Home ព័ត៌មានជាតិ សេដ្ឋកិច្ច ក្រសួងពាណិជ្ជ...

ក្រសួងពាណិជ្ជកម្ម​ធានា​ជំរុញ​ការប្រមូល​ពន្ធ​លើ​សេវា​ឌីជីថល​ឱ្យមាន​តម្លាភាព​រវាង​វិស័យ​ឯកជន​និង​រដ្ឋ

​ដោយ​: ពៅ​និមល​/​ភ្នំពេញ​: លោក សុខ សុភ័ក្ត្រ រដ្ឋលេខាធិការ​ក្រសួង ពាណិជ្ជកម្ម កាលពី​រសៀល​ថ្ងៃទី​២៣ ខែធ្នូ ឆ្នាំ​២០២០​កន្លងទៅនេះ​បាន​ដឹកនាំ​ក្រុមការងារ​ជំនាញ ចូលរួម​កិច្ចប្រជុំ​អន្តរក្រសួង ដើម្បី​ពិភាក្សា​លើ​ការប្រមូល​ពន្ធ​លើ​សេវា​ឌីជីថល (Digital Services Tax) ជាមួយ​ក្រសួង​ប្រៃសណីយ៍​និង​ទូរគមនាគមន៍ និង​ក្រសួង​សេដ្ឋកិច្ច​និង ហិរញ្ញវត្ថុ តាមរយៈ​ប្រព័ន្ធ​អន​ឡាញ​។​

​នៅក្នុង​កិច្ចប្រជុំ​នោះ លោក​រដ្ឋលេខាធិការ បានលើកឡើង​នូវ​ធាតុ​ចូល​ចាំបាច់​មួយចំនួន ដើម្បីឱ្យ​អង្គប្រជុំ​ពិនិត្យ​និង​ពិចារណា​ពាក់ព័ន្ធ​នឹង​ការប្រមូល​ពន្ធ​នេះ ក៏ដូចជា​និន្នាការ អន្តរជាតិ​និង​តំបន់​ចំពោះ​ការកំណត់​ពន្ធ​លើ​ផលិតផល​និង​សេវា​ឌីជីថល​អំពី​កាតព្វកិច្ច ផ្នែក​ពន្ធ​ដែលជា​ការប្តេជ្ញាចិត្ត​រប​ស់​ព្រះរាជាណាចក្រ​កម្ពុជា​នៅក្រោម​ក្របខណ្ឌ​អង្គការ​ពាណិជ្ជកម្ម​ពិភពលោក (WTO) ក្របខណ្ឌ​គតិយុត្ត​ពាក់ព័ន្ធ​នឹង​ការធ្វើ​ពាណិជ្ជកម្ម​តាម​ប្រព័ន្ធ អេឡិចត្រូនិក​នៅក្នុង​ព្រះរាជាណាចក្រ​កម្ពុជា និង​ការធ្វើ​ពាណិជ្ជកម្ម​តាម​ប្រព័ន្ធ​អេ​ឡិច ត្រូ​និក​ឆ្លងដែន (Cross-border E-Commerce)​។

​ជាមួយគ្នានេះ លោក​បានបង្ហាញ​នូវ​ការគាំទ្រ​ចំពោះ​គំនិត​ផ្តួចផ្តើម​របស់​ក្រសួង​ទាំងពីរ ខាងលើ នៅក្នុង​ការបង្កើត​ក្រុមការងារ​អន្តរក្រសួង ដើម្បី​សិក្សា​ស្វែងយល់​ឱ្យ​កាន់តែច្បាស់ និង​ស៊ីជម្រៅ​អំពី​យន្តការ និង​នីតិវិធី​នៅក្នុង​ការប្រមូល​ពន្ធ​លើ​សេវា​ឌីជីថល​ក្នុង​កម្រិត សកល និង​តំបន់ ដោយ​នឹង​សហការ​ជាមួយនឹង​ក្រសួង​-​ស្ថាប័ន​ពាក់ព័ន្ធ​ក៏ដូចជា​វិស័យ ឯកជន​។

​ទន្ទឹមនេះ លោក សុខ សុភ័ក្ត្រ បាន​ជំរុញ​ឲ្យ​មានការ​សិក្សា​អោយ​លម្អិត​បំផុត ទាំង​ការ ប្រមូល​ទិន្នន័យ​សម្រាប់​វិភាគ និង​ការវាយតម្លៃ​លើ​ផលប៉ះពាល់ និង​កាលានុវត្តភាព​ចេញ ពី​ការយកពន្ធ​លើ​សេវា​ឌីជីថល​នេះ ដើម្បី​ធានាថា គោលនយោបាយ​ប្រមូល​ពន្ធ​លើ សេវា​ឌីជីថល​នេះ ផ្តល់​តម្លាភាព សមធម៌ និង​តុល្យភាព​ជូន​ក្រុមហ៊ុន​ឯកជន​ផ្តល់​សេវា ឌីជីថល អ្នកប្រើប្រាស់​សេវា​ឌីជីថល និង​ស្ថាប័ន​អនុវត្ត​គោលនយោបាយ​នេះ​ផងដែរ​៕​/PC

ទីតាំងផ្សាយពាណិជ្ជកម្ម

- Advertisment -

Most Popular