Home ព័ត៌មានសំខាន់ៗ រដ្ឋមន្ត្រី​ក...

រដ្ឋមន្ត្រី​ក្រសួងយុត្តិធម៌ ចេញ​អធិបញ្ជា ឲ្យ​តុលាការ ចាត់វិធានការ ជាបន្ទាន់ លើ​ឈ្មោះ សម រង្ស៊ី ចំពោះ​ករណី​ប្រមាថ យ៉ាងធ្ងន់ធ្ងរ​ដល់ អង្គ​ព្រះមហាក្សត្រ​

​ដោយៈ ស​រិ​ទ្ធ-ដេប៉ូ / ភ្នំពេញៈ រដ្ឋមន្ត្រី​ក្រសួងយុត្តិធម៌ បានធ្វើ​អធិបញ្ជា ឲ្យ​តុលាការ ចាត់វិធានការ តាមច្បាប់​ជាបន្ទាន់ និង​តឹងរ៉ឹង​បំផុត លើ​ឈ្មោះ សម រង្ស៊ី ចំពោះ​ករណី​ប្រមាថ យ៉ាងធ្ងន់ធ្ងរ ដល់​អង្គ​ព្រះមហាក្សត្រ ដោយយោង​មាត្រា ៧ នៃ​រដ្ឋធម្មនុញ្ញ នៃ​ព្រះរាជាណាចក្រ​កម្ពុជា មាត្រា ៤៣៧ ស្ទួន នៃ​ក្រមព្រហ្មទណ្ឌ នៃ​ព្រះរាជាណាចក្រ​កម្ពុជា និង​មាត្រា ២៩ នៃ​ក្រម នីតិវិធី​ព្រហ្មទណ្ឌ នៃ​ព្រះរាជាណាចក្រ​កម្ពុជា​។​

​ក្នុង​លិខិត​ចុះ​ថ្ងៃ​២៥ ខែធ្នូ ឆ្នាំ​២០២០ លោក កើត រិ​ទ្ធ ផ្ញើជូន​លោក ច្រឹង ខ្មៅ ព្រះរាជអាជ្ញា អម​សាលាដំបូង រាជធានី​ភ្នំពេញ ជ្រាបថាៈ ឈ្មោះ សម រង្ស៊ី បាន​បង្ហោះ​សារ តាមរយៈ គណនី ហ្វេ​ស​ប៊ុ​ក របស់ខ្លួន កាលពី​ថ្ងៃទី​២០ ខែធ្នូ ឆ្នាំ​២០២០ ដែលមាន​ខ្លឹមសា​ថាៈ “… ឥឡូវនេះ ហ៊ុន សែន ស្ងាត់​ជ្រាប ក្នុង​រឿងនេះ ហើយ​គាត់​ត្រៀម​សងលុយ សប្បុរសជន ដែល​ចាញ់បោក​គាត់ មាន​ទាំង​ស្តេច​ទីងមោង ផងដែរ​”​។​

​ខ្លឹមសារ​នៃ​សារ ដែល​ឈ្មោះ សម រង្ស៊ី បាននិងកំពុង​ផ្សព្វផ្សាយ ជា​សាធារណៈ តាមរយៈ បណ្តាញ​សង្គម​នេះ គឺជា​ការប្រមាថ ចំពោះ​អង្គ​ព្រះមហាក្សត្រ ដោយបាន​ធ្វើឱ្យប៉ះពាល់ យ៉ាងធ្ងន់ធ្ងរ ដល់​សេចក្តីថ្លៃថ្នូរ និង​ព្រះកិត្តិនាម​របស់ ព្រះមហាក្សត្រ នៃ​ព្រះរាជាណាចក្រ កម្ពុជា ជាទីគោរព​សក្ការៈ ដ៏​ខ្ពង់​ខ្ពស់បំផុត របស់​ប្រជារាស្ត្រ​ខ្មែរ ទូទាំងប្រទេស​។ ទង្វើ​នេះ គឺជា​ការរំលោភបំពាន លើ​រដ្ឋធម្មនុញ្ញ​នៃ ព្រះរាជាណាចក្រ​កម្ពុជា និង​ត្រូវ​បានកំណត់ ជា​បទល្មើស​ព្រហ្មទណ្ឌ ដែលមាន​ចែង និង​ផ្តន្ទាទោស តាម​បញ្ញត្តិ នៃ​មាត្រា ៤៣៧ ស្ទួន នៃ​ក្រមព្រហ្មទណ្ឌ​។​

​លិខិត​ដដែល បាន​អះអាងថាៈ យោងតាម​មាត្រា ២៩ នៃ​ក្រមនីតិវិធី​ព្រហ្មទណ្ឌ​នៃ​ព្រះរាជា ណា​ចក្រ​កម្ពុជា ក្រសួងយុត្តិធម៌ សូម​ឯកឧត្តម ព្រះរាជអាជ្ញា ចាត់វិធានការ​ផ្លូវច្បាប់ ជាបន្ទាន់ និង​តឹងរ៉ឹង​បំផុត ចំពោះ​អំពើ​ប្រមាថ ចំពោះ​អង្គ​ព្រះមហាក្សត្រ ខាងលើ ដោយ​អនុវត្ត ស្របតាម​នីតិវិធី ជា​ធរមាន​៕/V​-PC

ទីតាំងផ្សាយពាណិជ្ជកម្ម

- Advertisment -



Most Popular