វីដ​១៩ យ៉ាងច្រើន​។ ក៏ប៉ុន្តែ​កាលណោះ រាជរដ្ឋាភិបាល​កម្ពុជា បាន​ចាត់វិធានការ​ភ្លាមៗ ស្រាវជ្រាវ​រក​អ្នក​ឆ្លង​ជំងឺ​កូ​វីដ​១៩ និង​យក​អ្នកពាក់ព័ន្ធ ដែលជា​បងប្អូន​ខ្មែរឥស្លាម យកទៅ​សម្រាក​ព្យាបាល និង​ធ្វើ​ច​ត្តា​ឡី​ស័ក​។ កម្ពុជា ក៏​មិនមាន​ឆ្លង​រាលដាល​នៅក្នុង​សហគមន៍​ឡើយ អំឡុង​ខែមីនា​នោះ​។​

 

​លើក​ទី​៤-​ផុតពី​ករណី​ខ្មែរឥស្លាម​ឆ្លង​ជំងឺ​កូ​វីដ​១៩ នៅក្នុង​អំឡុងពេល​ចូលឆ្នាំថ្មី ប្រពៃណី​ជាតិខ្មែរ នៅ​ខែមេសា ទោះបីជា​រាជរដ្ឋាភិបាល បិទ​ប្រទេស បិទ​ការធ្វើដំណើរ​ពី​រាជធានី​ខេត្ត និង​លប់ចោល មិន​ឲ្យ​ឈប់សម្រាក​ពេល​បុណ្យចូលឆ្នាំ ក៏ប៉ុន្តែ​ក៏​កើតមាន​ករណី​បងប្អូន​ខ្មែរ​យើង ដែលជា​ពលករ ធ្វើការ​នៅ​ប្រទេស​ថៃ បាន​សម្រុក​វិលត្រឡប់ មកលេង​ស្រុកកំណើត​វិញ ក្នុងពេល​ចូលឆ្នាំ​។​

​ហេតុការណ៍​កាលណោះ ក៏​កើតមាន​ការព្រួយបារម្ភ​ពី​ការឆ្លង​រាលដាល​ជំងឺ​កូ​វីដ​១៩ នៅតាម​ស្រុកភូមិ​យើង​ផងដែរ​។ ប៉ុន្តែ​ដោយសារ​ការយកចិត្តទុកដាក់​គ្រប់គ្រង​ត្រួតពិនិត្យ​ក្រុម​ចំណូល​ថ្មី​រាប់ម៉ឺន​នាក់​នេះ និង​ធ្វើ​ច​ត្តា​ឡី​ស័ក នៅតាម​ភូមិ​ផង ក៏​មិនមាន​ការឆ្លង​រាលដាល​ជំងឺ​កូ​វីដ នៅ​សហគមន៍ ក្នុងអំឡុងពេល​បុណ្យចូលឆ្នាំ​ឡើយ​។​

​ដោយឡែក នៅ​លើក​ទី​៥ គឺជា​ការប្រយុទ្ធ​នឹង​ជំងឺ​កូ​វីដ​១៩ តាមរយៈ​ព្រឹត្តិការណ៍ ថ្ងៃ​៣​វិច្ឆិកា​។ នោះ​គឺ​រដ្ឋមន្ត្រីការបរទេស និង​ពាណិជ្ជកម្ម ហុង​គ្រី បានមក​បំពេញ​ទស្សនកិច្ច​ផ្លូវការ និង​ជួប​មេដឹកនាំ​កំពូលៗ​របស់​កម្ពុជា កាលពី​ថ្ងៃទី​៣ ខែវិច្ឆិកា ឆ្នាំ​២០២០​។ នៅពេល​វិលត្រឡប់​ចេញពី​កម្ពុជា ទៅដល់​ប្រទេស​ថៃ ទើប​រកឃើញថា រដ្ឋមន្ត្រីការបរទេស និង​ពាណិជ្ជកម្ម ហុង​គ្រី ផ្ទុក​ជំងឺ​កូ​វីដ​១៩​។​

​ព្រឹត្តិការណ៍​ថ្ងៃ​៣​វិច្ឆិកា​នេះ កម្ពុជា​រកឃើញ​អ្នក​ប៉ះពាល់​សរុប​ជាង ១៧០០​នាក់ មាន​ទាំង​សម្តេច​តេ​ជោ ហ៊ុន សែន និង​មន្ត្រីជាន់ខ្ពស់​រាជរដ្ឋាភិបាល ហើយ​បានធ្វើ​តេស្តរ​កវី​រុស​កូ​វីដ​១៩ និង​បានធ្វើ​ច​ត្តា​ឡី​ស័ក រយៈពេល ១៤​ថ្ងៃ​។ ជា​លទ្ធផល មានតែ ៤​នាក់​ប៉ុណ្ណោះ ដែល​ឆ្លង​ជំងឺ​កូ​វីដ​១៩​។ កម្ពុជា ក៏បាន​ទប់ស្កាត់​ទាន់ពេលវេលា​បានដែរ​។​

​លើក​ទី​៦ នៅពេលនេះ​ទៀត គឺ​ព្រឹត្តិការណ៍​សហគមន៍​២៨​វិច្ឆិកា ដែលជា​ការឆ្លង​ជំងឺ​កូ​វីដ​១៩ តៗ​គ្នា ដែល​រកឃើញ​ដំបូង​ក្នុងចំណោម​ក្រុមគ្រួសារ​របស់លោក ឆែម សាវុធ អគ្គនាយក​ពន្ធនាគារ​របស់​ក្រសួងមហាផ្ទៃ​។ លើក​នេះ ធ្ងន់ធ្ងរ​ជាង​ព្រឹត្តិការណ៍​៣​វិច្ឆិកា និង​ធ្ងន់​ជាង​លើក​ណាៗ​ទាំងអស់​។ មនុស្ស​ជាង ១៨០០០ នាក់ ត្រូវបាន​ធ្វើតេស្ត និង​ធ្វើ​ច​ត្តា​ឡី​ស័ក ដែល​ក្រុមទី​១ បានបញ្ចប់ កាលពី​ថ្ងៃទី​១២-១៣ ខែធ្នូ ហើយ​ក្រុមទី​២ មាន​អ្នក​ប៉ះពាល់​ជាង ៣៥០០​នាក់ ក៏បាន​ធ្វើតេស្ត ៣​លើក និង​បញ្ចប់​ការធ្វើ​ច​ត្តា​ឡី​ស័ក កាលពី​ថ្ងៃទី​១៨ ខែធ្នូ​។ ជា​លទ្ធផល ព្រឹត្តិការណ៍​ឆ្លង​សហគមន៍​២៨​វិច្ឆិកា គឺ​ចាប់ពី​ថ្ងៃទី​២៨​វិច្ឆិកា មកដល់​ថ្ងៃទី​១៩ ខែធ្នូ​នេះ គឺមាន​មនុស្ស ៤១​នាក់ បាន​ឆ្លង​ជំងឺ​កូ​វីដ​១៩​។ តែ​ក៏មាន​អ្នកជា​សះស្បើយ ជា​បន្តបន្ទាប់ ដែល​មកដល់​ថ្ងៃទី​១៩ ខែធ្នូ មាន​អ្នកពាក់ព័ន្ធ​ព្រឹត្តិការណ៍​សហគមន៍ ២៨​វិច្ឆិកា បានជា​សះស្បើយ ៣០​នាក់​ហើយ​។​

