Home ព័ត៌មានសំខាន់ៗ ក្រសួងសុខាភិប...

ក្រសួងសុខាភិបាល​មិន​អនុញ្ញាតឱ្យ​គ្លីនិក​ឯកជន​ធ្វើការ​ពិនិត្យ​និង​ព្យាបាល​អ្នកជំងឺ​ដែល​សង្ស័យថា​មាន​កូ​វីដ​-១៩

ដោយៈ​តារា​រិ​ទ្ធ​/​ភ្នំពេញ​៖​នៅ​ថ្ងៃទី​២៥​ ខែធ្នូ​ឆ្នាំ២០២០ រដ្ឋមន្ត្រី​ក្រសួងសុខាភិបាល​បាន​ចេញសេចក្តីណែនាំមួយទៅ ដល់​ម្ចាស់​សេវា​ពិនិត្យ​ព្យាបាល​ជំងឺ​ឯកជន​ទាំងអស់​មិន​អនុញ្ញាតឱ្យ​​ធ្វើការ​ព្យាបាល​អ្នកជំងឺ​កូ​វី​ដី​១៩(CoVID-19) និង​ធ្វើតេស្ត​រក​មេរោគ​កូ​វីដ​១៩  លើអ្នកជំងឺដែលសង្ស័យថាជា​ជំងឺ​កូ​វីដ​-១៩ ។

​នៅក្នុង​សេចក្តីជូនដំណឹង​របស់​ក្រសួងសុខាភិបាល​បាន​សង្កត់ធ្ងន់ថា​៖​ដើម្បី​ទប់ស្កាត់​កុំឱ្យ​មាននូវ​ការ​រាតត្បាត​ទ្រង់ ទ្រាយ​ធំ​នៅក្នុង​សហគមន៍​ក្រសួងសុខាភិបាល​តម្រូវ​ឱ្យ​ម្ចាស់​សេវា​ពិនិត្យ​ព្យាបាល​ជំងឺ​ឯកជន​ទាំងអស់​ចូលរួម​ពង្រឹង​បន្ថែមទៀត​ក្នុងការ​អនុវត្ត​វិធានការណ៍​ការពារ​កុំ​ឱ្យមាន​ចម្លងជំងឺ​កូ​វីដ​-១៩​ទៅក្នុង​សហគមន៍​និង​នៅតាម​សេវា ពិនិត្យ​ព្យាបាល​ជំងឺ​ឯកជន​របស់ខ្លួន​ដោយ​អនុវត្ត​ឱ្យបាន​ខ្ជាប់ខ្ជួន​នូវ​គោលការណ៍​ណែនាំ​ដូចខាងក្រោម​៖

១.​មិន​អនុញ្ញាត​ឱ្យធ្វើ​ការពិនិត្យ​និង​ព្យាបាល​អ្នកជំងឺ​ដែល​សង្ស័យថា​ជា​ជំងឺ​កូ​វីដ​-១៩ នៅតាម​កន្លែង​ពិនិត្យ​ព្យាបាល​អ្នកជំងឺ​ឯកជន​របស់ខ្លួន​ឡើយ​។ ២.​ប្រសិនបើ​មាន​អ្នក ជំងឺ​មក​ពិនិត្យ​ជំងឺ​នៅ​កន្លែង​ពិនិត្យ​ព្យាបាល​ជំងឺ​របស់ខ្លួន​ដែល​សង្ស័យថា​ជា​ជំងឺ​កូ​វីដ​-១៩​ដូច​តាម​នៅក្នុង​និយមន័យ​ករណី​សង្ស័យ​ជំងឺ​កូ​វីដ​-១៩ គឺ​មិនត្រូវ​ធ្វើការ​ពិនិត្យ​និង ព្យាបាល​ឡើយ​សូមជួយ​ពន្យល់​និង​ណែនាំ​អ្នកជំងឺ​ឱ្យ​គាត់​បានដឹង​អំពី​ជំងឺ​កូ​វីដ​-១៩ រួច​ដាក់​គាត់​ឲ្យ​នៅ​ដាច់ដោយឡែក​បន្ទាប់មក​ជូន​ព័ត៌មាន​ទៅ​មន្ទីរ​សុខាភិបាល​រាជធានី ខេត្ត ដែល​នៅ​ជិត​ដើម្បី​សម្របសម្រួល​បញ្ជូន​គាត់​ទៅកាន់​មន្ទីរពេទ្យបង្អែក​រដ្ឋ​(​ចំពោះ​អ្នក​នៅ​ខេត្ត​គឺ​មន្ទីរពេទ្យ​ខេត្ត និង មន្ទីរពេទ្យ​មិត្តភាព​ខ្មែរ​-​សូ​វៀត ចំពោះ​អ្នក​នៅ​រាជ ធានី​ភ្នំពេញ​)​ជាបន្ទាន់​។ ៣.​ត្រូវអនុវត្ត​នូវ​អនាម័យ​សម្អាត​ទីកន្លែង​ពិនិត្យ​ព្យាបាល​ជំងឺ​ដោយមាន​ម៉ាស់​សម្រាប់​ពាក់​មាន​អាល់កុល​សម្រាប់​លាងដៃ​ឬ​អាល់កុល​ដែល​សម្រាប់​លាងដៃ​ជាប្រចាំ ។ ក្នុងករណី​ដែលមាន​អ្នកជំងឺ​សង្ស័យថា​ជា​ជំងឺ​កូវ​ដ​-១៩ បានមក​ពិនិត្យ​ក្នុង​កន្លែង​ព្យាបាល​របស់ខ្លួន ម្ចាស់​សេវា​ត្រូវ​ប្រើ​សូ​លុ​ស្យុ​ង​អូ​សា​វែ​ល​ដែលមាន កំហាប់​0,1% ក្នុងការ​ជូត​សម្អាត​ឥដ្ឋ​និង​បាញ់សម្លាប់​មេរោគ​នៅ​កន្លែង​អ្នកជំងឺ​ដែល​បានមក​ពិនិត្យ និង​ក្នុង​បរិវេណ​ពិនិត្យ​ព្យាបាល​អ្នកជំងឺ​ទាំងមូល​។ ៤.​ត្រូវធ្វើ​ច​ត្តា​ឡី​ស័ក រយៈពេល​១៤​ថ្ងៃ​និង​យក​សំណាក​ទៅពិនិត្យ​និង​តាមដាន​សុខភាព​ជាប្រចាំ​ចំពោះ​គ្រូពេទ្យ និង​បុគ្គលិក​ដែល​បាន​ប៉ះពាល់​ជាមួយនឹង​អ្នកជំងឺ​ដែល​សង្ស័យថា​ជា​ជំងឺ​កូ​វីដ​-១៩ នោះ​។ ៥. ព័ត៌មាន​បន្ថែម​សូម​ទាក់ទង​មក​លេខ ១១៥ ដោយ​ឥតគិតថ្លៃ​ឬ​ទាក់ទង​មក​ក្រសួងសុខាភិបាល​តាម​លេខ​ទូរស័ព្ទ ០១២ ៨២៥ ៤២៤ ឬ ០១២ ៤៨៨ ៩៨១ ឬ ០១២ ៨៣៦ ៨៦៨ ។ ៦. ការគ្រប់គ្រង​សំណល់​ពី​សេវា​ថែទាំ​សុខភាព ការពិនិត្យ​អ្នកជំងឺ ម្ចាស់​សេវា​សុខាភិបាល​ឯកជន ត្រូវមាន​ធុងសម្រាម​ពណ៌​លឿង​ដែល មាន​ស្លាក​សញ្ញា​គ្រោះថ្នាក់​ពណ៌​ខ្មៅ សម្រាប់​ដាក់​សំណល់​ឆ្លង​រោគ​និង​សម្ភារៈ​អ្នកជំងឺ​ដែល​សង្ស័យ​ជំងឺ​កូ​វីដ​-១៩​ប្រើ​រួច​៖​ម៉ាស់​ពាក់ ក្រដាស់​ជូត​ស្លេស ។​ល​។​បន្ទាប់មក​ត្រូវ ប្រមូលយក​សំណល់​នោះ​ទៅ​ដុត​កំទេចចោល​ជាមួយ​ឡ​ដែលមាន​សីតុណ្ហភាព​ខ្ពស់​ចាប់ពី​៨០០​អង្សា​សេ​។​៧. ម្ចាស់​សេវា​ពិនិត្យ​ព្យាបាល​ជំងឺ​ឯកជន​ទាំងអស់​ត្រូវ​ជួយ​អប់រំ ផ្សព្វផ្សាយ​អំពី​វិធានការណ៍​នៃ​ការចម្លង​ជំងឺ​កូ​វីដ​-១៩ ទៅដល់​អ្នកជំងឺ​និង​ក្រុមគ្រួសារ​អ្នកជំងឺ​ព្រមទាំង​ឱ្យ​គាត់​ចូលរួម​សហការ​ទប់ស្កាត់​ការ​រាតត្បាត​នៃ​ជំងឺ​កូ​វីដ​-១៩​ដោយ ការ​លាងដៃ​ជាមួយ​ទឹក​និង​សាប៊ូ​ឬ​អាល់កុល​ឲ្យ​បាន​ញឹកញាប់​និង​ពាក់​ម៉ាស់ ព្រមទាំង​រក្សា​នូវ​គម្លាត​សុវត្ថិភាព​យ៉ាងតិច​ពី​១​ម៉ែត្រ​កន្លះ​ឡើងទៅ​និង​ត្រូវអនុវត្ត​នូវ​វិធានការណ៍ ៣ ការពារ និង ៣ កុំ គឺ ៖ ក​. អនុវត្ត ៣ ការពារ -​ពាក់​ម៉ាស់ -​លាងដៃ​ឲ្យ​បាន​ញឹកញាប់​-​គម្លាត​សុវត្ថិភាព​សង្គម​និង​គម្លាត​សុវត្ថិភាព​បុគ្គល​ដោយ​ចាប់ពី​១ ម៉ែត្រ​កន្លះ​ឡើង ទៅ​ឱ្យបាន​គ្រប់គ្នា​និង​នៅ​គ្រប់​ទីកន្លែង​។ ខ​. អនុវត្ត​៣​កុំ -​កុំ​ចូលទៅ​កន្លែង​បិទ​ជិត​គ្មាន​ខ្យល់​ចេញចូល​និង​ប្រើ​ម៉ាស៊ីនត្រជាក់​ច្រើនពេក​រក​កន្លែង​មាន​ខ្យល់​ចេញចូល​ល្អ​-​កុំ ទៅ​កន្លែង​មនុស្ស​ច្រើន​កុះករ -​កុំ​ប៉ះពាល់​គ្នា​កុំ​ចាប់ដៃគ្នា កុំ​កៀក​ស្មា​គ្នា កុំ​ឱប​គ្នា​ជាដើម​ពេល​ជួបគ្នា​អ្នកមាន​ផ្តាសាយ​ឬ​សង្ស័យ​មាន​ជំងឺ​កូ​វីដ​-១៩ កុំ​ចេញ​ក្រៅ ហើយ​ត្រូវ​ទា ក់​ទង​ទៅ​គ្រូពេទ្យ​ឬ​ហៅ​ទៅ​លេខ​១១៥​។​ម្ចាស់​សេវា​ពិនិត្យ​ព្យាបាល​ជំងឺ​ឯកជន​ទាំងអស់​ត្រូវអនុវត្ត​ទៅតាម​ការណែនាំ​ខាងលើនេះ​ដោយ​ស្មារតី​ទទួលខុសត្រូវ​ខ្ពស់បំផុត​៕

ទីតាំងផ្សាយពាណិជ្ជកម្ម

- Advertisment -



Most Popular