Home ព័ត៌មានជាតិ សន្តិសុខ ​នគរបាល​ស្រុក...

​នគរបាល​ស្រុក​ភ្នំក្រវាញ​ម្នាក់ រងរបួស​ជើង នៅពេល​សមត្ថកិច្ច​ចម្រុះ ផ្ទុះអាវុធ​បង្ក្រាប មុខសញ្ញា​ឃាតកម្ម

ដោយ: រឹទ្ធិ​សែន / ពោធិ៍សាត់: កម្លាំង​នគរបាល​ព្រហ្មទណ្ឌ នៃ​ក្រសួងមហាផ្ទៃ បាន​ចុះ​សហការ​ជាមួយ កម្លាំង​ស្នងការដ្ឋាន​នគរបាល ខេត្តពោធិ៍សាត់ និង​នគរបាល ស្រុក​ភ្នំក្រវាញ ចុះ​អនុវត្ត​ដីកា​របស់​តុលាការ បញ្ជា​ឱ្យ​ឃាត់ខ្លួន​ជនសង្ស័យ ជា​មេចោរ​ប្លន់​ប្រដាប់អាវុធ យ៉ាងសកម្ម​ម្នាក់ នៅ​ខេត្តកំពត និង​កូនប្រុស​របស់ ជនសង្ស័យ ពីបទ​សមគំនិត ដឹក​ឪពុក​របស់ខ្លួន តាម​រថយន្ត រត់គេច​ពី​កម្លាំង​សមត្ថកិច្ច ហើយ​ត្រូវបាន​សមត្ថកិច្ច​ចម្រុះ ផ្ទុះអាវុធ​ផ្លាត​ត្រូវ​ជើង នគរបាល ស្រុក​ភ្នំក្រវាញ ១​នាក់ នៅ​មុនពេល​ឃាត់ខ្លួន ជនសង្ស័យ​ទាំងពីរ​នាក់ ឪពុក និង​កូន​នោះ​។​

​ហេតុការណ៍​បង្ក្រាប​ជនសង្ស័យ ជា​មុខសញ្ញា​មេចោរ​ប្លន់​នេះ បានធ្វើ​ឡើង នៅវេលា​ទៀបភ្លឺ ថ្ងៃទី​២៣ ខែធ្នូ ឆ្នាំ​២០២០ នៅ​ចំណុច​គល់ស្ពាន​ព្រៃ​ខ្លុង ស្ថិតក្នុង​ភូមិ​ព្រៃ​ខ្លុង ឃុំរ​កាត ស្រុក​ភ្នំក្រវាញ ខេត្តពោធិ៍សាត់ ។​

​លោក​ឧ​ត្ត​ម​សេនីយ៍​ត្រី ម៉ូ លីដា ស្នងការរង​នគ​បាល​ខេត្ត ទទួលបន្ទុក​កណ្តាល​យុត្តិធម៌ ខេត្តពោធិ៍សាត់ បានអោយដឹង តាម​ទូរស័ព្ទ នៅ​រសៀល​ថ្ងៃទី​២៣ ធ្នូ នេះ​ថាៈ ករណីនេះ សមត្ថកិច្ច អនុវត្តតាម​ដីកាចាប់ខ្លួន លេខ​៣១០ ចុះ​ថ្ងៃទី​២៣ ខែធ្នូ ឆ្នាំ​២០២០ របស់​តុលាការ ចេញ​ដោយ​លោក គាំ គង្គា ចៅក្រម​ស៊ើបសួរ នៃ​សាលាដំបូង ខេត្តកំពត ក្រោយ​ការស្រាវជ្រាវ រកឃើញ​មុខសញ្ញា ជនសង្ស័យ​ឈ្មោះ ហេង យ៉ុ​ន ភេទ​ប្រុស អាយុ ៥៧ ឆ្នាំ បាន​ប្រព្រឹត្ត​ឃាតកម្ម​គិតទុក​ជាមុន កាលពី​វេលា​ម៉ោង ៩​និង​៣០ នាទី ថ្ងៃទី​១៨ ខែកញ្ញា ឆ្នាំ​២០២០ មាន​លំនៅ នៅ​ភូមិ​ព្រៃ​ពាយ ឃុំ​ត្រពាំង​ខ្លាំង ស្រុក​ឈូក ខេត្តកំពត​។ ក្រោយពី​បាន​ប្រព្រឹត្ត ឃាតកម្ម​គិតទុក​ជាមុន រួចមក ជនសង្ស័យ បានគេច​ខ្លួន​ពី​ខេត្តកំពត មក​បន្លំ​លាក់ខ្លួន​ពួន​សម្ងំ រស់នៅក្នុង​ភូមិ​វាល ឃុំ​សំរោង ស្រុក​ភ្នំក្រវាញ ខេត្តពោធិសាត់​។​