​ស្របពេល​ដែល​អាច​គ្រប់​គ្រង​បាន​លើ​ព្រឹត្តិការណ៍​ឆ្លង​សហគមន៍​២៨​វិច្ឆិកា គឺ​រាជរដ្ឋាភិបាល កាលពី​ថ្ងៃទី​១៥ ខែធ្នូ ក៏បាន​ប្រកាស​ពី​គម្រោង​ទិញ​វ៉ាក់សាំង​ប្រឆាំង​កូ​វីដ​១៩ ដើម្បី​ចាក់​ជូន​ប្រជាជន​កម្ពុជា ដោយ​ឥតគិតថ្លៃ ចំនួន ១៣​លាន​នាក់​។ តែ​ក្នុង​ជំ​ហ៊ាន​ដំបូង​នេះ កម្ពុជា​នឹង​ទិញ ១​លាន​ដូ​ស ដើម្បី​ចាក់​ជូន​អ្នកធ្វើការ​នៅ​កន្លែង​មាន​ហានិភ័យ និង​អ្នកមាន​ហានិភ័យ ៥០​ម៉ឺន​នាក់​សិន​។

​ក៏ប៉ុន្តែ​យ៉ាងណាក៏ដោយ បើទោះបីជា​កម្ពុជា ក្រោម​ការដឹកនាំ​របស់​សម្តេច​តេ​ជោ ហ៊ុន សែន បាន​ចាត់វិធានការ​ទាន់ពេល​វេលា ហើយ​ទទួលបាន​ជោគជ័យ​ជា​បន្តបន្ទាប់​លើ​សមរភូមិ​កូ​វីដ យ៉ាងណាក៏ដោយ ក៏​រាជរដ្ឋាភិបាល មិនបាន​បន្ធូរដៃ​ឡើយ ហើយ​រឹតតែ​ត្រូវ​យកចិត្តទុកដាក់​ថែមទៀត​នោះ គឺ​ប្រជាពលរដ្ឋ​យើង​គ្រប់រូប មិន​ថា ចាស់ មិន​ថា​ក្មេង​ឡើយ​។​

​ការបន្ត​អនុវត្តន៍​វិធានការ​សុខាភិបាល នៅតែ​ជាការ​ចាំបាច់ និង​មិនអាច​ខ្វះ​បាន ដើម្បី​ការពារ កុំ​ឲ្យ​ឆ្លង​កូ​វីដ​១៩ នៅក្នុង​ប្រទេស​កម្ពុជា ពិសេស​ការឆ្លង​ចូល​សហគមន៍​ទ្រង់ទ្រាយ​ធំ​។ នោះ​គឺ​វិធានការ​អនាម័យ ស្អាត​ជានិច្ច រួមទាំង​ការពាក់​ម៉ាស់ លាងដៃ និង​រក្សា​គម្លាត​សុវត្ថិភាព​សង្គម និង​គម្លាត​សុវត្ថិភាព​បុគ្គល​ឲ្យ​លើសពី ១​ម៉ែត្រ​កន្លះ​។​

​ក្រៅពីនោះ ប្រជាពលរដ្ឋ​យើង​ម្នាក់ៗ ក៏ត្រូវ​បន្ត​អនុវត្ត​វិធានការ ៣​កុំ គឺ​ទី​១-​កុំ​ចូលទៅ​កន្លែង​បិទ​ជិត ដែល​គ្មាន​ខ្យល់​ចេញចូល និង​ប្រើ​ម៉ាស៊ីនត្រជាក់​ច្រើនពេក ទី​២-​កុំទៅ​កន្លែង​មនុស្ស​ច្រើន​កុះករ និង​ទី​៣-​កុំ​ប៉ះពាល់​គ្នា កុំ​ចាប់ដៃគ្នា ជាដើម​។

​សូម​ចងចាំ​ថា យើង​អាច​ភ្លេច​កូ​វីដ តែ​កូ​វីដ មិន​ភ្លេច​យើង​ទេ ហើយ​កូ​វីដ អាច​ឆ្លង​បាន​គ្រប់គ្នា គ្រប់ពេលវេលា គ្រប់​កាលៈទេសៈ និង​គ្រប់​ទីកន្លែង​៕srn​

ទីតាំងផ្សាយពាណិជ្ជកម្ម

- Advertisment -



Most Popular