Home ព័ត៌មានសំខាន់ៗ កម្ពុជា​-​សិង...

កម្ពុជា​-​សិង្ហ​បុរី នឹង​សហការគ្នា​ថែមទៀត​ដើម្បី​ជំរុញ​វិស័យសេដ្ឋកិច្ច ពាណិជ្ជកម្ម​ឱ្យ​កាន់តែ​ល្អប្រសើរ​

​ដោយ​: ពៅ​និមល​/​ភ្នំពេញ​: ខណៈដែល​រដ្ឋាភិបាល​ប្រទេស​កម្ពុជា​និង​សិង្ហ​បុរី គ្រោង​នឹង​ចុះហត្ថលេខា​ជា​មួយគ្នា ដើម្បី​រួមសហការ​គ្នា​បង្កើត​មជ្ឍមណ្ឌល​ភស្ដុភារ​កម្ម​ភ្នំពេញ​នៅ​តំបន់​សេដ្ឋកិច្ច​ពិសេស​ភ្នំពេញ​នាពេល​ខាងមុខនេះ ភាគី​ទាំងពីរ​រំពឹងទុក​ថា នឹង​ជំរុញ​វិស័យសេដ្ឋកិច្ច ពាណិជ្ជកម្ម​ឱ្យ​កាន់តែ​ល្អប្រសើរ​ថែមទៀត​។

នៅក្នុង​ជំនួប​សម្ដែង​ការគួរសម និង​ជម្រាបលា​ក្នុងឱកាស​ដែល​លោក Michael Tan Keng Siong ឯកអគ្គ​រដ្ឋទូត​សិង្ហ​បុរី​ប្រចាំ​កម្ពុជា នឹងត្រូវ​បញ្ចប់​អណ​ត្តិ​បេសកកម្ម​ការទូត​នៅ​កម្ពុជា កាលពី​ថ្ងៃទី​២២ ខែធ្នូ ឆ្នាំ​២០២០​កន្លងទៅ នៅ​ទីស្តីការក្រសួង លោក​បាន​ជម្រាបជូន​លោក​រដ្ឋមន្ដ្រី​ក្រសួងពាណិជ្ជកម្ម​ថា កម្ពុជា​និង​សិង្ហ​បុរី ជា​ប្រទេស​តូច​មែន ប៉ុន្ដែ​មានការ​បើក​ជំហរ​សេដ្ឋកិច្ច​ដូចគ្នា​។ លោក​បញ្ជាក់ទៀតថា ការបង្កើត​មជ្ឍមណ្ឌល​ភស្ដុ​ភារ​​កម្ម​ភ្នំពេញ​នៅ​តំបន់​សេដ្ឋកិច្ច​ពិសេស​ភ្នំពេញ គឺ​ដើម្បី​ជួយ​គាំពារ​ដល់​ខ្សែ​ច្រ​វ៉ា​ក់​ផ្គត់ផ្គង់​។​

​លោក​រដ្ឋមន្ត្រី ប៉ាន សូរ​ស័ក្តិ បាន​លើកឡើងថា កម្ពុជា និង​សិង្ហ​បុរី ជា​មិត្ត​ជិតស្និត ហើយ​តែងតែ​រួមសហការ​គ្នា​ដើម្បី​ទាញយក​ផលប្រយោជន៍​ទៅវិញទៅមក ក្នុង​គ្រប់​វេទិកា​ទាំងអស់ ទាំង​នៅ​អង្គការ​ពាណិជ្ជកម្ម​ពិភពលោក អង្គការ​កម្មសិទ្ធិបញ្ញា​ពិភពលោក អាស៊ាន និង​វេទិកា​ផ្សេងៗ​ទៀត​ជាដើម​។ លោក​បន្ថែមថា កន្លងមក​ក្រសួង​ពាណិជ្ជកម្ម​ក៏បាន​យកចិត្តទុកដាក់​ជួយ​ដោះស្រាយ​បញ្ហា​ដែល​ធុរជន​សិង្ហ​បុរី​ជួបប្រទះ​កន្លងមក​ផងដែរ​។​

ជា​កិច្ចបញ្ចប់​នៃ​ជំនួប ភាគី​សិង្ហ​បុរី បានស្នើ​សុំឱ្យ​រដ្ឋមន្ត្រី​ពាណិជ្ជកម្ម​បន្ដ​ការគាំទ្រ និង​កិច្ចសហប្រតិបត្តិការ​ជាមួយនឹង​ឯកអគ្គរដ្ឋទូត​ដែល​មកកាន់​អណ​ត្តិ​ថ្មី​។

​ជាការ​ឆ្លើយតប លោក​រដ្ឋមន្ដ្រី បាន​ជម្រាប​ភាគី​ជំនួប​វិញ​ថា លោក​នឹង​បន្ដ​សហការ​ជាមួយ ដោយ​ក្រសួង​ពាណិជ្ជកម្ម​កន្លង​មក មាន​ទំនាក់ទំនង និង​កិច្ចសហប្រតិបត្តិកា​រយ៉ា​ង​ល្អ​ជាមួយគ្នា​កន្លងមក ដើម្បី​ជុំរុញ​កិច្ច​សហ​ប្រតិ​ប​ត្ត​ទ្វេភាគី​រវាង​ប្រទេស​ទាំងពីរ​បន្ដទៀត​៕​

ទីតាំងផ្សាយពាណិជ្ជកម្ម

- Advertisment -

Most Popular