Home ព័ត៌មានជាតិ សង្គម ​រដ្ឋមន្ត្រី​...

​រដ្ឋមន្ត្រី​ក្រសួងបរិស្ថាន​៖ ក្រសួងបរិស្ថាន តែឯង មិនអាច​ធានាបាន នូវ​កិច្ច​គាំពារ​បរិស្ថាន ការការពារ​ធនធាន​ធម្មជាតិ និង​ការអភិរក្ស​ជីវៈចម្រុះ បានឡើយ​

ដោយៈ ដេប៉ូ / ភ្នំពេញៈ «​ក្រសួងបរិស្ថាន តែឯង​មិនអាច​ធានាបាន នូវ​កិច្ច​គាំពារ​បរិស្ថាន ការការពារ​ធនធាន​ធម្មជាតិ និង​ការអភិរក្ស​ជីវៈចម្រុះ បានឡើយ ប្រសិនបើ​គ្មាន​ការចូលរួម ប្រកបដោយ​សម្បជញ្ញៈ​និង​ការទទួលខុសត្រូវ ពី​សំណាក់​មន្ត្រីរាជការ កងកម្លាំងប្រដាប់អាវុធ គ្រប់លំដាប់​ថ្នាក់ និង​ប្រជាពលរដ្ឋ ទាំងអស់​»​។ នេះ​ជាការ​លើកឡើង​របស់ លោក សាយ សំ​អាល់ រដ្ឋមន្ត្រី​ក្រសួងបរិស្ថាន​។​

​ថ្លែង​នៅក្នុង​ពិធី​ផ្តល់​បាឋកថា តាម​ប្រព័ន្ធ​អន​ឡាញ ស្តីពី​«​កិច្ច​គាំពារ​បរិស្ថាន ការគ្រប់គ្រង​ធនធានធម្មជាតិ និង​ការអភិរក្ស​ជីវៈចម្រុះ ជូន​សិស្ស​មន្ត្រីជាន់ខ្ពស់ ជំនា​ន់ទី​១១ និង​កម្មសិក្សាការី ឆ្នាំ​២០២០ នៃ​សាលា​ភូមិន្ទ​រដ្ឋបាល រាជធានី​ភ្នំពេញ លោក សាយ សំ​អាល់ បាន​មានប្រសាសន៍ថា សុខសន្តិភាព និង​ស្ថិរភាព​នយោបាយ ដែល​កម្ពុជា​ទទួលបាន ពិត​ជាមាន​សារៈសំខាន់​ខ្លាំងណាស់ ជា​បុ​រេ​លក្ខខណ្ឌ មិនអាច​ខ្វះ​បាន សម្រាប់​ការអភិវឌ្ឍ​ប្រទេសជាតិ ហើយ​ជាពិសេស​ជំរុញឱ្យមាន​ការចូលរួម និង​គិតគូរ​ខ្ពស់​លើ កិច្ច​គាំពារ​បរិស្ថាន និង​ការគ្រប់គ្រង​ធនធានធម្មជាតិ សម្រាប់​ប្រជាជន​យើង គ្រប់រូប​និង​គ្រប់​ជំនាន់​។

​ជាមួយគ្នានេះ លោក​រដ្ឋមន្ត្រី បានបញ្ជាក់​ថាៈ ពី​ការទទួលស្គាល់ នៃ​ការប្រែប្រួល​ឥរិយាបទ របស់​សាធារណជន ចំពោះ​កិច្ច​គាំពារ​បរិស្ថាន ការគ្រប់គ្រង ធនធានធម្មជាតិ ការអភិរក្ស​ជីវៈចម្រុះ និង​ការអភិវឌ្ឍ ដោយ​ចីរភាព និង​ទទួលបាន​ការវាយតម្លៃ​ខ្ពស់ ពី​ដៃគូ​ពាក់ព័ន្ធ ក៏ដូចជា សាធារណជន ចំពោះ​ការដឹកនាំ របស់​រាជរដ្ឋាភិបាល​ក្នុង​វិស័យ​បរិស្ថាន និង​ធនធានធម្មជាតិ​។​

​ក្នុងឱកាស​នេះដែរ លោក សាយ សំ​អាល់ បាន​មានប្រសាសន៍ថាៈ ក្រសួងបរិស្ថាន បាន​យកចិត្តទុកដាក់​ខ្ពស់ ការអនុវត្ត​គោលនយោបាយ យុទ្ធសាស្ត្រ និង​ផែនការ​ជាតិ ជាពិសេស​យុទ្ធសាស្ត្រ ចតុកោណ​ទាំង ៣ ដំណាក់កាល កន្លងទៅ ព្រមជាមួយ​ការកែទម្រង់ និង​ការដឹកនាំ​របស់ រាជរដ្ឋាភិបាល ក្នុង​វិស័យ​បរិស្ថាន និង​ធនធានធម្មជាតិ​។​

​សូមបញ្ជាក់ថា ក្នុងឱកាស​ផ្តល់​បាឋកថា ស្តីពី​ការគ្រប់គ្រង​បរិស្ថាន ជូន​សិស្សសាលា​ភូមិន្ទ​រដ្ឋបាល នា​ថ្ងៃនេះ លោក​រដ្ឋមន្ត្រី បាន​សង្កត់ធ្ងន់ លើ​ការវិវត្ត ជា​បន្តបន្ទាប់ ទាំង​រចនាសម្ព័ន្ធ​គ្រប់គ្រង និង​សញ្ញាណ អំពី​ពាក្យ​«​បរិស្ថាន​» និង​ការបង្កើតឡើង​ដំបូង​នៃ​«​រដ្ឋលេខាធិការដ្ឋាន​គ្រប់គ្រង​បរិ​ដ្ឋា​ន​» នៅ​ឆ្នាំ​១៩៩៣ និង បន្ទាប់មក​នៅ​ឆ្នាំ​១៩៩៦ ក្លាយទៅជា​ក្រសួងបរិស្ថាន រហូតមក​។ បច្ចុប្បន្ន ក្រសួងបរិស្ថាន មាន​បេសកកម្ម​ចម្បង ក្នុងការ​ដឹកនាំ និង​គ្រប់គ្រង​កិច្ច​គាំពារ​បរិស្ថាន ការគ្រប់គ្រង​ធនធានធម្មជាតិ ការអភិរក្ស​ជីវៈចម្រុះ និង​ការអភិវឌ្ឍ ដោយ​ចីរភាព សម្រាប់​ឧ​ត្ត​ម​ប្រយោជន៍ យូរអង្វែង​របស់ ប្រជាជន​កម្ពុជា​គ្រប់រូប និង​គ្រប់​ជំនាន់​៕/V


ទីតាំងផ្សាយពាណិជ្ជកម្ម

- Advertisment -

Most Popular