Home ព័ត៌មានសំខាន់ៗ បិទផ្លូវ​តវ៉ា...

បិទផ្លូវ​តវ៉ា : ក្រុមប្រឹក្សាធម្មនុញ្ញ​បដិសេធ​បណ្តឹង​ទាំង ៩៥ របស់គណបក្ស​សម្ព័ន្ធ​ដើម្បី​ប្រជាធិបតេយ្យ​

ដោយៈ មុនី​រ័ត្ន​/​ភ្នំពេញៈ ក្រុមប្រឹក្សា​ជំនុំជម្រះ នៃ​ក្រុមប្រឹក្សាធម្មនុញ្ញ បានសម្រេច​ច្រានចោល​បណ្តឹង​ទាំង ៩៥​បណ្តឹង របស់​គណបក្ស​សម្ព័ន្ធ​ដើម្បី​ប្រជាធិបតេយ្យ​(LDP)​ដែល​បាន​ប្តឹងតវ៉ា​នឹង​សេចក្តីសម្រេច​របស់​គណៈ​ក​ម្មា​ធិ​ការ​ជាតិ​រៀបចំ​ការបោះឆ្នោត (​គ​.​ជ​.​ប​) ពាក់ព័ន្ធ​នឹង​បញ្ជី​បោះឆ្នោត​ដំបូង ពោលគឺ ប្តឹងតវ៉ា​ទាមទារ​ឲ្យ​គ​.​ជ​.​ប​.​លុបឈ្មោះ​ប្រជាពលរដ្ឋ​ខ្មែរ ចំនួន​ជាង ២.៧០០​នាក់ ចេញពី​បញ្ជី​ឈ្មោះ​បោះឆ្នោត​។​

លោក ព្រហ្ម វិចិត្រ​អក្ខរា អគ្គលេខាធិការរង និង​ជា​អ្នកនាំពាក្យ​ក្រុមប្រឹក្សាធម្មនុញ្ញ​បាន​បញ្ជាក់ថា​ក្រុមប្រឹក្សា​ជំនុំជម្រះ ក្រុមប្រឹក្សាធម្មនុញ្ញ បាន​បិទ​បញ្ចប់​បណ្តឹង​សរុប​ចំនួន ៩៥​បណ្តឹង​របស់​គណបក្ស​សម្ព័ន្ធ​ដើម្បី​ប្រជាធិបតេយ្យ តាំងពី​សវនាការ​លើក​ទី​១. កាលពី​ថ្ងៃទី​២១ ខែធ្នូ ឆ្នាំ​២០២០ ចំនួន ២៨​បណ្តឹង , លើក​ទី​២ កាលពី​ថ្ងៃទី​២៣ ខែធ្នូ ចំនួន ២៣​បណ្តឹង និង​លើក​ទី​៣. នៅ​ថ្ងៃទី​២៥ ខែធ្នូ ឆ្នាំ​២០២០ ចំនួន ៤៤​បណ្តឹង សរុប​ទាំងអស់ ៩៥​បណ្តឹង​។ នៅក្នុង​បណ្តឹង គឺ​គណបក្ស​សម្ព័ន្ធ​ដើម្បី​ប្រជាធិបតេយ្យ បាន​ស្នើសុំ​លុបឈ្មោះ​ប្រជាពលរដ្ឋ​ចំនួន ២៧៣៣​នាក់ ចេញពី​បញ្ជី​បោះឆ្នោត​។ ក្នុងនាម​ស្ថាប័ន​ធានា​ការពារ​ឲ្យ​មាន​ការគោរព​រដ្ឋធម្មនុញ្ញ គឺ​ក្រុមប្រឹក្សាធម្មនុញ្ញ​បាន​អនុវត្ត​ស្របទៅតាម​ច្បាប់​ហើយ​បាន សម្រេច​ច្រានចោល​បណ្តឹង​ទាំង​៩៥​នោះ​និង​រក្សា​ឈ្មោះ​ប្រជាពលរដ្ឋ​ទាំង​២.៧៣៣​នាក់​ទុក​ដោយសារ​ពួកគាត់​មាន​លក្ខខណ្ឌ​គ្រប់​សម្រាប់​ការចុះឈ្មោះ​បោះឆ្នោត​។​

​លោក​បន្តថា នៅក្នុង​សវនាការ​ជំនុំជម្រះ​នៅ​ព្រឹក​ថ្ងៃទី​២៥ ខែធ្នូ​នេះ ម្ចាស់​ដើមបណ្តឹង​អវត្តមាន​ក្នុង​សវនាការ​ជំនុំជម្រះ​។ ដូច្នេះ​ក្រុមប្រឹក្សា​ជំនុំជម្រះ​នៃ​ក្រុមប្រឹក្សាធម្មនុញ្ញ​សម្រេច​មិន​លើក​យកមក​ពិចារណា​ឡើយ​តម្កល់​សេចក្តីសំរេច​របស់​គណៈ​ក​ម្មា​ធិ​ការ​ជាតិ​រៀបចំ​ការបោះឆ្នោត​ទុកជាបានការ​មាន​អនុភាព​អនុវត្ត និង​បិទផ្លូវ​តវ៉ា​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular