ដោយៈ គ្រញូង / បាត់ដំបងៈ ក្រោយពេលទឹកជំនន់ស្រកទៅវិញ មន្ទីរសាធារណការ និងដឹកជញ្ជូន ខេត្តបាត់ដំបង បានចាប់ផ្តើមជូសជុលផ្លូវ ដែលខូចខាត ដោយជំនន់ទឹកភ្លៀង ដោយចាក់ផ្លូវបេទីមមីណឺ ប្រភេទ AC លើកំណាត់ ផ្លូវជាតិលេខ៥ ចូលក្រុងបាត់ដំបង ចំនួនពីរខ្សែ មានប្រវែងជាង ៧ គីឡូម៉ែត្រ។
លោក ចាន់ សំបូរ ប្រធានមន្ទីរសាធារណការ និងដឹកជញ្ជូន ខេត្តបាត់ដំបង បានបញ្ជាក់ថាៈ កំណាត់ផ្លូវទាំងពីរខ្សែ ដែលត្រូវស្ថាបនាថ្មីនេះ ដោយសារតែរងការ ខូចខាតខ្លាំង ពីជំនន់ ទឹកភ្លៀង កន្លងមកធ្វើអោយផ្លូវរមួលខ្លាំង ទើបប្រើបច្ចេកទេសចាក់ផ្លូវ ប្រភេទអូវ៉ាឡេ AC នេះ ដើម្បីជាប់បានយូរ និងអាចធ្វើដំណើរ បានស្រួល។ ការចំណាយថវិកាស្ថាបនា ផ្លូវទាំង ២ ខ្សែនេះ គឺជាគម្រោងរបស់រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន ចំណែកមន្ទីរ ជាអ្នកអនុវត្តន៍ផ្ទាល់ ។
លោកបានបញ្ជាក់ទៀតថាៈ កំណាត់ផ្លូវពីរខ្សែរនេះ គឺផ្លូវទី១ ចាប់ពីចំណុចដៃប្រាំបី (ព្រះនរាយណ៍) ដល់រង្វង់មូលយាយទេព ប្រវែង ២.២០០ម៉ែត្រ ជាប្រភេទផ្លូវភ្លោះ ដែលមួយចំហៀង ៩ម៉ែត្រ និងផ្លូវទោលមួយខ្សែទៀត ប្រវែង ៥គីឡូម៉ែត្រ គុណនឹង ១០ ម៉ែត្រ ចាប់ពីចំណុចពុកឆ្មារ ដល់រង្វង់មូលព្រាបស។
លោកបានបញ្ជាក់បន្ថែមថាៈ ក្រៅពីផ្លូវពីរខ្សែ ខាងលើនេះ នៅមានគម្រោងចាក់ផ្លូវប្រភេទ គុណភាពខាងលើ ក្នុងក្រុងបាត់ដំបងបន្ថែមទៀត ដែលជាគម្រោងរបស់ រដ្ឋបាលខេត្ត បាត់ដំបង ចាប់ពីចំណុច មុខសាលាខេត្ត ដល់ផ្សារលើ (ផ្សារអប្សរា) និងផ្លូវលេខ៣ ពីចំណុចវត្តដំរី ស ដល់ផ្លូវជាតិលេខ៥ ៕/V-PC
