Home ព័ត៌មានអន្តរជាតិ នាយករដ្ឋមន្ត្...

នាយករដ្ឋមន្ត្រី​នេ​ប៉ាល់​រំលាយ​សភា​និង​កោះ​ធ្វើ​ការបោះឆ្នោត តែ​ត្រូវ​ក្រុមប្រឆាំង​ចោទថា​ជា​រដ្ឋប្រហារ​រដ្ឋធម្មនុញ្ញ​

​ប្រែ​សម្រួលៈ​វាសនា​/​កាត់​ម៉ាន់​ឌូ​៖​ពួក​ប្រឆាំងនឹង​នាយករដ្ឋមន្ត្រី​នេ​ប៉ាល់ បាន​ងាក​ទៅរក​តុលាការ​កំពូល​កាលពី​ថ្ងៃ​ចន្ទ ដើម្បី​ប្រឆាំង​ការរំលាយ​សភា​និង​កោះ​ធ្វើ​ការបោះឆ្នោត​មួយ ដោយ​ពួកគេ​ហៅ​​វា​ថា​ជា​«​រដ្ឋប្រហារ​រដ្ឋធម្មនុញ្ញ​»​មួយ​។​

​នាយករដ្ឋមន្ត្រី ខេ​ភី សា​ម៉ា អូ​លី

​នាយករដ្ឋមន្ត្រី ខេ​ភី សា​ម៉ា អូ​លី បាន​រំលាយ​សភា​កាលពី​ថ្ងៃអាទិត្យ ជាហេតុ​នាំ​អោយ​មាន​ការ​សង្ស័យ​អំពី​ការ​កើត​ចលាចល​នយោបាយ​រាប់​ខែ​នៅក្នុង​ប្រទេស​នៅ​តំបន់​ហេមពាន្ត​មួយ​នេះ នៅ​ពេល​ខ្លួន​​កំពុង​ប្រឈម​ដោះស្រាយ​វិបត្តិ​វីរុស​កូរ៉ូណា​។​

​រដ្ឋមន្ត្រី​៧​រូប​បាន​លាឈប់​ភ្លាម​ក្រោយ​ការរំលាយ​សភា ដោយ​ពួកគេ​និយាយថា​វា​រំលោភ​«​អាណត្តិ​របស់​ប្រជាជន​» ដែល​ផ្តល់អោយ​ពួកគេ​នៅក្នុង​ការបោះឆ្នោត​ឆ្នាំ​២០១៧​។​

​ពួក​អ្នក​ប្រឆាំង​តវ៉ា​បាន​ដុត​រូប​នាយករដ្ឋមន្ត្រី​នៅ​តាម​ដង​វិថី​។​

​ក្នុងពេល​ជាមួយគ្នា​អ្នកនាំពាក្យ​តុលាការ​កំពូល​បាន​និយាយថា មាន​បណ្តឹង​៣​ប្រឆាំង​នឹង​ការរំលាយ​សភា​កំពុង​ទទួលយក​មក​ដោះស្រាយ​។​

​មេធាវី ឌី​ណេ​ស ទ្រី​ផា​ធី ដែល​ជា​ដើមបណ្តឹង​មួយ​បាន​និយាយថា​« នៅក្រោម​រដ្ឋធម្មនុញ្ញ នាយករដ្ឋមន្ត្រី​មិន​មាន​សិទ្ធិ​រំលាយ​សភា​ទេ​។​វា​ជា​រដ្ឋប្រហារ​រដ្ឋធម្មនុញ្ញ​មួយ ។​ខ្ញុំ​កំពុង​ស្នើ​អោយ​តុលាការ​ចេញ​បញ្ជា​​អោយ​រក្សា​ស្ថាន​ដូច​មុន​»​។​

​ប្រធានាធិបតី កាលពី​ថ្ងៃអាទិត្យ បាន​កំណត់​យក​ថ្ងៃ​៣០​មេសា​ឬ ១០​ឧសភា សំរាប់ធ្វើ​ការបោះឆ្នោត​សកល គឺ​មុន​កាលកំណត់​១​ឆ្នាំ ទៅតាម​ការចង់បានរ​បស់​គណៈរដ្ឋមន្ត្រី​លោក អូ​លី​។​

​សូមបញ្ជាក់​ថា លោកនាយក​រដ្ឋមន្ត្រី​បាន​បាត់បង់​ការគាំទ្រ​នៅក្នុង​គណបក្ស​កុំម្មុយនីស្ត​នេ​ប៉ាល់​ផ្ទាល់​របស់​លោក ដោយ​សមាជិក​ខ្លះ​ចោទប្រកាន់​លោក​ថា​ផាត់​ចោល​បក្ស​ក្នុង​ការសំរេចចិត្ត​របស់​រដ្ឋាភិបាល​​និង​ផាត់​ចោល​សមាជិក​បក្ស​ចំពោះ​ការតែងតាំង​មុខតំណែង​សំខាន់ៗ​។​

​ពួកគេ​បាន​អំពាវនាវ​អោយ​លោក​លាឈប់​ពី​នាយករដ្ឋមន្ត្រី តែ​អ្នកគាំទ្រ​លោក​និយាយថា នៅក្នុង​ប្រទេស​ប្រកាន់​លទ្ធិប្រជាធិបតេយ្យ​មួយ ការបោះឆ្នោត​ជា​ថ្មី​ជា​វិធី​ល្អ​បំផុត​ដើម្បី​ចាកចេញ​ពី​វិបត្តិ​ដូច្នេះ​៕

 

ទីតាំងផ្សាយពាណិជ្ជកម្ម

- Advertisment -

Most Popular