Home ព័ត៌មានជាតិ សេដ្ឋកិច្ច ​គម្រោង​ស្តា​...

​គម្រោង​ស្តា​របឹង​អូរ ២២ កន្លែង ទើប​អនុវត្ត ៤ មានការ​តវ៉ា ២​នៅមុខ​កំពូល​

​ដោយៈ ប​.​ខុន / ភ្នំពេញៈ គម្រោង​ស្តា​របឹង​អូរ ធម្មជាតិ ចំនួន ២២ កន្លែង ស្ថិតនៅ​ក្នុងស្រុក​មុខកំពូល ខេត្តកណ្តាល ទើបបាន​ចាប់ផ្តើម​អនុវត្ត លើ​គម្រោង ចំនួន​បួន មានការ​តវ៉ា ពីរ​កន្លែង ដែល​ក្នុងនេះ មួយកន្លែង នៅលើ​គម្រោង កំពុង​អនុវត្ត និង​មួយកន្លែង នៅលើ​ទីតាំង ទើប​លើក​ប៉ាណូ​គម្រោង ដោយសារ​គម្រោង​ទាំងនេះ ធ្វើឱ្យប៉ះពាល់​ដី ស្រែចម្ការ ដែល​ប្រជាពលរដ្ឋ បាន​អាស្រ័យ​ផល និង​ប៉ះពាល់​ដី​លំនៅដ្ឋាន​។​

​លោក អ៊ុក វណ្ណា ប្រធាន​មន្ទីរ​ធនធានទឹក និង ឧតុនិយម​ខេត្តកណ្តាល បានឱ្យ​រស្មី​កម្ពុជា​ដឹង នៅ​ថ្ងៃទី​២២ ខែធ្នូ ឆ្នាំ​២០២០​ថាៈ គម្រោង​ស្តា​របឹង​អូរ​ធម្មជាតិ​ចំនួន ២២ កន្លែង ស្ថិតនៅ​ក្នុងស្រុក​មុខកំពូល ខេត្តកណ្តាល ទើបបាន​ចាប់ផ្តើម​អនុវត្ត​លើ គម្រោង​ចំនួន​បួន ដែល​រួមមាន​គម្រោង​បែកក្អម​, ទំនប់​អំពៅ​ឌៀប , ទំនប់​តា​សែន និង​ព្រែក​ក្រង​ស្វាយ ក្រៅពីនេះ​បាន​ត្រឹម​លើក​ប៉ាណូ​គម្រោង សម្រាប់​អនុវត្ត​ចំនួន ៩ កន្លែង​នៅតាម​កន្លែង សំខាន់ៗ​មួយចំនួន មុននឹង​ឈានទៅ​ធ្វើការ​អនុវត្ត​។​

​គម្រោង​ទាំង​បួន​ខាងលើ លោក អ៊ុក វណ្ណា បានបញ្ជាក់​ថាៈ អនុវត្ត​ទើបបាន​ត្រឹម​ធ្វើការ​ឈូសឆាយ​សម្អាត​ព្រៃត្រែង ដើម្បី​ឈានទៅ​ធ្វើការ​វាស់វែង កំណត់​ព្រំ របស់​គម្រោង ដែល​ត្រូវអនុវត្ត​។ កន្លងទៅនេះ មិន​មានការ​ឈូសឆាយ​ធ្វើ​ប៉ះពាល់ ដល់ផ្ទះ​សម្បែង និង​ដីស្រែ​ចម្ការ របស់​អ្នកណា នៅឡើយ​ទេ​។ គម្រោង ទាំង​បួន​នេះ មានការ​តវ៉ា មួយកន្លែង គឺ​គម្រោង​ទំនប់​អំពៅ​ឌៀប នៅក្នុង​ឃុំ​សំបួរមាស ដែល​ត្រូវធ្វើ​ការកែលម្អ​ទំនប់​នៅ ជុំវិញ​បឹង​ឡើងវិញ​។ ឯ​ការតវ៉ា​របស់ ប្រជាពលរដ្ឋ នៅ​ទំនប់​ផ្លូវឆ្ការ​វិញ លោក​ប្រធាន​មន្ទីរ​ខាងលើ បាន​និយាយថាៈ ជា​កន្លែង​មិនទាន់បាន​អនុវត្ត​ទេ គឺ​ធ្វើបាន​ត្រឹម​លើក​ប៉ាណូ​គម្រោង ក៏មាន​ការដាក់ ពាក្យ​តវ៉ា ទៅដល់​ស្រុក​ខេត្ត និង​ក្រសួង​។ គម្រោង​ដែល​ក្រសួង​បាន លើកឡើង គឺ​ដើម្បី​ថែរក្សា​ការពារ​ផ្លូវទឹក​និង​បឹងបួរ​ដែលជា​សម្បត្តិ​រប​ស់រ​ដ្ឋ ត្រូវបាន​គេ រំលោភ​យក​។​

​លោក អ៊ុក វណ្ណា បាន​និយាយ ដោយ​ទទួលស្គាល់ថាៈ ដី​បឹងបួរ និង​ព្រែក មាននៅ​ក្នុងស្រុក​មុខកំពូល ត្រូវបាន​គេ​កាន់កាប់ គ្មាន​សល់ តាមរយៈ​ការលក់​ទិញ​ត​គ្នា ច្រើន​តំណ រហូតដល់​មាន​កន្លែង​ខ្លះ មានការ​កាន់កាប់ ជាន់គ្នា​ទៀតផង តែ​ដី​ទាំងនោះ ជា​បឹងបួរ​សាធារណៈ​របស់​រដ្ឋ​។ ទីតាំង​គម្រោង ដែល​បានលើកឡើង​បាន ធ្វើ​វេទិកាសាធារណៈ ដោយមាន​ការចូលរួម​ពី ប្រជា​ល​រដ្ឋ​នៅ​មូលដ្ឋាន នៅក្នុងពេល គម្រោង​នេះ អនុវត្ត​ពេញលេញ មានការ​ចូលរួម​កម្លាំង​ពលកម្ម ពី​ប្រជាពលរដ្ឋ តាមរយៈ​កម្មវិធី​សាច់ប្រាក់​ពលកម្ម ដូចជា​ការដាំ​ស្មៅ តាម​ជើង​ទំនប់​ជាដើម​។​

​គួរ​រំលឹក​ឱ្យដឹងថា ក្រសួង​ធនធានទឹក និង​ឧតុនិយម កាលពី​ថ្ងៃទី​១១ ខែកញ្ញា ឆ្នាំ​២០២០ បាន​ជម្រាប​ទៅ​ប្រធាន​មន្ទីរ​ធនធានទឹក និង​ឧតុនិយម ខេត្តកណ្តាល អំពី ការស្តារ​បឹងបួរ អូរ​ធម្មជាតិ ចំនួន ២២ កន្លែង ស្ថិតនៅ​ស្រុក​មុខកំពូល ខេត្តកណ្តាល ដោយ​នៅក្នុង​លិខិត លេខ ១៤៧៨ ធ​ទ​ឧ បានសរសេរថាៈ ដើម្បីឱ្យ​ក្រសួង ធនធានទឹក និង​ឧតុនិយម ធ្វើការ​អនុវត្ត​ផែនការ ការងារ​រយៈពេល​វែង លើ​វិស័យ​ធារាសាស្ត្រ ទទួលបាន​ជោគជ័យ ប្រកបដោយ​ប្រសិទ្ធភាព​ខ្ពស់ និង មាន​និរន្តរភាព​នោះ ក្រសួង​ធនធានទឹក និង​ឧតុនិយម និង​ធ្វើការ​ស្តារ​បឹងបួរ​អូរ​ធម្មជាតិ ចំនួន ២២ កន្លែង ក្រោម​ក្របខណ្ឌ​គម្រោង សាច់ប្រាក់​ពលកម្ម សម្រាប់​អភិវឌ្ឍន៍ ហេដ្ឋារចនាសម្ព័ន្ធ​ជនបទ និង​ការគាំទ្រ​កសិករ សម្រាប់​ការកំណត់ ព្រំប្រទល់​បឹងបួរ​អូរ ធម្មជាតិ ដើម្បី​រក្សា​ទុកជា​ទ្រព្យសម្បត្តិ របស់​រដ្ឋ ដែល​ស្ថិតនៅ​ស្រុក​មុខកំពូល ខេត្តកណ្តាល​។ ដូចនេះ ដើម្បីឱ្យ​ការងារ​ស្តារឡើងវិញ នូវ​បណ្តា​អនុ​គម្រោង ខាងលើ ប្រព្រឹត្តទៅ​បានល្អ និង​ទទួលបាន​ជោគជ័យ សូម​លោក​ប្រធាន ចាត់វិធានការ ជាមួយនឹង​អាជ្ញាធរ​ដែនដី ដែល​ពាក់ព័ន្ធ គ្រប់លំដាប់​ថ្នាក់ ក្នុងការ​អនុវត្ត គម្រោង​ខាងលើ រួមមាន លោក​អភិបាលស្រុក មេឃុំ ប្រធានភូមិ ដើម្បី​ធ្វើការ​សហការ ជាមួយនឹង​ផ្នែក​គ្រប់គ្រង​គម្រោង​របស់​ក្រសួង ក្នុងការ​អនុវត្ត សកម្មភាព​ការងារ ស្តារ​បឹងបួរ អូរ​ធម្មជាតិ ឱ្យ​សម្រេច បានល្អ​ប្រសើរ ប្រកបដោយ ប្រសិទ្ធភាព​ខ្ពស់ និង​មាន​និរន្តរភាព​។​

​គម្រោង​ខាងលើនេះ លើកឡើង ដោយ​ក្រសួង​ធនធានទឹក និង​ឧតុនិយម ដឹកនាំ​ធ្វើ​ដោយ​លោក ចាន់ ស៊ី​ណាត អនុរដ្ឋលេខាធិការ ក្រសួង​ធនធានទឹក និង​ឧតុនិយម ជា​អ្នកគ្រប់គ្រង គម្រោង​សាច់ប្រាក់​ពលកម្ម ដែល​ចេញ​ការចំណាយ ដោយ​សួង​សេដ្ឋកិច្ច និង​ហិរញ្ញវត្ថុ​។​

​គម្រោង​សាច់ប្រាក់​ពលកម្ម ជំហាន​ពីរ ដែល​រាជរដ្ឋាភិបាល​កម្ពុជា សម្រេច​ឱ្យ​អនុវត្ត នៅក្នុង​ឆ្នាំ​២០២០ គឺ​ក្នុង​គោលបំណង​ឱ្យ​ពលករ ដែល​បាត់បង់​ការងារ ធ្វើ​នៅ កន្លែង​ផ្សេង មានការ​ងារ​ធ្វើ នៅ​មូលដ្ឋាន តាមរយៈ​កម្មវិធី​សាច់ប្រាក់​ពលកម្ម បាន​ប្រាក់ចំណូល បាន​សមិទ្ធផល សម្រាប់​ប្រើប្រាស់​នៅ​មូលដ្ឋាន ដើម្បី​ពង្រឹង ស្ថេរភាព​ជីវភាព​ប្រចាំថ្ងៃ​។ កម្មវិធី​នេះ ត្រូវបាន​រាជរដ្ឋាភិបាល ផ្តល់ឱកាស​ឱ្យ​ប្រជាពលរដ្ឋ ចូលធ្វើ​ពលកម្ម ជំនួស​គ្រឿងចក្រ តាមរយៈ​ក្រសួង​អភិវឌ្ឍន៍ជនបទ ក្រសួង​ធនធានទឹក និង​ឧតុនិយម និង​អគ្គិសនី​កម្ពុជា​។ គម្រោង​សាច់ប្រាក់​ពលកម្ម ជំហាន ពីរ ចាប់​អនុវត្ត​ពី​ឆ្នាំ ២០២០ ដល់​ឆ្នាំ ២០២២ ដោយនៅ​ក្រសួង ធនធានទឹក ទទួលបាន​ពី​គម្រោង​នេះ សម្រាប់​អនុវត្ត​ការជីក​ស្តារ​ប្រឡាយ​ជើង​ក្អែប ប្រវែង ២.៣៨៤ គីឡូម៉ែត្រ​(២០២០)​។​

​ឯ​ចំណែក​គ្រឿងចក្រ ជាច្រើន​គ្រឿង ដែល​គេ​បាន​យកមកប្រើ ក្នុង​គម្រោង​នេះ នៅ​ស្រុក​មុខកំពូល កន្លងទៅនេះ ត្រូវបាន​គេ​និយាយថា មិនមែនជា​គ្រឿងចក្រ គ្រប់គ្រង ដោយ​ក្រសួង​ធនធានទឹក និង​ឧតុនិយម​ទេ គឺជា​គ្រឿងចក្រ​របស់​ឯកជន ដែល​ត្រូវបាន​ជួល​មក ដោយ​ក្រុមការងារ​របស់​គម្រោង ដើម្បី​ព​ន្លឿ​ន​ការងារ នៅ​កន្លែង​ដែល​មិនអាច​ធ្វើបាន ដោយ​កម្លាំង​ពលកម្ម​បាន​៕


ទីតាំងផ្សាយពាណិជ្ជកម្ម

- Advertisment -

Most Popular