ឥស្សរជន និង​បញ្ញាវន្ត​២៣ រូប​ចូល​បំពេញ​មុខងារ​នៅ​គណ​:​ប្រឹក្សា​យោបល់​វិទ្យាសាស្ត្រ បច្ចេកវិទ្យា និង​នវានុវត្តន៍​

ដោយៈ ជា សីហៈ​/​ភ្នំពេញៈ ឥស្សរជន និង​បញ្ញាវន្ត​២៣ រូប​បាន​ចូល​បំពេញ​មុខងារ នៅ​គណ​:​ប្រឹក្សា​យោបល់​វិទ្យាសាស្ត្រ បច្ចេកវិទ្យា និង​នវានុវត្តន៍ របស់​ក្រុម​ប្រឹក្សាជាតិ វិទ្យាសាស្ត្រ បច្ចេកវិទ្យា និង​នវានុវត្តន៍ កាលពី​ថ្ងៃទី​២២ ខែធ្នូ ឆ្នាំ​២០២០ ។

​ក្រុមប្រឹក្សា​ជាតិ​វិទ្យាសាស្ត្រ បច្ចេកវិទ្យា និង​នវានុវត្តន៍ ជា​ក្រុម​ប្រឹក្សាជាតិ​មួយ ដែលមាន សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា ជា​ប្រធានកិត្តិយស និង​លោក ចម ប្រសិទ្ធ ទេសរដ្ឋមន្ត្រី និង​ជា​រដ្ឋមន្ត្រីក្រសួង ឧស្សាហកម្ម បច្ចេកវិទ្យា និង​នវានុវត្តន៍ ជា​ប្រធាន រួមជាមួយ​អនុប្រធាន និង​សមាជិក​សរុប​ទាំងអស់ ចំនួន​៣៨ រូប​។

​លោក ចម ប្រសិទ្ធ បានចាត់ទុក​ឥស្សរជន និង​បញ្ញវន្ត ដែល​ត្រូវ បានតែងតាំង​ទាំងអស់ គឺជា​ធនធាន​ខួរក្បាល របស់​ជាតិ ដ៏​សំខាន់ ពីព្រោះ អ្នក​ទាំងអស់គ្នា​សុទ្ធតែ ទទួលបាន ការ​ទំនុកបម្រុង​គាំទ្រ​ពី​រាជរដ្ឋាភិបាល ដើម្បី​បាន​ទៅ​បណ្តុះបណ្តាល​ផ្នែក​វិទ្យាសាស្ត្រ និង បច្ចេកវិទ្យា​ក្នុង​មុខជំនាញ​ផ្សេងៗ​គ្នា​ទាំង​ក្នុង និង​ក្រៅប្រទេស ។

​លោក​ទេសរដ្ឋមន្ត្រី បាន​សង្កត់ធ្ងន់ថា​នេះ ជា​ឱកាស​របស់​ឥស្សរជន និង​បញ្ញវន្ត​ទាំងអស់គ្នា ក្នុងការ​បញ្ចេញ​ចំណេះ​ជំនាញ និង​បទពិសោធន៍​ដែល​ខ្លួន​បាន​សិក្សា​រៀនសូត្រ កន្លងមក សម្រាប់​ចូលរួម​បម្រើ​ជាតិ មាតុភូមិ និង​ពលរដ្ឋ ស្រប​ពេលដែល​ប្រទេសជាតិ ក៏ដូចជា ពិភពលោក កំពុងមាន​ការវិវឌ្ឍ​ន៍​ខ្លាំងក្លា​ផ្នែក​វិទ្យាសាស្ត្រ និង​បដិវត្តន៍​ឧស្សា​កម្ម​ជំនាន់ ៤.០ ។

​លោក ចម ប្រសិទ្ធ បាន​រំលឹក​ផងដែរ​ថា កាលពី​១០​ឆ្នាំមុន រាជរដ្ឋាភិបាល​បាន​បង្កើត ក្រុម​ប្រឹក្សាជាតិ វិទ្យាសាស្ត្រ និង បច្ចេកវិទ្យា និង​បាន​បំពេញការងារ​បាន​មួយ​ជំ​ហ៊ាន ហើយ​ផងដែរ ក៏ប៉ុន្តែ យើង​មិនទាន់​ប្រមូលផ្តុំ​បាន​នូវ​កំលាំង​ធនធាន​រួម​របស់​យើង សម្រាប់ធ្វើ​ការងារ​នេះ​ឲ្យ​ចំ​គោលដៅ និង​ស្រប​និង​និន្នាការ​វិវឌ្ឍន៍​ដ៏​ឆាប់រហ័ស​នាពេល បច្ចុប្បន្ន ។ ដូច្នេះហើយ ទើប​នៅ​ចុងឆ្នាំ​២០១៩ ប្រមុខ​រាជរដ្ឋាភិបាល ក្រោម​ចក្ខុវិស័យ​ដ៏ មុត​ស្រួច បានដាក់​ចេញ​នូវ​គោលនយោបាយ​មួយ​ទាក់ទង​ការអភិវឌ្ឍន៍​វិស័យ​វិទ្យាសាស្ត្រ បច្ចេកវិទ្យា និង នវានុវត្តន៍ ពី​ឆ្នាំ ២០២០ -២០៣០ ហើយក៏ សម្រេច​ប្តូរ​ឈ្មោះ​អតីត​ក្រសួង ឧស្សាហកម្ម និង​សិប្បកម្ម ទៅជា​ក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ដើម្បី​ឲ្យ​មាន​ក្បាលម៉ាស៊ីន​ដឹកនាំ​ច្បាស់លាស់ រួច​ធ្វើការ​ប្រមូលផ្តុំ​អ្នកវិទ្យាសាស្ត្រ ទាំងអស់ ដែល​នៅ​ស្ថាប័ន​ផ្សេងៗ​គ្នា ចូលក្នុង​បញ្ជីសារពើភ័ណ្ឌ​មួយ សម្រាប់​អង្គុយ​រួមគ្នា ធ្វើការ ។

​លោក​ទេសរដ្ឋមន្ត្រី​សង្ឃឹមថា ឥស្សរជន និង​បញ្ញវន្ត ដែល​ត្រូវ​តែងតាំង​ទាំងអស់​នឹង សម្រួច​ចំណេះ​ជំនាញ​របស់ខ្លួន​ដែល​បាន​ខិតខំ​សិក្សា​រួចហើយ ទោះ​កន្លងមក អ្នកខ្លះ ធ្វើ​ការខុស​មុខជំនាញ​រៀនសូត្រ ក៏ដោយ តែ​ពេលនេះ​ជា​ឱកាស​ក្នុងការ​បំពេញការងារ ជូន​ជាតិ​ប្រកប ដោយ​មោទនភាព ពីព្រោះ​រាជរដ្ឋាភិបាល បាន​លើកទឹកចិត្ត​តែងតាំង ក្នុង​មុខនាទី​មួយ​ដ៏​ខ្ពង់ខ្ពស់​តាម​បទពិសោធន៍ ចំណេះ ជំនាញ និង​សញ្ញប​ត្រ​ដែល​ខ្លួន​មាន គឺ​បានតែងតាំង​ចាប់ពី​ឋាន​:​ស្មើ​រដ្ឋលេខាធិការ អនុរដ្ឋលេខាធិការ និង​អគ្គនាយក​ឡើងទៅ ៕/PC​

ទីតាំងផ្សាយពាណិជ្ជកម្ម

- Advertisment -

Most Popular