Home ព័ត៌មានសំខាន់ៗ ប្រទេស​សហភាព​...

ប្រទេស​សហភាព​អឺរ៉ុប​ច្រើន​ឡើង​នាំគ្នា​ហាមឃាត់​ជើងហោះហើរ​ពី​អង់គ្លេស ព្រោះ​វីរុស​កូរ៉ូ​ណា​ប្រែ​រូបរាង​ថ្មី​កំពុង​ឆ្លង​ខ្លាំង​ទប់​លែង​ជាប់​

​ប្រែ​សម្រួល : កញ្ញា​ដា​លី​ស ៖​បណ្តា​ប្រទេស​សហភាព​អឺរ៉ុប​ច្រើនឡើង​បាន​រារាំង​ការធ្វើដំណើរ​ពី​ចក្រភព​អង់គ្លេស​កាលពី​ថ្ងៃអាទិត្យ​និង​ប្រទេស​ផ្សេង​ទៀត​កំពុង​ពិចារណា​លើ​សកម្មភាព​ស្រដៀង​គ្នា​​នេះ​ក្នុង​គោលបំណង​ទប់ស្កាត់​ដាន​វីរុស​កូរ៉ូណា​ទើប្រែ​រូបរាង​ថ្មី​ដែល​កំពុង​ឆ្លង​រាលដាល​ពាសពេញ​ភាគ​ខាងត្បូង​ប្រទេស​អង់គ្លេស​កុំឱ្យ​រីក​រាលដាល​ពេញ​ទ្វីបអឺរ៉ុប​។​

​បារាំង អាឡឺម៉ង់ អ៊ីតាលី ហូ​ឡង់ បែលហ្ស៊ិក អូទ្រីស អៀរ​ឡង់​និង​ប៊ុលហ្គារី​សុទ្ធតែ​បាន​ប្រកាស​ពី​ការ​រឹតត្បិត​លើ​ការធ្វើដំណើរ​ពី​ចក្រភព​អង់គ្លេស ពោលគឺ​ប៉ុន្មាន​ម៉ោង​បន្ទាប់ពី​នាយករដ្ឋមន្ត្រី​អង់គ្លេស​លោក បូរី​ស ច​ន​សុន បានប្រកាសថា ការទិញ​ទំនិញ​បុណ្យ​ណូអែល​និង​ការជួបជុំ​នៅ​ភាគខាងត្បូង​ប្រទេស​អង់គ្លេស​ត្រូវតែ​លុបចោល​ដោយសារតែ​ការឆ្លង​រាលដាល​យ៉ាង​ឆាប់រហ័ស​នៃ​វីរុស​ត្រូវបាន​ស្តីបន្ទោស​​ទៅលើ​វ៉ា​រ្យ៉ង់​វីរុស​កូរ៉ូណា​ថ្មី​។​

​ភ្លាមៗ​នោះ​លោក​ច​ន​សុន​បាន​ដាក់​តំបន់​ទាំងនោះ​នៅ​ក្រោម​ការព្រមាន​កាំ​ទី​៤​ថ្មី​យ៉ាង​តឹងរ៉ឹង​ដោយ​ឃាត់ឃាំង​រាល់​ការចំណាយ​ពេល​សប្បាយ​បុណ្យ​ណូអែល​នៅតាម​ទី​សាធារណៈ​សម្រាប់​មនុស្ស​រាប់លាន​​នាក់​។​

​បារាំង​បាន​ហាមឃាត់​រាល់​ការ​ធ្វើ​ដំណើរ​ពី​ចក្រភព​អង់គ្លេស​ក្នុង​រយៈពេល ៤៨​ម៉ោង​ចាប់ពី​ពាក់កណ្តាល​អធ្រាត្រ​ថ្ងៃ​អាទិត្យ​រួម​ទាំង​រថយន្ត​ដឹកទំនិញ​ឆ្លងកាត់​ផ្លូវ​រូង​ក្រោម​ដី​នៅ​ចក្រ​សមុទ្រ​អង់គ្លេស​​ឬ​ពី​កំពង់ផែ​ក្រុង​ដូ​វើ​នៅ​ឆ្នេរសមុទ្រ​ភាគខាងត្បូង​អង់គ្លេស​។ ក្រុមមន្ត្រី​បារាំង​និយាយថា ការផ្អាក​នេះ​នឹង​ជួយ​ផ្តល់​ពេលវេលា​ដើម្បី​ស្វែងរក “​គោលការណ៍​ណែនាំ​រួម​” ស្តីពី​វិធី​ដោះស្រាយ​ការគំរាមកំហែង ប៉ុន្តែ​វា​បានធ្វើឱ្យ​ផ្លូវ​ឆ្លងកាត់​ដ៏​មមាញឹក ដែល​ប្រើ​ដោយ​រថយន្ត​ដឹកទំនិញ​រាប់ពាន់​គ្រឿងក្នុង​មួយថ្ងៃ មាន​ភាពច្របូកច្របល់​។​

​អាជ្ញាធរ​កំពង់ផែ​ក្រុង​ដូ​វើ​បាន​សរសេ​រលើ Twitter កាលពី​យប់​ថ្ងៃអាទិត្យ​ថា កំពង់ផែ​សាឡាង​របស់​ខ្លួន​ត្រូវបាន​”​បិទ​ចរាចរណ៍​ទាំងអស់​ដែល​ចាកចេញ​ពី​ចក្រភព​អង់គ្លេស​រហូតដល់​មាន​ការជូន​​ដំណឹង​បន្ថែមទៀត​ដោយសារតែ​ការ​រឹតត្បិត​ព្រំដែន​នៅ​បារាំង​”​។​

​រថភ្លើង​ដឹក​អ្នកដំណើរ​របស់​ក្រុមហ៊ុន Eurostar ពី​ទីក្រុង​ឡុង​ដ៍​ទៅ​ទីក្រុង​ប៉ារីស ទីក្រុង​ព្រុច​សែ​ល និង ទីក្រុង​អាំ​ស្ទែ​ដាំ ក៏​ត្រូវបាន​បញ្ឈប់​ផងដែរ​។​

​លោក​ផា​ទ្រី​ក វ៉ា​ឡង់ ប្រធាន​ទីប្រឹក្សា​វិទ្យាសាស្ត្រ​របស់​រដ្ឋាភិបាល​អង់គ្លេស និយាយថា ក្រុមមន្ត្រី​បារម្ភ​អំពី​វ៉ា​រ្យ៉ង់​ថ្មី​នេះ ព្រោះ​វា​ផ្ទុក​នូវ​ការប្រែប្រួល​ចំនួន ២៣ “​ដែល​ជា​វ៉ា​រ្យ៉ង់​ធំ​បំផុត​ខុស​ពី​ធម្មតា​”​ដោយ​ប៉ះ​​ពាល់​របៀប​ដែល​វីរុស​ភ្ជាប់​និង​ចូល​មក​កោសិកា​ក្នុង​រាងកាយ​។​

​លោក​វ៉ាឡង់​បាន​បន្ថែមថា ក្រុមមន្ត្រី​មិន​ប្រាកដ​ថា​តើ​វា​មាន​ដើមកំណើត​ពី​ចក្រភព​អង់គ្លេស​ឬ​យ៉ាងណា​ទេ ប៉ុន្តែ​ត្រឹម​ខែ​ធ្នូ​នេះ វា​មាន​អត្រា​ឆ្លង​លឿន​ជាង​មុន​ជិត​៧០​ភាគរយ​នៅ​ទីក្រុង​ឡុង​ដ៍​៕

ប្រទេស​ជាច្រើន​ហាមឃាត់​ជើងហោះហើរ​ពី​ចក្រភព​អង់គ្លេស ព្រោះ​ដាន​វីរុស​កូរ៉ូណា​ថ្មី​ប្រែប្រួល​រូបរាង​ឆ្លង​ខ្លាំង​ជាង​មុន​៧០​ភាគរយ​

ទីតាំងផ្សាយពាណិជ្ជកម្ម

- Advertisment -

Most Popular