Home ព័ត៌មានជាតិ សង្គម ​មន្ត្រីនគរបា...

​មន្ត្រីនគរបាល រលាកភ្លើង ក្នុងការ​បំផ្លាញ​ស្រា នៅ​កំពង់ឆ្នាំង បាន​ត្រូវ​ឧបត្ថម្ភ​ថវិកា សម្រាប់​ការព្យាបាល​

ដោយៈ ទេ​ពក​ង្រី / កំពង់ឆ្នាំងៈ នៅ​ព្រឹក​ថ្ងៃទី​២២ ខែធ្នូ ឆ្នាំ​២០២០​នេះ លោក​ឧ​ត្ត​ម​សេនីយ៍​ទោ ខូវ លី ស្នងការ​នគរបាល​ខេត្ត បាន​ដឹកនាំ​កងកម្លាំង​នគរបាល​ខេត្ត ចុះសាកសួរ​សុខទុក្ខ និង​បាន​នាំយក​ថវិកា ចំនួន ១៤​លាន ៨០​ម៉ឺន​រៀល​របស់លោក​អភិបាលខេត្ត និង​អង្គភាព​ស្នងការដ្ឋាន ជូន​ចំពោះ​មន្ត្រីនគរបាល ដែល​រលាកភ្លើង ក្នុងការ​បំផ្លាញចោល​ស្រា ស ស្រាថ្នាំ និង​មេ​ស្រ កន្លងទៅ​ថ្មីៗ​នេះ ហើយ​មន្ត្រី​នោះ កំពុង​សម្រាក​ព្យាបាល នៅ​មន្ទីរពេទ្យ​កាល់​ម៉ែត្រ​។​

​អំណោយ​ជា​ថវិកា ដែល​បាន​នាំយកទៅ​ប្រគល់ ជូន​មន្ត្រី​នគ​បាល ដែល​រងគ្រោះ​ដោយសារ​ឆេះ​ភ្លើង រលាក​ពេញ​ខ្លួន គឺ​បាន​ម​មកពី ការចូលរួម​ឧបត្ថម្ភ​ពី លោក ឈួ​រ ច័ន្ទ​ឌឿ​ន អភិបាលខេត្ត លោក​ឧ​ត្ត​ម​សេនីយ៍​ទោ ខូវ លី ស្នងការ​នគរបាល​ខេត្ត លោក អ៊ិត សុធា ព្រះរាជអាជ្ញា​សាលាដំបូង​ខេត្ត និង​មន្ត្រី​នៅតាម​បណ្តា ការិយាល័យ នៃ​ស្នងការដ្ឋាន​នគ​បាល​ខេត្ត ទាំងអស់​។​

​មន្ត្រី​នគ​បាល​រងគ្រោះ​រូបនោះ គឺ​លោក​អនុសេនីយ៍ឯក វ៉ាន់ គឹម​ឆេ អត្តលេខ​សម្គាល់ 80529 នៃ​ការិយាល័យ​អន្តោប្រវេសន៍ ដែល​បាន​រងគ្រោះ ក្នុង​បេសកម្ម​ដុត​កម្ទេច​ស្រាស ស្រាថ្នាំ កាលពី​ថ្ងៃទី​១៧ ខែធ្នូ កន្លងទៅ ដោយសារតែ​ការផ្ទុះ​ប៊ីដុង​ស្រាស ស្រាថ្នាំ រង​ការឆេះ​រលាក ពាសពេញ​ខ្លួន ហើយ​ត្រូវបាន​ដឹក យកទៅ​សង្គ្រោះបន្ទាន់ នៅ​មន្ទីរពេទ្យ​កាល់​ម៉ែត្រ រាជធានី​ភ្នំពេញ​។​

​អាណាព្យាបាល របស់​មន្ត្រី​នគ​បាល​រងគ្រោះ​នេះ បានបញ្ជាក់​ឲ្យ​ដឹង អំពី​ស្ថានភាព​ជំងឺ​របស់​កូន​គាត់​ថា ពេលនេះ មាន​ស្ថានភាព​ធូរស្រាល ច្រើន​ហើយ ក៏ប៉ុន្តែ ក្រុមគ្រូពេទ្យ នៅ​មិនទាន់​អនុញ្ញាត ឲ្យ​វិល​ទៅ​លំនៅឋាន​វិញ ដោយ​ត្រូវ​នៅ​តាមដាន​ស្ថានភាព​ជំងឺ មួយរយៈ​បន្តទៀត ថា​វា​វិវត្តន៍​ល្អប្រសើរ​យ៉ាងណា​ទៀត​៕/V

ទីតាំងផ្សាយពាណិជ្ជកម្ម

- Advertisment -

Most Popular