Home ព័ត៌មានសំខាន់ៗ អ្នកប្រមូល​ទិ...

អ្នកប្រមូល​ទិញ​និង​ប្រកប​អាជីវកម្ម​ទិញ​លក់ កេសរ​កូ​ល​ព្រៃ ឬ​ផ្កាអ័រគីដេ​ព្រៃ​ នឹង​ប្រឈម​ផ្លូវច្បាប់​

ដោយ​:​ដេប៉ូ​/​សៀមរាប​:ដើម្បី​ថែរក្សា​និង​ការពារ​ប្រភេទ​កេស​កូ​ល​របស់​កម្ពុជា​ឱ្យបាន​គង់វង្ស​នោះ​មន្ត្រីជាន់ខ្ពស់​ក្រសួងបរិស្ថាន​បាន​ព្រមាន​នឹង​អនុវត្តតាម​ផ្លូវច្បាប់​ចំពោះ​ជន​ទាំងឡាយណា​ដែល​នៅ​បន្តសកម្មភាព​ប្រមូល​ទិញ លក់ និង​ដឹកជញ្ជូន​កេសរ​កូ​ល​ព្រៃ ឬ​ផ្កាអ័រគីដេ​ព្រៃ​គ្រប់​ប្រភេទ ពី​តំបន់ការពារធម្មជាតិ​នៅ​កម្ពុជា​។​
​ ​ការព្រមាន​បែបនេះ​ធ្វើឡើង​ដោយ​លោក​នេត្រ​ភក្ត្រា​មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​ក្នុងខណៈ​ពេលដែល​បាន​ដឹកនាំ ក្រុម​អ្នកសារព័ត៌មាន​ក្នុង​ដំណើរ​ទស្សនកិច្ច​ទៅកាន់​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល​សុខ អាន ភ្នំ​គូ​លេន ថ្ងៃទី​១៩ ធ្នូ​កន្លងទៅ​។​

លោក​នេត្រ​ភក្ត្រា​មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​ក្នុងខណៈ​ពេលដែល​បាន​ដឹកនាំ ក្រុម​អ្នកសារព័ត៌មាន​ក្នុង​ដំណើរ​ទស្សនកិច្ច​ទៅកាន់​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល​សុខ អាន ភ្នំ​គូ​លេន ថ្ងៃទី​១៩ ធ្នូ​កន្លងទៅ​(រូបថតដេប៉ូ)

​ប្រាប់​ដល់​បណ្តាញសារព័ត៌មាន លោក នេត្រ ភក្ត្រា បានឱ្យដឹងថា​កេសរ​កូ​ល​ព្រៃ គឺជា​ធនធានធម្មជាតិ​ដ៏​កម្រ​និង​ជា​កម្មសិទ្ធិ​របស់ កម្ពុជា​ដែល​ចាំបាច់​ត្រូវ​ថែរក្សា​និង​អភិរក្ស​។​ការហាមឃាត់​ឬ​ការទប់ស្កាត់​ការធ្វើ​អាជីវកម្ម​កេសរ​កូ​ល​នេះ​ក៏​ធ្វើឡើង​ស្រប​ពេលដែល​អ្នកជំនាញ​បាននិងកំពុង​ធ្វើការ​សិក្សា​រក​ចំនួន​ប្រភេទ​កេសរ​កូ​ល​ព្រៃ​ដែលមាន​វត្ត​មាននៅ​កម្ពុជា​ឱ្យបាន​ច្បាស់លាស់​។​
​លោក​បាន​ថ្លែងថា​”​សូម​ព្រមាន​ទៅលើ​អ្នកធ្វើអាជីវកម្ម​ធំ អ្នក​ដែល​បំផ្លិចបំផ្លាញ​នៅ​ករសរ​កូ​ល​ព្រៃ យើង​នឹង​អនុវត្ត​ទៅ​ហ្នឹង​វិធានការ​ច្បាប់​ព្រោះ​ក្រសួងបរិស្ថាន​បាន​ព្រមាន​រួចហើយ​ចំពោះ​អ្នក​ដែល​ធ្វើ​អាជីវកម្ម​កេសរ​កូ​ល​ព្រៃ​ដែល​ហួសប្រមាណ ដែល​ឈានទៅ​ដល់ក​ម្រឹត​បំផ្លិចបំផ្លាញ​នេះ យើង​មិន​យោគយល់​ចំពោះ​ពួកគាត់​ទេ “​។​
​ទាក់ទិន​ទៅនឹង​កេសរ​កូ​ល​នៅ​កម្ពុជា​នេះដែរ​លោក​មានប្រសាសន៍​ថា​ប្រភេទ​កេសរ​កូ​ល​ប្រមាណ​៤០​ភាគរយ​ត្រូវបាន​គេ​រកឃើញ​នៅតាម​តំបន់​ជួរ​ភ្នំក្រវាញ​និង​រួមទាំង​តំបន់ភ្នំ​បូកគោ​។​ចំណែក​៣៥​ភាគរយ​ត្រូវបាន​គេ​រកឃើញ​នៅ​តំបន់ឆ្នេរ​និង​១៣​ភាគរយ​ព្រៃរបោះ​ស្ងួត​ហើយ​១០​ភាគរយ​ទៀត​ត្រូវបាន​គេ​រកឃើញ​នៅតាម​តំបន់​ប្រសព្វ​គ្នា​នៃ​ទន្លេមេគង្គ​។​ក្រៅពីនេះ​កេសរ​កូ​ល​ព្រៃ​កម្ពុជា​អាច​មាននៅ​តំបន់​ជួរ​ភ្នំ​ដងរែក និង​តំបន់​ខាងកើត​បឹង​ទន្លេសាប​។​

លោក​នេត្រ​ភក្ត្រា​មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​ក្នុងខណៈ​ពេលដែល​បាន​ដឹកនាំ ក្រុម​អ្នកសារព័ត៌មាន​ក្នុង​ដំណើរ​ទស្សនកិច្ច​ទៅកាន់​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល​សុខ អាន ភ្នំ​គូ​លេន ថ្ងៃទី​១៩ ធ្នូ​កន្លងទៅ​(រូបថតដេប៉ូ

​ទោះបីយ៉ាងណា​លោក​នេត្រ​ភក្ត្រា​បាន​មានប្រសាសន៍​ដែរ​ថា​“​នាពេលនេះ​មន្ត្រី​ជំនាញ​យើង​កំពុង​សិក្សា​អំពី​កេសរ​កូ​ល​នៅ​ក​ម្ពូ​ជា​ប៉ុន្តែ​ចំនួន​ពិតប្រាកដ យើង​មិនទាន់មាន​ចំនួន​ប្រភេទ​កេសរ​កូ​ល​ឱ្យ​ច្បាស់លាស់​នៅឡើយ​។ ដូច្នេះ​បើ​មានការ​ប្រមូល ឬ​ធ្វើ​អាជីវកម្ម​កេសរ​កូ​ល​ព្រៃ វា​អាចធ្វើឱ្យ​បាត់បង់​នូវ​ប្រភេទ​កេសរ​កូ​ល​របស់​យើង ដែល​គេ​ប្រទេស​ផ្សេង​អាច​យកទៅ​ធ្វើជា​អាជីវកម្ម ឬ​ធ្វើជា​កម្មសិទ្ធិ​របស់គេ ដូច្នេះ​បានជា​យើង​ចាំបាច់​ត្រូវការពារ អភិរក្ស និង​ទប់ស្កាត់​ការជួញដូរ​ដោយ​ខុសច្បាប់​”​។​
​លោក រ​ដ្ឋេ​ល​ខា​ធិ​ការ​បាន​បន្ថែមថា​”​តាមរយៈ​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល សុខ អាន ភ្នំ​គូលែន ក្រសួងបរិស្ថាន បាននិងកំពុង​ធ្វើការ​សិក្សា​ស្រាវជ្រាវ និង​ចងក្រង​ទិន្នន័យ ដោយ​រួមបញ្ចូល​ទាំង​ការកំណត់​អត្តសញ្ញាណ ប្រភេទ​កេសរ​កូ​ល​ព្រៃ​។ បច្ចុប្បន្ន មជ្ឈមណ្ឌល​បាន​អភិរក្ស និង​រក្សា​ពូជ​កេសរ​កូ​ល​ព្រៃ​ចំនួន​ប្រមាណ​១៥០​ប្រភេទ ក្នុងនោះ​ក៏មាន​បណ្ណ​ង្គ​ជាតិ​(fern) ចំនួន​១៥ ប្រភេទ និង​Hoya ៤​ប្រភេទ​ផងដែរ​”​។​
​ទន្ទឹម​ជាមួយ​ការព្រមាន​ខាងលើនេះ លោក​រដ្ឋលេខាធិការ​ក្រសួងបរិស្ថាន​បានបង្ហាញ​ពី​ច្បាប់​ដែល ពាក់ព័ន្ធ នឹង ការអភិរក្ស កេសរ​កូ​ល​ព្រៃ ផងដែរ​ដូចជា​ច្បាប់​ស្តីពី​តំបន់ការពារធម្មជាតិ ឆ្នាំ​២០០៨ ជំពូក​ទី​១០ ស្តីពី​បទល្មើស​ធនធាន​ធម្មជាតិ និង​ទោស​បញ្ញត្តិ​មាត្រា ៥៩ (​ចំណុច​ទី​៣៖ ដឹកជញ្ជូន និង​ប្រមូល​អនុផល​ធនធានធម្មជាតិ​ដោយ​គ្មាន​ការអនុញ្ញាត និង​ចំណុច​ទី​៤៖ ប្រមូល​សន្និធិ ផល អនុផល ធនធានធម្មជាតិ​ដោយ​គ្មាន​ការអនុញ្ញាត​) ត្រូវ​ទទួល​ការពិន័យ​អន្តរការណ៍ ឬ​ត្រូវធ្វើ​ការជួសជុល​ស្តារ​ការខូចខាត និង​រឹបអូស​វត្ថុតាង​ជា​សម្បត្តិ​រដ្ឋ​។​មាត្រា​៦១ (​ចំណុច​ទី​៤៖ កាប់ គ្រៀវ ចង រិត គាស់​រម្លើង កាប់រំលំ ប្រមូល បំផ្លាញ រុករាន និង ធ្វើ​សន្និធិ​រុក្ខជាតិ​ដែល​កំពុង​រងគ្រោះថ្នាក់ ឬ​មាន​ដោយ​កម្រ និង​ជិត​ផុត​ពូជ ដែល​បានកំណត់ ដោយ​ប្រកាស​ក្រសួងបរិស្ថាន​) ត្រូវ​ផ្តន្ទាទោស​ជា​បទល្មើស​ធនធានធម្មជាតិ​ថ្នាក់​ទី​៣ (​ទោស ដាក់ពន្ធនាគារ​ពី ១​ទៅ​៥​ឆ្នាំ និង​ពិន័យ​ជា​ប្រាក់​ពី​១៥​លាន​រៀល ទៅ​១៥០​លាន​រៀល​។​

