Home ព័ត៌មានជាតិ សន្តិសុខ ជើង​ខ្លាំង​ខា...

ជើង​ខ្លាំង​ខាង​ឆក់​កាបូប ឆក់​ខ្សែក និង​ធាក់​ផ្តួល​ម៉ូតូ​ក្នុង​រាជធានី​ភ្នំពេញ​ចាប់ខ្លួនបាន​ហើយ​

ដោយៈ​មុនី​រ័ត្ន​,​ស​.​រិ​ទ្ធ​/​ភ្នំពេញៈបុរស​ម្នាក់​ដែល​ជំនាញ​ខាង​ធ្វើ​សកម្មភាព​ឆក់​កាបូប​ឆក់​ខ្សែក​និង​ធាក់​ម៉ូតូ​អ្នកដទៃ​តាមផ្លូវ​សាធារណៈ​នៅក្នុង រាជធានី​ភ្នំពេញ​យ៉ាងសកម្ម ត្រូវបាន​សមត្ថកិច្ច​ចាប់ខ្លួនបាន​ហើយ និង​បាន​បញ្ជូនទៅ​តុលាការ​ដើម្បី​ចាត់ការ​តាម​នីតិវិធី​ច្បាប់​នៅ​ថ្ងៃទី​២៤ ខែធ្នូ ឆ្នាំ​២០២០​។​


​ជនសង្ស័យ​ឈ្មោះ មាស កុសល ហៅ​ស្តា​ល់ អាយុ​២៧​ឆ្នាំ គ្មាន​មុខរបរ​ពិតប្រាកដ ត្រូវបាន​នគរបាល​ការិយាល័យ​ព្រហ្មទណ្ឌ​កម្រិត​ស្នាល នៃ​ស្នងការដ្ឋាន​នគរបាល​រាជធានី​ភ្នំពេញ​បង្ក្រាប​ចាប់ខ្លួន​កាលពី​ថ្ងៃទី​២១ ខែធ្នូ ស្ថិតនៅ​ចំណុច​ផ្ទះជួល​គ្មាន​លេខ ភូមិ​មានជ័យ សង្កាត់​ស្ទឹងមានជ័យ​១ ខណ្ឌមានជ័យ ។ ការចាប់ខ្លួន​នេះ បន្ទាប់ពី​ជនសង្ស័យ​បានធ្វើ​សកម្មភាព​អំពើ​ឆក់​កាបូបស្ពាយ​ជនរងគ្រោះ ហើយ​ប្រើ​ហិង្សា​ធាក់​ម៉ូតូ​ជនរងគ្រោះ​ដួល​បណ្តាលឱ្យ​រងរបួស​ស្ថិតនៅ​ខណ្ឌ​សែន​សុខ​រាជធានី​ភ្នំពេញ កាលពី​កន្លងទៅ​ថ្មីៗ​នេះ​។​
​លោក​វរសេនីយ៍ឯក ប៊ុន សត្យា​នាយការិយាល័យ​នគរបាល​ព្រហ្មទណ្ឌ​កម្រិត​ស្រាល​ឱ្យដឹងថា​កម្លាំង​នគរបាល​ការិយាល័យ ជំនាញ​បង្ក្រាប​ចាប់ខ្លួន​ជនសង្ស័យ​សម្រេចបាន​នៅពេលនេះ អនុវត្តតាម​បទបញ្ជា​ផ្ទាល់​របស់លោក​ឧ​ត្ត​ម​សេនីយ៍​ឯក ស ថេត អគ្គ​ស្នងការរង​នគរបាលជាតិ​និង​ជា​ស្នងការ​នគរបាល​រាជធានី​ភ្នំពេញ​ដែល​បាន​បញ្ជា​ឱ្យកម្លាំង​ការិយាល័យ​នគរបាល​ព្រហ្មទណ្ឌ​កម្រិត​ស្រាល​ត្រូវ​ស្រាវជ្រាវ​ស្វែងរក​បង្ក្រាប​មុខសញ្ញា​ឆក់​នេះ​ឱ្យបាន​ដើម្បី​យកទៅ​ចាត់ការ​តាមផ្លូវ​ច្បាប់​អនុវត្ត​វិធាន​ការបង្ការ​ទប់ស្កាត់​បទល្មើស​ឆក់​ឱ្យមាន​ប្រសិទ្ធភាព​។​
​លោក​បន្តថា​ជាមួយនឹង​ការចាប់ខ្លួន​ជនសង្ស័យ​បាន​ឆ្លើយ​សារភាពថា​រូបគេ​ពិតជា​បានធ្វើ​សកម្មភាព​ឆក់យក​ទ្រព្យសម្បត្តិ​ជនរងគ្រោះ​ទាំងនោះ​ពិតប្រាកដ​មែន​។ វត្ថុតាង​ចាប់យក​រួមមានៈ​ម៉ូតូ​ធ្វើ​សកម្មភាព​មួយគ្រឿង​។ បច្ចុប្បន្ន​កម្លាំង​នគរបាល​ការិយាល័យ​ជំនាញ​កំពុង​បន្ត​ស្រាវជ្រាវ​ស្វែងរក​ចាប់​បក្ខពួក​ជន​ជាប់​ពាក់ព័ន្ធ​ជាមួយ​ជនសង្ស័យ​ដើម្បី​យកមក​ផ្តន្ទាទោស​តាមផ្លូវ​បន្តទៀត​។​

រូបថតៈជនរងគ្រោះដោយសារស្នាដៃជនល្មើស
​លោក​វរសេនីយ៍ឯក ប៊ុន សត្យា បាន​បញ្ជាក់ថា ជនសង្ស័យ​ខាងលើ​ធ្លាប់ធ្វើ​សកម្មភាព​ឆក់​ទ្រព្យសម្បត្តិ​ប្រជាពលរដ្ឋ​ចំនួន​៩​លើក បាន​ជោគជ័យ​។​លើក​ទី​១.​ធ្វើ​សកម្មភាព​ឆក់​កាបូបស្ពាយ​ពណ៌​ត្នោត​មិនបាន​សម្រេច​និង​ធាក់​ម៉ូតូ​ជនរងគ្រោះ​ដួល​បណ្តាលឱ្យ​រងរបួស​ស្ថិតនៅ​ចំណុច​បណ្តោយ​ផ្លូវ​បេតុង​ភូមិ​រោងចក្រ​សង្កាត់​គោក​ឃ្លៀង​ខណ្ឌ​សែន​សុខ​។​លើក​ទី​២.​ធ្វើ​សកម្មភាព​ឆក់​ប្រព្រឹត្ត​អំពើហិង្សា​យក​កាបូបស្ពាយ​ចំហៀង​ពណ៌​ខ្មៅ​នៅ​ចំណុច​មុខផ្ទះ​លេខ​៨៧​ផ្លូវ​លេខ​៦១៤​ភូមិ​១៦​សង្កាត់​បឹងកក់​២​ខណ្ឌទួលគោក​ជនរងគ្រោះ​បាត់បង់​ចិញ្ចៀនពេជ្រ​០១​វង់​,​ខ្សែដៃ​ពេជ្រ​ចំនួន​០១​ខ្សែ​,​ប្រាក់​ខ្មែរ​៣​លាន​រៀល​,​ប្រាក់​អា​មេ​រិច​៩០០​ដុល្លារ​និង​ទូរស័ព្ទដៃ​ម៉ាក​អាយ​ហ្វូ​ន​៧​ផ្លឺ​ស​០១​គ្រឿង​។ លើក​ទី​៣. ធ្វើ​សកម្មភាព​ឆក់​ដោយ​អំពើហិង្សា​ខ្សែក នៅ​ចំណុច​ផ្ទះ​លេខ​២១៦​អា​អឺ​០ ផ្លូវ​លេខ​១៨២ ភូមិ​៦ សង្កាត់​ផ្សារ​ដេប៉ូ​១ ខណ្ឌទួលគោក ដោយ​បាត់បង់​ខ្សែក​ផ្លា​ទីន​ទម្ងន់​៨​ជី​។ លើក​ទី​៤. ធ្វើ​សកម្មភាព​ប្រព្រឹត្ត​អំពើហិង្សា​ឆក់​កាបូប​ក្រវ៉ាត់​ចង្កេះ​ពណ៌​ត្នោត ស្ថិតនៅ​ផ្លូវ​លេខ​៣៧១​ភូមិ​ទ្រា​១​សង្កាត់​ស្ទឹងមានជ័យ​ខណ្ឌមានជ័យ​បាត់បង់​ប្រាក់​អាម៉េរិក​ចំនួន​៥០០​ដុល្លារ​,​អត្តសញ្ញាណ​បណ្ណ​សញ្ជាតិ​ខ្មែរ​ចំនួន​មួយ​សន្លឹក​,​ទូរស័ព្ទដៃ​ម៉ាក​អូ​ប​ប៉ូ​មួយគ្រឿង​។​លើក​ទី​៥.​ធ្វើ​សកម្មភាព​ឆក់​ប្រព្រឹត្ត​អំពើហិង្សា​យក​កាបូបស្ពាយ​ចំហៀង​ពណ៌​សលាយ​ខ្មៅ បាត់បង់​ទ្រព្យសម្បត្តិ​មូ​យ​ចំនួន​ស្ថិតនៅ​ចំណុច​ផ្លូវ​លេខ​៣៥៥ ភូមិ​ទួលគោក សង្កាត់​ទួល​សង្កែ​១ ខណ្ឌ​ប្ញ​ស្សី​កែវ រាជធានី​ភ្នំពេញ​។ លើក​ទី​៦. ធ្វើ​សកម្មភាព​ឆក់យក​ទូរស័ព្ទដៃ​ម៉ាក​អាយ​ហ្វូ​ន​អ៊ិ​ច​ពណ៌​ស​មួយគ្រឿង​ផ្លូវ​លេខ​៣៧១ ភូមិ​ម័ល សង្កាត់​ដង្កោ ខណ្ឌដង្កោ​។ លើក​ទី​៧. ធ្វើ​សកម្មភាព​ឆក់យក​កាបូបស្ពាយ​ពីក្រោយ​បាត់បង់​ទ្រព្យសម្បត្តិ​មួយចំនួន​នៅ​ចំណុច​លើ​ស្ពាន​អាកាស​ផ្សារ​ដី​ហ៊ុយ សង្កាត់​ទឹកថ្លា ខណ្ឌ​សែន​សុខ​។ លើក​ទី​៨.​ធ្វើ​សកម្មភាព​ឆក់យក​កាបូប​ពណ៌​ក្រហម​បាត់បង់​ទ្រព្យសម្បត្តិ​មួយចំនួន​នៅ​ចំណុច​ផ្លូវ​២០០៤ សង្កាត់​កា​កាប​១ ខណ្ឌ​ពោធិ៍​សែន​ជ័យ និង​លើក​ទី​៩. ធ្វើ​សកម្មភាព​ឆក់​កាបូបស្ពាយ​ពណ៌​ខ្មៅ នៅ​លើក​កំណាត់​ផ្លូវ​សហព័ន្ធ​រុស្សី សង្កាត់​កា​កាប​២ ខណ្ឌ​ពោធិ៍​សែន​ជ័យ ដែល​បាន​បាត់បង់​ទ្រព្យសម្បត្តិ​មួយចំនួន​ដែរ​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular