Home ព័ត៌មានសំខាន់ៗ ​ក្រុមប្រឹក្ស...

​ក្រុមប្រឹក្សាធម្មនុញ្ញ បដិសេធ​បណ្តឹង ចំនួន ២៣ បន្ថែមទៀត របស់​គណបក្ស​សម្ព័ន្ធ ដើម្បី​ប្រជាធិបតេយ្យ​

​ដោយៈ មុនី​រ័ត្ន / ភ្នំពេញៈ ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ ដែលមាន​លោក កិត្តិ​នីតិកោសល​បណ្ឌិត អ៊ឹម ឈុនលឹម ប្រធាន​ក្រុមប្រឹក្សាធម្មនុញ្ញ និង​ជា​ប្រធាន​ក្រុមប្រឹក្សា​ជំនុំជម្រះ នៅ​ព្រឹក​ថ្ងៃទី​២៣ ខែធ្នូ ឆ្នាំ​២០២០​នេះ បាន​បន្ត​បើកសវនាការ ជា​សាធារណៈ ដើម្បី​ពិនិត្យ និង​សម្រេច លើ​សំណុំរឿង ចំនួន ២៣ គឺ​សំណុំរឿង​របស់​សមាជិក និង​ភ្នាក់ងារ​គណបក្ស​សម្ព័ន្ធ ដើម្បី​ប្រជាធិបតេយ្យ ដែល​បាន​ប្តឹងតវ៉ា​នឹង​សេចក្តីសម្រេច របស់​គណៈកម្មាធិការ​ជាតិ រៀបចំ​ការបោះឆ្នោត ពាក់ព័ន្ធ​នឹង​បញ្ជី​បោះឆ្នោត​ដំបូង​។​

​នៅក្នុង​អង្គ​សវនាការ មានការ​ចូលរួម​ពី សំណាក់​សមាជិក​គណៈកម្មាធិកា​រ​ជាតិ រៀបចំ​ការបោះឆ្នោត (​គ​.​ជ​.​ប​) ព្រមទាំង​សាធារណជន​ផងដែរ​។ ចំណែក​សមាជិក និង​ភ្នាក់ងារ​គណបក្ស​សម្ព័ន្ធ ដើម្បី​ប្រជាធិបតេយ្យ ដែលជា​ដើមបណ្ដឹង មិនបាន​ចូលរួម​សវនាការ​នោះទេ​។​

​លោក ព្រហ្ម វិចិត្រ​អ​ក្ខា​រា អគ្គលេខាធិការរង និង​ជា​អ្នកនាំពាក្យ ក្រុមប្រឹក្សាធម្មនុញ្ញ បានបញ្ជាក់​ថាៈ នៅក្នុង​នីតិវិធី​អនុវត្ត ចំពោះមុខ​ក្រុមប្រឹក្សាធម្មនុញ្ញ ការ​អវត្តមាន របស់​ដើមបណ្តឹង (​គណបក្ស​សម្ព័ន្ធ ដើម្បី​ប្រជាធិបតេយ្យ​) មិន​ប៉ះពាល់​ដល់ ការអនុវត្ត​នីតិវិធី របស់​ក្រុមប្រឹក្សា​ជំនុំជម្រះ របស់​ក្រុមប្រឹក្សាធម្មនុញ្ញ​ឡើយ​។ ការមិន​ចូល​សវនាការ គឺជា​សិទ្ធិ​របស់​ដើមបណ្តឹង ដែល​បដិសេធ មិន​ចូលរួម​សវ​កា​នា ហើយក៏​ជា​សិទ្ធិ របស់​ក្រុមប្រឹក្សា​ជំនុំជម្រះ ក្រុមប្រឹក្សាធម្មនុញ្ញ ក្នុងការ​សម្រេចសេចក្តី ដែល​អវត្តមាន ដើមបណ្តឹង បែបនេះ​។​

