Home ព័ត៌មានជាតិ សន្តិសុខ ឃុំខ្លួន​បុរស...

ឃុំខ្លួន​បុរស​ម្នាក់ ដែល​ចាប់​នារី​វ័យ​១៦​ឆ្នាំ យកទៅ​បង្ខាំង​ទុក រួច​រំលោភ​សេពសន្ថវៈ

ដោយៈ​ស​រិ​ទ្ធ / ភ្នំពេញៈ បុរស​ម្នាក់ ដែល​ចាប់​នារី​វ័យ​១៦​ឆ្នាំ​ម្នាក់ បង្ខាំង​ទុក រួច​រំលោភ សេពសន្ថវៈ ព្រមទាំង​ទូរស័ព្ទ​ជំរិត​ទារប្រាក់ ពី​ក្រុមគ្រួសារ ចំនួន ១០​លាន​រៀល ផង​នោះ បាន​ត្រូវ​តុលាការ សម្រេច​ឃុំខ្លួន ដាក់ពន្ធនាគារ នៅ​ព្រឹក​ថ្ងៃទី​២៣ ខែធ្នូ ឆ្នាំ​២០២០​។​

​បុរស​រូបនេះ ឈ្មោះ សៅ ប្រុស ហៅ បញ្ញា អាយុ​៣៧​ឆ្នាំ មុខរបរ មិន​ពិតប្រាកដ ស្នាក់នៅ បន្ទប់​ជួល ផ្លូវលំ ភូមិ​ស្រែ​ក្នុង សង្កាត់​កន្ទោក ខណ្ឌ​កំបូល រាជធានី​ភ្នំពេញ ។ ចំណែក​នារី រងគ្រោះ អាយុ​១៦​ឆ្នាំ មុខរបរ​សិស្ស ស្នាក់នៅ​ស្រុក​រលាប្អៀរ ខេត្តកំពង់ឆ្នាំង ។​

​យោងតាម​របាយការណ៍ ពី​អធិការដ្ឋាន​នគរបាល ខណ្ឌ​កំបូល នៅ​ថ្ងៃទី​២០ ខែធ្នូ កន្លងទៅ ថ្មីៗ​នេះ បាន​បញ្ជាក់ថា កាលពី​ថ្ងៃទី​១៦ ខែធ្នូ ឆ្នាំ​២០២០ មាន​ករណី​បង្ខាំង​មនុស្ស ជំរិត​ទារ ប្រាក់ និង​រំលោភ​សេពសន្ថវៈ នៅ​ចំណុច​តាម​ផ្លូវលំ ស្រប​ផ្លូវ​រថភ្លើង ភូមិ​ស្រែ​ក្នុង សង្កាត់ កន្ទោក ខណ្ឌ​កំបូល ។​

​ក្រោយពី​បានទទួល​ពាក្យបណ្ដឹង ពី​ម្ដាយ​របស់​នារី​រងគ្រោះ ថា​មាន​គេ​ទូរស័ព្ទ​ជំរិត​ទារប្រាក់ ចំនួន ១០ លាន​រៀល ជា​ថ្នូរ​នឹង​ការដោះលែង កូនស្រី​រួចមក កម្លាំង​ព្រហ្មទណ្ឌ​ខណ្ឌ​កំបូល សហការ​ជាមួយ ការិយាល័យ​ព្រហ្មទណ្ឌ​ធ្ងន់ នៃ​ស្នងការដ្ឋាន​នគរបាល រាជធានី​ភ្នំពេញ នាយកដ្ឋាន​នគរបាល​ព្រហ្មទណ្ឌ ក្រសួងមហាផ្ទៃ និង​កម្លាំង​នគរបាល​ខណ្ឌដង្កោ ចុះ​ស្រាវជ្រាវ រហូតដល់​ម៉ោង ១១:៣០​នាទី ព្រឹក ថ្ងៃទី​១៧ ខែធ្នូ ឆ្នាំ​២០២០ ទើប​ឃាត់ខ្លួន ជនសង្ស័យ​បាន នៅ​ចំណុច​តាមផ្លូវ​បេតុង ភូមិ​ថ្មី សង្កាត់​ដង្កោ ខណ្ឌដង្កោ និង​បាន​រំដោះ​នារី ដែលជា​ជនរងគ្រោះ ចេញពី​ការ​បង្ខាំង បាន​ដោយ​សុវត្ថិភាព ៕/V​-PC

ទីតាំងផ្សាយពាណិជ្ជកម្ម

- Advertisment -



Most Popular