Home ព័ត៌មានសំខាន់ៗ រដ្ឋមន្ត្រី​ក...

រដ្ឋមន្ត្រី​ក្រសួងបរិស្ថាន គាំទ្រ​គម្រោង​ស្រូវ​មិត្តភាព​សង្គ្រោះ​សត្វព្រៃ

ដោយៈ ទេព មង្គល / ភ្នំពេញៈ សំដៅលើ​ការគាំទ្រ​គម្រោង​ស្រូវ មិត្តភាព សង្គ្រោះ​សត្វ ព្រៃ​នោះ លោក សាយ សំ​អាល់ រដ្ឋមន្ត្រី​ក្រសួងបរិស្ថាន បាន​មានប្រសាសន៍ កាលបី​ថ្ងៃទី ២៣ ធ្នូ ក្នុង​ពិធី​សម្ពោធ​ក្រុមហ៊ុន អាយ​ប៊ី​ស​រ៉ា​យស៍ ខន់​សើ​វ​សិន នៅ​រាជធានី​ភ្នំពេញ​ថាៈ ” គម្រោង​ស្រូវ​មិត្តភាព សង្គ្រោះ​សត្វព្រៃ ជា​ឧ​ត្ត​មា​នុ​វត្ត​មួយ​នៃ​យន្តការ ការទូទាត់​សេវា បរិស្ថាន ដែលមាន​ការចូលរួម​ពី សហគមន៍​មូលដ្ឋាន នៅក្នុង​តំបន់ការពារធម្មជាតិ ដោយបាន​រួមចំណែក ការពារ​ធនធានធម្មជាតិ និង​អភិរក្ស​ជីវៈចម្រុះ​នៅ​កម្ពុជា “​។​

​ក្នុងឱកាស​នោះ លោក​រដ្ឋមន្ត្រី បាន​គាំទ្រ​ចំពោះ​ល័ក្ខខ័ណ្ឌ ដែល​គម្រោង​ស្រូវ​មិត្តភាព សង្គ្រោះ​សត្វព្រៃ (​ឬ​ស្រូវ​ត្រយង​យក្ស ឬ ស្រូវ​អាយ​ប៊ី​ស​) អនុវត្តតាម​គោលការណ៍ សរីរាង្គ​សំខាន់ៗ ដែល​ផ្សារភ្ជាប់ ជាមួយនឹង​ការគោរព បទដ្ឋាន​បរិស្ថាន និង​ការការពារ ធនធានធម្មជាតិ​។ ជាមួយគ្នានេះដែរ លោក​រដ្ឋមន្ត្រី បាន​ថ្លែងអំណរគុណ ដល់​អង្គការ WCS អង្គការ​សន្សំ​ម្លប់​ព្រៃ ក្រុមហ៊ុន​អាយ​ប៊ី​ស​រ៉ា​យស៍ និង ដៃគូ​ដែល​បាន​យក​គម្រោង​នេះ មក​អនុវត្ត​ជាមួយ ប្រជាកសិករ ដែល​រស់នៅក្នុង​តំបន់ ការពារ​ធម្មជាតិ និង បាន​លើកទឹកចិត្ត ឱ្យ​គម្រោង​បន្ត​ពង្រីក​សកម្មភាព ទៅ​តំបន់​ផ្សេងៗ​ទៀត ដើម្បី​លើកកម្ពស់​ជីវភាព ប្រជាពលរដ្ឋ នៅតាម​មូលដ្ឋាន និង​ការបង្កើន​កេ​រ្ត៍​ឈ្មោះ ផលិតផល ស្រូវ​ត្រយង​នៅលើ ទីផ្សារ​ក្នុងស្រុក និង​នាំ​ចេញទៅ​អន្តរជាតិ កាន់តែច្រើន​។​

​លោក កែន សេរី​រដ្ឋា នាយក​កម្មវិធី​ប្រចាំ​ប្រទេស នៃ​អង្គការ​សមាគម​អភិរក្ស​សត្វព្រៃ នៅ​កម្ពុជា (WCS) បានឱ្យដឹងថាៈ ការអនុវត្ត​គម្រោង​ស្រូវ​ត្រយង អនុវត្ត​ទទួលបាន ជោគជ័យ នៅ​ដែនជម្រកសត្វព្រៃ គូលែន​ព្រហ្ម​ទេព ខេត្តព្រះវិហារ និង​ដែនជម្រកសត្វព្រៃ សៀម​ប៉ាង នៅ​ស្រុក​សៀម​ប៉ាង ខេត្តស្ទឹងត្រែង និង​បន្ទាប់មក​បាន​ទៅដល់​ដែន​ជម្រក សត្វព្រៃ កែវ​សីមា ខេត្តមណ្ឌលគិរី​។ បច្ចុប្បន្ន ផលិតផល​ស្រូវ​ត្រយង រួមមាន អង្ករ​អាយ​ប៊ី​ស អាហារសម្រន់​អា​ប៊ី​ស និង​នំដុត​អាយ​ប៊ី​ស ត្រូវបាន​ផលិត និង​នាំ​យកទៅលក់​នៅលើ​ទី ផ្សារ​ធំៗ ក្នុងស្រុក និង​ទីផ្សារ​អន្តរជាតិ​។​

​សូមបញ្ជាក់ថា គម្រោង​ស្រូវ​មិត្តភាព​សង្គ្រោះ​សត្វព្រៃ បានកំណត់​ឱ្យ​កសិករ​ទាំងអស់ គោរព​តាម​គោលការណ៍ សរីរាង្គ​ចំនួន ១២ ចំណុច ក្នុងនោះ​មាន គោរព​គោលការណ៍ សរីរាង្គ ដែល​មិន​ប្រើប្រាស់​ជីគីមី ឬក៏​ថ្នាំ​គីមី ឬ​ថ្នាំ​សម្លាប់​សត្វល្អិត មួយចំនួនទៀត គោរព​ទៅនឹង​គោលការណ៍​ដាំ​ដុះ តាម​បទដ្ឋាន​បច្ចេកទេស និង​មិន​កាប់​រាន​ដីព្រៃ​បន្ថែម ព្រមទាំង​ត្រូវ​ចូលរួម​ការពារ និង​អភិរក្ស​សត្វព្រៃ​។ បើ​អនុវត្តបាន កសិករ​មាន​សិទ្ធិ​ពេញ លេញ ក្នុង​ការលក់​ស្រូវ ជូន​គម្រោង ក្នុង​តម្លៃលើស​ទីផ្សារ​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular