បុណ្យ​បុក​ស៊ី​ង ដេ​យ៍ របស់​ពួក​អឺរ៉ុប ប្រហាក់ប្រហែល ពុទ្ធបូជា​ខ្មែរ និង​អាំង​ប៉ាវ​ចិន

ដោយៈ មេសា / ភ្នំពេញៈ បុក​ស៊ី​ង ដេ​យ៍ (Boxing Day) គឺជា​ថ្ងៃ​សម្រាក​សាធារណៈ សម្រាប់​បណ្តា​ប្រទេស ដែល​គោរព​សាសនា​គ្រិស្ត ហើយ​ត្រូវបានធ្វើ នៅ​ថ្ងៃទី ២៦ ខែធ្នូ រៀងរាល់ឆ្នាំ ជា​ថ្ងៃ​ទីមួយ ឬ ទី​ពីរ បន្ទាប់ពី​ថ្ងៃបុណ្យ​ណូអែល ( Christmas Day ) ហើយក៏ បាន​ក្លាយជា​ថ្ងៃ​សម្រាក ដើរ​ទិញ​ឥ​វ៉ាន់ ដ៏​ពាក់​ពពូន​ប្រចាំឆ្នាំ សម្រាប់​ប្រទេស​ខ្លះ ហើយ​មាន ផ្នែក​ខ្លះ មាន​អត្ថន័យ ប្រហាក់ប្រហែល​នឹង​ហឹប ពុទ្ធបូជា​ប្រពៃណី ខេ​មរ​ពុទ្ធសាសនិក ហើយ​ទិដ្ឋភាព​ខ្លះ មាន​អត្ថន័យ ប្រហាក់ប្រហែល​នឹង​អាំង​ប៉ាវ ប្រពៃណី​របស់ ជនជាតិ​ចិន ហើយក៏​ជា​ថ្ងៃ​សម្រាប់ ប្រកួត​កីឡា ដ៏​សំខាន់​ដែរ​។​

​អត្ថន័យ​បុក​ស៊ី​ង ដេ​យ៍ៈ រូប​ស័ព្ទ នៃ​ពាក្យ​ថា Boxing Day ទីនេះ ប្រែ​ថា ថ្ងៃ​នៃ​ការបំពេញ ប្រអប់ ។ ប៉ុន្តែ​មានការ​ឱ្យនិយមន័យ ទៅលើ​អត្ថន័យ​នៃ​ពាក្យ​ថា Boxing Day ជាច្រើន ។ បុក​ស៊ី​ង ដេ​យ៍ ត្រូវបានធ្វើ​នៅ​ប្រទេស​អូស្ត្រាលី កាណាដា ញូ​វ​ហ្សេ​ឡែ​ន ចក្រភព​អង់គ្លេស និង បណ្តា​ក្រុម​រដ្ឋ​សហ​ធន​មួយចំនួន ។ នៅ​ប្រទេស អៀរ​ឡង់ ពិធីបុណ្យ Boxing Day ត្រូវបាន​គេ​ស្គាល់​ថា ជា​ថ្ងៃបុណ្យ​ព្រះអរហន្ត​ស្តេ​ហ្វិ​ន ( St. Stephen’s Day )​។ ឆ្នាំ​១៩៩៤ អាហ្វ្រិក​ខាងត្បូង បាន​ប្តូរ បុក​ស៊ី​ង ដេ​យ៍ ទៅជា Day of Goodwill ។​

