Home ព័ត៌មានសំខាន់ៗ ក្រុម​ប្រទេស​...

ក្រុម​ប្រទេស​អាម៉េរិក​ឡាទីន​ចាប់ផ្តើម​ចាក់​វ៉ាក់សាំង​កូវី​ដ​ទ្រង់ទ្រាយ​ធំ ខណៈ​អឺរ៉ុប​បារម្ភ​អំពី​​កូរ៉ូ​ណា​បំលែងខ្លួន​ថ្មី​

​ប្រែ​សម្រួល : កញ្ញា​ដា​លី​ស ៖ ប្រទេស​អាម៉េរិក​ឡាទីន​ចំនួន ៣ បាន​ចាប់ផ្តើម​កម្មវិធី​ចាក់​វ៉ាក់សាំង​ការពារ​ទ្រង់ទ្រាយ​ធំ​កាលពី​ថ្ងៃ​ព្រហស្បតិ៍​ទី​២៤​ធ្នូ​ខណៈដែល​ការភ័យខ្លាច​បាន​កើនឡើង​នៅក្នុង​ទ្វីប​អឺរ៉ុប​​ជុំវិញ​វីរុស​កូរ៉ូ​ណា​ប្រែ​រូបរាង​ថ្មី ដែល​គេ​ជឿ​ថា​ឆ្លង​ខ្លាំង​ជាង​មេរោគ​ដើម​។​

​បុគ្គលិក​ពេទ្យ​ជួរ​មុខ​នៅ​ម៉ិក​ស៊ិកនិង​ឈី​លី​គឺ​ស្ថិត​ក្នុងចំណោម​អ្នក​ដំបូង​គេ​ដែល​ទទួល​វ៉ាក់សាំង ខណៈ​ប្រទេស​កូ​ស្តារី​កា​បាន​ចាប់ផ្តើម​កម្មវិធី​ចាក់​ថ្នាំ​បង្ការ​រោគ​ដោយ​ខ្លួនឯង​ដោយ​លោក​ប្រធានាធិបតី​​កា​ឡូ​ស អាល់​វ៉ា​រ៉ាដូ កោតសរសើរ​នូវ​អ្វីដែល “​អាច​ជា​ការចាប់ផ្តើម​នៃ​ទីបញ្ចប់​នៃ​ជំងឺ​រាតត្បាត​”​។​

​ប៉ុន្តែ​សុទិដ្ឋិនិយម​ពិភពលោក​ត្រូវ​បាន​បន្ទាប នៅពេល​ចិន​និង​ប្រេ​ស៊ីល​បាន​ចូលរួម​ជា​មួ​យ​រដ្ឋាភិបាល​ជាង ៥០​ដែល​បាន​រឹតត្បិត​ការហោះហើរ​ពី​ចក្រភព​អង់គ្លេស​ឬ​ចរាចរណ៍​ផ្លូវអាកាស​ក្នុងទិសដៅ​​ទាំងពីរ បន្ទាប់​ពី​មេរោគ​កូរ៉ូណា​ប្រភេទ​ថ្មី​ឆ្លង​ខ្លាំង​ជាង​មុន​បាន​លេចឡើង​នៅ​ទីនោះ​។​

​រថយន្ត​ដឹកទំនិញ​រាប់ពាន់​គ្រឿង​នៅតែ​បន្ត​ជាប់គាំង​នៅ​កំពង់ផែ​អង់គ្លេស ខណៈ​ដែល​បារាំង​បញ្ជូន​ឧបករណ៍​តេស្តិ៍​ចំនួន ១០.០០០​ឈុត​ដើម្បី​ធ្វើតេស្តិ៍​អ្នកបើកបរ​មុន​ពេល​អនុញ្ញាតឱ្យ​ពួកគេ​ឆ្លងកាត់​​ផ្លូវ​រូង​ក្រោម​ដី​នៅក្រោម​ច្រក​សមុទ្រ​អង់គ្លេស​។​

​ត្បិត​មាន​វីរុស​កូរ៉ូណា​ប្រភេទ​ថ្មី​ដែល​លោក​នាយករដ្ឋមន្ត្រី​អង់គ្លេស បូរី​ស ច​ន​សុន និយាយថា “​អាច​ឆ្លង​លឿន​ជាង​មុន ៧០ ភាគរយ​” ក្តី​ក៏​អង់គ្លេស​និយាយថា​ការតភ្ជាប់​ផ្លូវដែក​និង​សមុទ្រ​ជាមួយ​បារាំង​​នឹង​នៅតែ​បើកចំហ​នៅ​ថ្ងៃបុណ្យ​ណូអែល​។​

​ម៉ិក​ស៊ិក​បាន​ផ្សាយ​ផ្ទាល់​តាម​ទូរទស្សន៍​នូវ​ការចាប់ផ្តើម​កម្មវិធី​ចាក់​ថ្នាំ​បង្ការ​រោគ​ទ្រង់ទ្រាយ​ធំ​របស់​ខ្លួន បន្ទាប់ពី​ទទួលបាន​វ៉ាក់សាំង Pfizer / BioNTech ចំនួន ៣.០០០ ដូសដំបូង​ពី​ប្រទេស​បែលហ្ស៊ិក​។​

​គិលានុប្បដ្ឋាយិកា​វ័យ ៥៩ ឆ្នាំ​ឈ្មោះ ម៉ា​រី​យ៉ា អាយ​រី​ន រ៉ា​មី​រ៉េ​ស បាន​និយាយ​ខណៈពេលដែល​នាង​បាន​ទទួល​វ៉ាក់សាំង​នៅ​មន្ទីរពេទ្យ​ក្នុង​រដ្ឋធានី យ៉ាង​ដូច្នេះ​ថា​”​វា​ជា​អំណោយ​ដ៏​ល្អ​បំផុត​ដែល​ខ្ញុំ​អាច​ទទួល​​បាន​នៅ​ឆ្នាំ ២០២០”​។​

​ម៉ិក​ស៊ិក​បាន​ចុះបញ្ជី​អ្នកស្លាប់​ដោយកូវី​ដ​១៩​ជាង ១២ ម៉ឺន​នាក់ ដែល​ជា​ចំនួន​ខ្ពស់​បំផុត​ទី ៤ នៅលើ​ពិភពលោក​បន្ទាប់​ពី​សហ​រដ្ឋ​អាម៉េរិក​ប្រេ​ស៊ីល​និង​ឥណ្ឌា​៕

​ពេទ្យ​យោធា​ម៉ិក​ស៊ិកចាក់​វ៉ាក់សាំង​កូវី​ដ​១៩ របស់​ក្រុមហ៊ុន Pfizer/BioNTech កាលពី​ថ្ងៃ​សុក្រ​ទី​២៤​ធ្នូ​២០២០

ទីតាំងផ្សាយពាណិជ្ជកម្ម

- Advertisment -

Most Popular