​ស្នងការរង​នគរបាល ខេត្តពោធិ៍សាត់ បាន​ឲ្យ​ដឹង​ទៀតថាៈ នៅពេល​សមត្ថកិច្ច​ចម្រុះ បាន​ចុះ​អនុវត្តតាម​ដីកា​របស​តុលាការ​ខេត្តកំពត​នោះ ជនសង្ស័យ ជា​មេចោរ​ប្លន់​ប្រដាប់អាវុធ​ម្នាក់នេះ បាន​ត្រូវ​កូនប្រុស​របស់ខ្លួន ជម្លៀស​ចេញពីផ្ទះ តាម​រថយន្ត​របស់​កូន ម៉ាក​តូយ៉ូតា កាមរី (​បា​ឡែ​ន​) ពាក់​ស្លាក​លេខ ភព ២AX២៣៤៤ បំរុង​រត់គេចខ្លួន​ពី​សមត្ថកិច្ច ក៏ប៉ុន្តែ​ភ្លាមនោះ សមត្ថកិច្ច បាន​តាម​ប្រមាញ់ និង​បាន​បាញ់​បំបែក​កង់​រថយន្ត និង​បាន​ផ្លាត​គ្រាប់​ត្រូវ​ជើង​ខាងស្តាំ របស់​មន្ត្រីនគរបាល​ស្រុក​ភ្នំក្រវាញ​ម្នាក់ ហើយ​ភ្លាមៗ​នោះ ជនរងគ្រោះ ជា​សមត្ថកិច្ច ត្រូវបាន​ដឹក​យកមក​សង្គ្រោះបន្ទាន់ នៅ​មន្ទីរពេទ្យ​ខេត្ត ភ្លាមៗ​ដែរ​។​

​ក្រោយពេល​បង្ក្រាប ភ្លាមៗ​នោះ សមត្ថកិច្ច បាន​ឃាត់ខ្លួន​ជនសង្ស័យ ក្នុងករណី​ឃាតកម្ម ឈ្មោះ ហេង យ៉ុង និង​កូនប្រុស ឈ្មោះ ស៊ុម យ៉ុ​ន រួម​នឹង​រថយន្ត ហើយ​បានធ្វើ​កំណត់ហេតុ ប្រគល់​ជនសង្ស័យ តាម​ដីកា ទៅឱ្យ​នគរបាល​ព្រហ្មទណ្ឌ ក្រសួងមហាផ្ទៃ ។​

​សូមបញ្ជាក់ថា សមត្ថកិច្ច​នគ​បាល​ព្រហ្មទណ្ឌ​ស្រុក​ភ្នំក្រវាញ ឈ្មោះ ហ៊ុន ចាន់​ធា ហៅ ពៅ ដែល​រងរបួស ក្នុង​បេសកម្ម​បង្ក្រាប​មុខសញ្ញា​ឃាតកម្ម ត្រូវបាន​នាយកដ្ឋាន​ព្រហ្មទណ្ឌ ក្រសួងមហាផ្ទៃ ឧបត្ថម្ភ​ថវិកា ១០០ ដុល្លារ ក្នុងការ​ព្យាបាល​របួស​៕/V​

ទីតាំងផ្សាយពាណិជ្ជកម្ម

- Advertisment -

Most Popular