​ថ្ងៃ បុក​ស៊ី​ង ដេ​យ៍ នេះ កើត​នៅ​អឺរ៉ុប ដោយមាន​តំណាល​ថា នៅ​សម័យ​នៅ​ប​ស្ចឹ​ម​សម័យ រ៉ូ​ម៉ាំង គេ​បានដាក់​ប្រអប់​ដែក នៅ​ខាងក្រៅ​វិហារ​នានា នៃ​គ្រិស្តសាសនា ដើម្បី​ទទួល អំណោយ ពី​គ្រប់​មជ្ឈដ្ឋាន សម្រាប់​បូជា ក្នុង​ពិធីបុណ្យ វិសុទ្ធិ​បុគ្គល ស្តេ​ហ្វិ​ន (Saint Stephen) ដែល​ធ្វើឱ្យ​យើង យល់បាន​ថា ប្រអប់​ដែក​នេះ មាន​អត្ថន័យ​ប្រហាក់ប្រហែល​នឹង​ហឹប ពុទ្ធបូជា នៅ​ប្រទេស​កម្ពុជា​យើង ។ ទង្វើ​នៃ​ការដាក់ ឬ​ការបរិច្ចាគ​របស់រប​រ​នានា ទៅក្នុង​ប្រអប់ ឬ ហឹប​ដែក នោះឯង​ហើយ ដែល​មានន័យថា “ ការបំពេញ​ប្រអប់ “ ឬ “ បំពេញ​ហឹប “ ដែលជា​ភាសា​អង់គ្លេស ហៅថា Boxing (​បុក​ស៊ី​ង​) ។ មួយទៀត ប្រពៃណី ទំនៀមទម្លាប់ ពី​បុរាណ​អង់គ្លេស បន្ទាប់ពី​កម្មករ ឬ អ្នកបម្រើ​របស់​ពួកគេ​បានធ្វើការ​នៅ លើ​កសិដ្ឋាន ពេញ​មួយឆ្នាំ ដោយ​ល្អ​មក ម្ចាស់​កសិដ្ឋាន ឬ ថៅកែ រមែង​បានអនុញ្ញាត ឱ្យ​ពួកកម្មករ​ទាំងនោះ ឈប់សម្រាក ពី​ការងារ​មួយថ្ងៃ គឺ​នៅ​ថ្ងៃទី​២៦ ខែធ្នូ ដើម្បី​ទៅលេង ស្រុកកំណើត ឬ ជួបជុំ​គ្រួសារ​។ ពួក​ថៅកែ តែងតែ​ឱ្យ​ពួកកម្មករ ទាំងនោះ​នូវ ប្រអប់​មួយម្នាក់ ដែល​ក្នុង​ប្រអប់​នោះ មាន​អំណោយ ជា​អាហារ​ចំណី ឬ សម្លៀកបំពាក់ និង ប្រាក់កាស ( បន្ថែម​លើ​ប្រាក់ខែ ដែល​គេ​ត្រូវ​ទទួលបាន ប្រចាំខែ ) ទៅតាម​ទឹកចិត្ត​ថៅកែ ។ ប្រពៃណី មួយ​នេះ យើង​អាច​និយាយបានថា មាន​ភាព​ប្រហាក់ប្រហែលគ្នា ទៅនឹង​ប្រពៃណី​ជនជាតិ ចិន ដែល​ចែក​អាំង​ប៉ាវ ឬ តែ​អៀរ នៅក្នុង​ឱកាស​បុណ្យ ចូលឆ្នាំថ្មី​របស់​ពួកគេ​ដែរ​។​

​បុក​ស៊ី​ង ដេ​យ៍ ប​ច្ចុ​ប្ប​ន្នៈ បច្ចុប្បន្ននេះ សម្រាប់​ពួកពាណិជ្ជករ នៅ​អង់គ្លេស ថ្ងៃ​បុក​ស៊ី​ក ដេ​យ៍ ជា​ថ្ងៃ​ដែល​ពួកគេ ដើរ​ប្រមូល​ប្រអប់​ណូអែល (Christmas boxes) ដែល​នៅក្នុង​ប្រអប់​នោះ មាន​លុយកាក់ ឬ អំណោយ​ផ្សេងៗ ពី​អតិថិជន ជាការ​អរគុណ សម្រាប់​ការផ្តល់ ឬ បម្រើសេវា​កម្ម​របស់​ពួកគេ ពេញ​មួយឆ្នាំ​មក ។

​នៅ​អង់គ្លេស កាណាដា ញូ​វ​ហ្សេ​ឡែ​ន និង រដ្ឋ​មួយចំនួន នៃ​ប្រទេស​អូស្ត្រាលី ថ្ងៃ​បុក​ស៊ី​ង ដេ​យ៍ បាន​ក្លាយជា “ ថ្ងៃ​សម្រាក ដើម្បី​ដើរ​ទិញ​ឥ​វ៉ាន់​ប្រចាំឆ្នាំ​” ដែល​ភាសា​អង់គ្លេស ហៅថា a shopping holiday ដែលមាន​លក្ខណៈ ស្ទើរតែ​ដូចគ្នា ទៅនឹង​ថ្ងៃបុណ្យ នៃ ក្តី​អំណរ ( Thanksgiving ) នៅ​សហរដ្ឋអាមេរិក ។​

​ពេញ​មួយថ្ងៃ នៃ​ថ្ងៃ​បុក​ស៊ី​ង ដេ​យ៍ នេះ ហាង​លក់ទំនិញ​នានា បាន​លក់ទំនិញ​ចុះថ្លៃ​យ៉ាង លើសលប់ ហេតុនេះ​ទើប នៅមុខ​ហាង​លក់ទំនិញ​នីមួយៗ​មាន​មនុស្ស​ច្រើន​មីរដេរដាស ភ្លូកទឹកភ្លូកដី​នាំគ្នា​ទៅ​តម្រង់​ជួរ​ដ៏​វែង​អន្លាយ​ចាំ​ចូល​ទិញ​ឥ​វាន់ ឯ​ហាង​ខ្លះ​មាន​អ្នក​ប្រជ្រៀត ស្មា​គ្នា​ចូល​ទិញ​ទំនិញ តាំងពី​ព្រលឹម​អុល រហូតដល់​យប់​ជ្រៅ ហើយ​ហាង​ខ្លះ​បាន​បន្ត លក់ទំនិញ​ក្នុងតម្លៃ ថ្ងៃ បុក​ស៊ី​ង ដេ​យ៍ (​តម្លៃ​បញ្ចុះ​យ៉ាង​ពិសេស​) នេះ​រយៈពេល​មួយ​សប្តាហ៍ ក៏មាន ដែល​បានន័យថា​ពួកគេ​លក់ទំនិញ​លាង​ឃ្លាំង ។​