​អ្នកនាំពាក្យ ក្រុមប្រឹក្សាធម្មនុញ្ញ បានបញ្ជាក់​ទៀតថាៈ សំណុំរឿង ចំនួន ២៣ នេះ ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ បានសម្រេច​ច្រានចោល​បណ្តឹង ទាំង ២៣ របស់​គណបក្ស​សម្ព័ន្ធ ដើម្បី​ប្រជាធិបតេយ្យ ដោយ​សេចក្តីសម្រេច​នេះ គឺជា​សេចក្តីសម្រេច​បិទផ្លូវ​តវ៉ា មាន​អនុភាព លុប​លើ​រាល់​អំណាច​ទាំងអស់ ដូច​មាន ចែង​ក្នុង​រដ្ឋធម្មនុញ្ញ​។​

​សូមជម្រាបថា ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ កាលពី​ថ្ងៃទី​២១ ខែធ្នូ ឆ្នាំ​២០២០ បាន​បើកសវនាការ ជា​សាធារណៈ ដើម្បី​ពិនិត្យ និង​សម្រេច​លើ សំណុំរឿង ចំនួន ២៨ របស់​សមាជិក និង​ភ្នាក់ងារ​គណបក្ស​សម្ព័ន្ធ ដើម្បី​ប្រជាធិបតេយ្យ ដែល​បាន​ប្តឹងតវ៉ា​នឹង​សេចក្តីសម្រេច របស់​គណៈកម្មាធិការ​ជាតិ រៀបចំ​ការបោះឆ្នោត ពាក់ព័ន្ធ​នឹង​បញ្ជី​បោះឆ្នោត​ដំបូង​។​

​បន្ទាប់ពី​សវនាការ សួរដេញដោល ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ បាន​បដិសេធចោល ចំពោះ​បណ្តឹង ចំនួន ២៨ របស់​គណបក្ស​សម្ព័ន្ធ ដើម្បី​ប្រជាធិបតេយ្យ​។ ដោយឡែក នៅ​ថ្ងៃទី​២៣ ខែធ្នូ ឆ្នាំ​២០២០ ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ បាន​បើកសវនាការ​បន្ត ដោយបាន​សម្រេច​ច្រានចោល​បណ្តឹង ចំនួន​២៣ របស់​គណបក្ស​សម្ព័ន្ធ ដើម្បី​ប្រជាធិបតេយ្យ​។ សរុប​បណ្តឹង​ចំនួន ៥១ របស់​គណបក្ស​សម្ព័ន្ធ ដើម្បី​ប្រជាធិបតេយ្យ ដែល​បាន​ប្តឹងតវ៉ា​នឹង​សេចក្តីសម្រេច របស់​គណៈកម្មាធិការ​ជាតិ រៀបចំ​ការបោះឆ្នោត ពាក់ព័ន្ធ​នឹង​បញ្ជី​បោះឆ្នោត​ដំបូង ត្រូវបាន​ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ បាន​បដិសេធចោល ដោយ​នៅសល់​បណ្តឹង​ចំនួន ៤៤ ទៀត របស់​គណបក្ស​សម្ព័ន្ធ ដើម្បី​ប្រជាធិបតេយ្យ ដែល​ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ នឹង​លើក​យកមក​សវនាការ​ជំនុំជម្រះ នៅ​ថ្ងៃទី​២៥ ខែធ្នូ ឆ្នាំ​២០២០​។​

​សរុប​ទាំងអស់ បណ្តឹង​របស់ គណបក្ស​សម្ព័ន្ធ ដើម្បី​ប្រជាធិបតេយ្យ ដែល​ប្តឹងតវ៉ា​នឹង​សេចក្តីសម្រេច របស់​គណៈកម្មាធិការ​ជាតិ រៀបចំ​ការបោះឆ្នោត ពាក់ព័ន្ធ​នឹង​បញ្ជី​បោះឆ្នោត​ដំបូង គឺមាន​ចំនួន ៩៥ បណ្តឹង​៕/V​/សរន

 

ទីតាំងផ្សាយពាណិជ្ជកម្ម

- Advertisment -

Most Popular