លោក​នេត្រ​ភក្ត្រា​មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​ក្នុងខណៈ​ពេលដែល​បាន​ដឹកនាំ ក្រុម​អ្នកសារព័ត៌មាន​ក្នុង​ដំណើរ​ទស្សនកិច្ច​ទៅកាន់​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល​សុខ អាន ភ្នំ​គូ​លេន ថ្ងៃទី​១៩ ធ្នូ​កន្លងទៅ​(រូបថតដេប៉ូ
​លោក​រដ្ឋលេខាធិការ​ក៏បាន​បញ្ជាក់​ឱ្យដឹង​ដែរ​ថា​ក្នុងករណី​ពិនិត្យឃើញ​មាន​បទល្មើស​ណាមួយ នាយកដ្ឋាន អធិការកិច្ច និង ពង្រឹង ការ អនុវត្ត ច្បាប់​នឹង​ចុះទៅ​ធ្វើ​អធិការកិច្ច ឬ​អញ្ជើញ​ម្ចាស់​អាជីវកម្ម​ឬ​បុគ្គល​ប្រព្រឹត្ត​បទល្មើស​មក​ធ្វើការ​ណែនាំ និង​ចុះកិច្ចសន្យា​បញ្ឈប់​រាល់​សកម្មភាព​ល្មើស​ជាបន្ទាន់​។ ក្នុងករណី​មិន​រាងចាល​និង​បន្ត​អនុវត្ត​សកម្មភាព​ល្មើស ត្រូវ​អនុវត្តតាម​វិធានការ​ច្បាប់​ដែលមាន​ចែង​ជា​ធរមាន​។​
​សម្រាប់​កិច្ចការពារ​កេស​កូ​ល​នេះដែរ លោក​រដ្ឋលេខាធិការ​បា​ន​បញ្ជាក់​ជុំវិញ​វិធានការ​របស់​ក្រសួង​រួមមាន​ដូចជា​
​អប់រំ​ផ្សព្វផ្សាយ​បន្ថែម​ដល់​ប្រជាពលរដ្ឋ​អំពី​ការជួញដូរ​កេសរ​កូ​ល​ព្រៃ​ជា​អំពើ​ខុសច្បាប់​។ លើកទឹកចិត្ត​ឱ្យ​ប្រជាពលរដ្ឋ​កែប្រែ​ឥរិយាបថ និង​ផ្លាស់ប្តូរ​មុខរបរ​ថ្មី​ដែល​មិន​ប៉ះពាល់​ឬ​បំផ្លាញ​ដល់​កេសរ​កូ​ល​ព្រៃ​។​
​សូមបញ្ជាក់ថា កម្ពុជា​បានសម្រេច​បង្កើត «​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល សុខ អាន ភ្នំ​គូលែន​» កាល​នៅ​ចុងឆ្នាំ​២០១៨ ស្ថិតនៅ​ជើងភ្នំ​គូលែន ក្នុងភូមិ​ស្រះ​ខ្វាវ ឃុំ​ត្បែង ស្រុក​បន្ទាយស្រី ខេត្តសៀមរាប​។ មជ្ឈមណ្ឌល​នេះ​បង្កើត​ដោយ​អគ្គលេខាធិកា​ដ្ឋា​ន​អភិវឌ្ឍន៍​ដោយ​ចីរភាព សហការ​ជាមួយ​មន្ទីរ​បរិស្ថាន​ខេត្តសៀមរាប និង​ម្ចាស់​កសិដ្ឋាន The Bloom Garden Greenhouse​។​«​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល សុខ អាន ភ្នំ​គូលែន​» នេះ គឺ​ដើម្បី​រំឭក​ពី​គុណបំណាច់​ដ៏​ថ្លៃថ្លា របស់​វិញ្ញាណក្ខន្ធ​សម្តេច​វិបុល​បញ្ញា សុខ អាន ក្នុង​បុព្វហេតុ​កសាង​ជាតិ​មាតុភូមិ ការពារ​ធនធានធម្មជាតិ អភិរក្ស​ជីវៈចម្រុះ និង​អភិរក្ស​បេតិកភណ្ឌ​វប្បធម៌​មនុស្សជាតិ និង​លើកតម្កើង​វិស័យ​ទេសចរណ៍​កម្ពុជា​។​ការបង្កើត​មជ្ឈមណ្ឌល​ស្រាវជ្រាវ​នេះ​នឹង​ផ្តល់​អត្ថប្រយោជន៍​ផ្សេងៗ ជាច្រើន​ដូចជា​៖ រក្សា និង​ស្ដារ​ពូជ​កេសរ​កូ​ល​ព្រៃ ក្នុងស្រុក​ប្រមូលផ្ដុំ​សំណាក​កេសរ​កូ​ល​រស់ កត់ត្រា និង​ធ្វើ​សារពើភ័ណ្ឌ សម្រាប់​សិក្សា​ស្រាវជ្រាវ ផ្ដល់​ចំណេះដឹង និង​ព័ត៌មាន​វិទ្យាសាស្ត្រ ពី​កេសរ​កូ​ល​ព្រៃ សម្រាប់​មនុស្ស​ជំនាន់​ក្រោយ និង​សួន​កម្សាន្ត​ជាដើម​៕​សរន​

លោក​នេត្រ​ភក្ត្រា​មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​ក្នុងខណៈ​ពេលដែល​បាន​ដឹកនាំ ក្រុម​អ្នកសារព័ត៌មាន​ក្នុង​ដំណើរ​ទស្សនកិច្ច​ទៅកាន់​មជ្ឈមណ្ឌល​ស្រាវជ្រាវ និង​អភិរក្ស​កេសរ​កូ​ល​សុខ អាន ភ្នំ​គូ​លេន ថ្ងៃទី​១៩ ធ្នូ​កន្លងទៅ​(រូបថតដេប៉ូ

ទីតាំងផ្សាយពាណិជ្ជកម្ម

- Advertisment -

Most Popular