​ចំពោះ​វិស័យ​កីឡា​វិញ នៅ​អង់គ្លេស ស្កុ​តឡែ​ន និង អៀរ​ឡង់​ខាងជើង ការប្រកួត​កីឡា បាល់ទាត់ Premier League អង់គ្លេស Premier League ស្កុ​តឡែ​ន និង Premier League អាយ​រី​ស សុទ្ធតែ​បានរៀបចំ​កម្មវិធី​ប្រកួត​ជាពិសេស សម្រាប់​ថ្ងៃ​បុក​ស៊ី​ង ដេ​យ៍ នេះ​។ តាម​ទម្លាប់ ការប្រកួត​នៅ​ថ្ងៃ បុក​ស៊ី​ង ដេ​យ៍ នេះ គឺជា​ការប្រកួត រវាង​ក្រុម​ជា​គូប្រជែង នៅក្នុង​តំបន់​ជាមួយគ្នា ដើម្បី​កុំឱ្យ​ពិបាក ដល់​ក្រុម​កីឡាករ និង ពួក​អ្នកគាំទ្រ ត្រូវធ្វើ​ដំណើរ ទៅ​ទី​ផ្សេង ដើម្បី​ប្រកួត និង ទស្សនាការ​ប្រកួត បន្ទាប់ពី​ថ្ងៃបុណ្យ​ណូអែល ដែល​ពួកគេ កំពុង​នៅ​ជួបជុំ​គ្រួសារ ។ ការប្រកួត​ជើងឯក វាយ​កូ​គោល​លើ​ទឹកកក ជាច្រើន ក៏បាន​កំណត់ នៅ​ថ្ងៃទី ២៦ ខែ ធ្នូ នេះដែរ ។​

​នៅក្នុង​បណ្តា​ប្រទេស​អាហ្វ្រិក ដែលជា​ក្រុម​រដ្ឋ​សហ​ធន (Commonwealth =​បណ្តា​ប្រទេស ដែល​កាលពី​អតីត ស្ថិតនៅក្រោម​អាណានិគម​អង់គ្លេស ) ជាពិសេស ប្រទេស​ហ្កា​ណា អ៊ូ​ហ្ក​ង់​ដា ម៉ាឡាវី សាម​បៀ និង តង់​ហ្សា​នី ការប្រកួត​ដណ្តើមពាន​ផ្សេងៗ ក៏ត្រូវ​បានធ្វើ នៅ​ថ្ងៃ បុក​ស៊ី​ង ដេ​យ៍ នេះដែរ ។ ហេតុនេះ​ថ្ងៃ បុក​ស៊ី​ង ដេ​យ៍ ក៏បាន​ក្លាយជា​កាលបរិច្ឆេទ សំខាន់​មួយ សម្រាប់​ព្រឹត្តិការណ៍ នៃ ការប្រកួត​កីឡា​។ ថ្ងៃ បុក​ស៊ី​ង ដេ​យ៍ ក៏​ជា​ទិវា ដ៏​មាន​ប្រជា​ប្រី​យ៍​ផងដែរ នៅ​អាមេរិក និង អង់គ្លេស សម្រាប់​ពួក​ព្រានប្រមាញ់​កញ្ជ្រោង ទោះ​ជាការ​បរបាញ់​កញ្ជ្រោង ត្រូវបាន​ហាមឃាត់ កាលពី​ឆ្នាំ​២០០៤ ក៏ដោយ ។​

​ជារួម​ទៅ ថ្ងៃ​បុក​ស៊ី​ង ដេ​យ៍ ( ២៦ ធ្នូ ) នេះ គឺជា​ថ្ងៃ​សម្រាក ដែល​សេសសល់ ពីថ្ងៃ​បុណ្យ ណូអែល (២៥ ធ្នូ ) ហើយក៏​ជា​ឱកាស​ត្រៀម ស្វាគមន៍​ឆ្នាំ​ថ្មី នៃ ឆ្នាំ​សកល​ផង និង​ជា​ឱកាស លក់ និង ទិញ​ទំនិញ លាង​ឃ្លាំង​ផងដែរ ៕/V-PC/សរន

ទិដ្ឋភាព​ក្នុង​ហាង​លក់ទំនិញ​នា ថ្ងៃ បុក​ស៊ី​ង ដេ​យ៍ (អ៊ី​ន​ធឺ​ណេ​ត)

ការប្រកួត​បណ្តែតទូក​ក្តោង​នៅ​ថ្ងៃ បុក​ស៊ី​ង ដេ​យ៍ (អ៊ី​ន​ធឺ​ណេ​ត)

ទីតាំងផ្សាយពាណិជ្ជកម្ម

- Advertisment -

Most Popular