ក្មេងប្រុស​អាយុ​៩​ឆ្នាំ​មក​ពី​រដ្ឋ​តិច​សាស់​រកចំណូលបាន​ច្រើន​បំផុត​ពី​យូ​ធូប​រហូត​ជិត ៣០ លាន​ដុល្លារ​

​ប្រែ​សម្រួល : កញ្ញា​ដា​លី​ស​/​ញូវយ៉ក ៖ ក្មេងប្រុស​អាយុ​៩​ឆ្នាំ​មក​ពី​រដ្ឋ​តិច​សា​ស់បាន​ឈរ​នៅលើ​កំពូល​តារាង​នៃ​បញ្ជី YouTubers ប្រចាំឆ្នាំ ដែល​រកចំណូលបាន​ខ្ពស់​បំផុត​ចងក្រង​ដោយ​ទស្សនា​វ​ដ្តី Forbes សម្រាប់​ឆ្នាំ​ទី ៣ ជាប់​គ្នា ដោយ​រក​ចំណូល​បាន​ជិត ៣០ លាន​ដុល្លារ​អាម៉េរិក​នៅ​ឆ្នាំនេះ​។​

​កុមារ​ដ៏​មាន​ឥទ្ធិពល​លើ​បណ្តាញ​យូ​ធូប​ឈ្មោះ រ៉ា​យ​អែ​ន កា​ជី ធ្វើ​ការបរិយាយ​ប្រដាប់ប្រដា​ក្មេង​លេង​និង​ហ្គេម​នៅលើ​បណ្តាញ​យូ​ធូប​របស់គាត់​ឈ្មោះ Ryan’s World ដែល​មាន​អ្នក​ចុច Subscribe ជាង ៤១,៧ លាន​នាក់​និង​មាន​អ្នក​ចូល​មើល ១២,២ ពាន់​លាន​ដង​។​

​វីដេអូ ដែល​មាន​ប្រជាប្រិយ​បំផុត​របស់​គាត់ គឺ​មាន​ចំណងជើង​ថា “Huge Eggs Surprise Toys Challenge” ដែល​មាន​អ្នកទស្សនា​ជាង ២ ពាន់​លាន​ដង ដោយ​ធ្វើឱ្យ​វា​ក្លាយជា​វីដេអូ​មួយ​ក្នុងចំណោម​វីដេអូ​ចំនួន ៦០ ដែល​គេ​មើល​ច្រើន​បំផុត​មិន​ធ្លាប់​មាន​នៅ​លើ​គេហទំព័រ​យូ​ធូប​។​

​ក្រៅពី​ទឹកប្រាក់​ចំនួន ២៩,៥ លាន​ដុល្លារ​អាមេរិក ដែល​គាត់​រកបាន​ពី​វីដេអូ​អំពី “​ការបើក​ប្រអប់​ផលិតផល​” រួច​បរិយាយ​អំពី​ប្រដាប់ប្រដា​ក្មេង​លេង​ទាំង​នោះ ផលិតផល​យីហោ​ផ្ទាល់​របស់​រ៉ា​យ​អែន ដែល​លក់​នៅ​ផ្សារ Target, Amazon និង Walmart រកចំណូលបាន ២០០ លាន​ដុល្លារ​អាម៉េរិក​ថែមទៀត​ក្នុង​ការលក់​កាលពី​ឆ្នាំមុន​។​

​ទស្សនា​វ​ដ្តី Forbes បាន​រាយការណ៍​ថា កុមារ​នេះ​ក៏​បាន​ចុះ​កិច្ចព្រមព្រៀង​ជាមួយ​ឆា​នែ​ល​កុមារ​ឈ្មោះ Nickelodeon សម្រាប់​ស៊េរី​វីដេអូ​ភាគ​មួយ ដែល​មានឈ្មោះ​ថា Ryan’s Mystery Playdate ៕

រ៉ា​យ​អែន​រកបាន​២៩,៥ លាន​ដុល្លារ​ពី​យូ​ធូប​នៅ​ឆ្នាំ​២០២០