Home ព័ត៌មានជាតិ សេដ្ឋកិច្ច ត្រី​សម្រាប់ធ...

ត្រី​សម្រាប់ធ្វើ​ប្រហុក​.​ផ្អក និង​ត្រីឆ្អើរ ចាប់ផ្តើម​ត្រូវ ហើយ​តម្លៃ​ចុះថោក​តែ​បន្តិច​ប៉ុណ្ណោះ

ដោយៈ ទេ​ពក​ង្រី / កំពង់ឆ្នាំងៈ ត្រី​សម្រាប់ធ្វើ​ប្រហុក ផ្អក និង​ត្រីឆ្អើរ បានចាប់ផ្ដើម​ត្រូ​ហើយ រីឯ​តម្លៃ ក៍បាន​ចុះថោក​បន្តិច​ដែរ នៅពេល​ប្រជាពលរដ្ឋ ដាក់មង​ត្រូវ​។​

​ប្រជាពលរដ្ឋ ដែល​នៅ​ស្រុក​ឆ្ងាយៗ ពី​ទន្លេ​ស្រុក​ទឹកផុស និង​ខាង​កំពង់ស្ពឺ​ដែល​តែងតែ នាំ​ក្រុមគ្រួសារ បងប្អូន ក៍​ដូចជា​អ្នកភូមិ​ស្រុក ចុះមក​ធ្វើ​ប្រហុក និង​ផ្អក បាន​និយាយ អោយដឹង នៅ​ថ្ងៃទី​២១ ធ្នូ ២០២០ ថាៈ ឆ្នាំនេះ ក៍​ដូចជា​ឆ្នាំមុនៗ​ដែរ ពួកគាត់​បានមក ជា​ក្រុម តាម​រថយន្ត ខ្លះទៀត មក​តាម​គោយន្ត និង​ខ្លះទៀត តាម​ម៉ូតូ ចុះមក​ធ្វើ​ប្រហុក ផ្អក នៅ​កំពង់​ប្រសាទ ក្នុង​ខេត្តកំពង់ឆ្នាំង ។​

​ពួកគេ​បាន​បញ្ជាក់ថាៈ ថ្ងៃនេះ គាត់​ទិញ​បាន​ខ្លះៗ​ហើយ តែ​ស្ថានភាព​ត្រី​ដាក់មង នៅ​ថ្លៃ​បន្តិច ដោយ​មួយ​គីឡូ ពី ៣.៥០០ រៀល ៥.០០០ រៀល ដោយឡែក ត្រី​សម្រាប់ធ្វើ​ផ្អក តម្លៃ ៧.០០០ រៀល ទៅ ១៥.០០០ រៀល​។ បើ​ត្រី ចុះថោក​ជាង​នេះ​បន្តិច ពួកគេ​អាច​ទិញ ធ្វើ​ប្រហុក និង​ផ្អក​បាន​ច្រើន ដើម្បី​សម្រាប់​ត្រៀម​ទុក ធ្វើស្រែ នៅ​រដូវវស្សា ខាងមុខ​។​

​ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកំពង់ឆ្នាំង បាន​និយាយ​ឱ្យដឹង តាម​ទូរស័ព្ទ នៅវេលា​ព្រឹក ថ្ងៃទី​២១ ធ្នូ នេះ​ថាៈ បើតាម​ការពិនិត្យ នៅថ្ងៃនេះ សកម្មភាព​ដោយ ឧបករណ៍​មង​បណ្តែត ដោយ​ប្រជាពលរដ្ឋ ស្ថានភាព​ត្រី ត្រូវ​ព្រោះ​ដល់​ខ្នើត ហើយ​តម្លៃ ក៏​នៅ​ថ្លៃ​បន្តិច​ផងដែរ តែបើ​ត្រឹម​ថ្ងៃទី​២២ ទៅ ២៣ ខាងមុខនេះ ត្រី​អាច​នឹងត្រូវ​ខ្លាំង ហើយ​តម្លៃ​ក៏​ថោក ដែល​អាចឱ្យ​បងប្អូន​ប្រជាពលរដ្ឋ ដែល​នៅ​តំបន់​នា​ន ចុះមក​ធ្វើ​ប្រហុក ផ្អក បាន​ច្រើន ដើម្បី​ត្រៀម​ទុក សម្រាប់​រដូវ​ធ្វើ​ស្រូវ វស្សា​ខាងមុខ​។​

​ប្រធាន​មន្ទី​កសិកម្ម រុក្ខាប្រមាញ់ និង​នេសាទ ខេត្តកំពង់ឆ្នាំង បាន​អំពាវនាវ​ដល់​បងប្អូន ប្រជាពលរដ្ឋ ដែល​នៅ​ស្រុកលើ​ឆ្ងាយៗ សូមមេត្តា​រួសរាន់ ចុះមក​ធ្វើ​ប្រហុក​ផ្អក​ឲ្យ​បាន ទាន់ពេលវេលា នៅពេល​ត្រី ចាប់ផ្តើម​ត្រូវ​ហើយ នៅថ្ងៃនេះ​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular