Home ព័ត៌មានសំខាន់ៗ ដោយសារកូ​វីដ​...

ដោយសារកូ​វីដ​១៩ ចិន​នឹង​ក្លាយ​ជា​មហាអំណាច​សេដ្ឋកិច្ច​ទី​១​ក្នុង​លោក​នៅ​ត្រឹម​ឆ្នាំ​២០២៨ មុន​ការប៉ាន់ស្មាន​ពីមុន​៥​ឆ្នាំ​

​ប្រែ​សម្រួលៈ​វាសនា​/​ឡុង​ដ៍​៖​ចិន​នឹង​វ៉ា​ដាច់​អាម៉េរិក​និង​ក្លាយ​ជា​មហាអំណាច​សេដ្ឋកិច្ច​លេខ​១​លើ​លោក​នៅ​ត្រឹម​ឆ្នាំ​២០២៨ នៅ​៥​ឆ្នាំមុន​ការប៉ាន់ស្មាន​ពីមុន​ដោយសារតែ​សកម្មភាព​សេដ្ឋកិច្ច​ផ្ទុយ​គ្នា​របស់​​ប្រទេស​ទាំង​ពីរ​ក្នុងអំឡុងពេល​ពិភពលោក​ជួប​វិបត្តិ​ជំងឺ​ឆ្លងកូវី​ដ​១៩, នេះ​បើ​តាម​ក្រុមប្រឹក្សា​ផ្តល់​គំនិត​មួយ​។​

​មជ្ឈមណ្ឌល​សំរាប់​ការសិក្សា​អំពី​សេដ្ឋកិច្ច​និង​ធុរកិច្ច (CEBR)​បាន​និយាយ​នៅក្នុង​របាយការណ៍​ប្រចាំ​ឆ្នាំ​ដែល​ត្រូវ​បាន​ចេញផ្សាយ​កាលពី​ថ្ងៃ​សៅរ៍​ទី​២៦​ធ្នូ​នេះ​ថា​«​ពេលខ្លះ រឿង​សេដ្ឋកិច្ច​សកល​ជា​ការតស៊ូ​​សេដ្ឋកិច្ច​និង​អំណាច​ទន់​រវាង​អាម៉េរិក​និង​ចិន​។​ជំងឺ​ឆ្លងកូវី​ដ​១៩​និង​ផលប៉ះពាល់​របស់​វា​លើ​សេដ្ឋកិច្ច​ពិតជា​អំណោយផល​ដល់​ចិន​ក្នុង​ការប្រកួតប្រជែង​គ្នា​នេះ​»​។​

CEBR បាន​និយាយថា «​ការគ្រប់គ្រង​ចាត់ចែង​ដ៏​មាន​ទេពកោសល្យ​របស់​ចិន​លើ​ជំងឺឆ្លង​នេះ »​ដែល​រឹតត្បិត​ដ៏​តឹងតែង​នៅ​គ្រា​ដំបូង តែ​បន្ធូរបន្ថយ​ជាមួយនឹង​កំរិត​ឆ្លង​ទាប​ជា​រៀង​រហូត​មក​គួបផ្សំ​នឹង​​ជំងឺ​កូវី​ដ​១៩ វាយប្រហារ​កំណើន​រយៈ​ពេល​វែង​នៅលើ​ខាងលិច មានន័យថា​ដំណើរការ​សេដ្ឋកិច្ច​ចិន​ល្អប្រសើរ​ជាទូទៅ​។​

​ចិន​ត្រូវ​រំពឹងថា​នឹង​មាន​កំណើន​សេដ្ឋកិច្ច​ជា​មធ្យម​ប្រមាណ​៥,៧​ភាគរយ​ក្នុង​មួយ​ឆ្នាំ​ចាប់ពី​ឆ្នាំ​២០២១​ដល់​២០២៥ មុន​ចុះ​មក​វិញ​មក​នៅត្រឹម​៤,៥​ភាគរយ​ចាប់ពី​ឆ្នាំ​២០២៦​ដល់​២០៣០​។​

​អាម៉េរិក​ទំនងជា​នឹង​មាន​កំណើន​ខ្លាំង​នៅក្រោយ​វិបត្តិកូ​វីដ​១៩​នៅ​ឆ្នាំ​២០២១ តែ​នឹង​មាន​ត្រឹម​១,៩​ភាគរយ​ក្នុង​មួយ​ឆ្នាំ​រវាង​ឆ្នាំ​២០២២​ដល់​២០២៤ និង​បន្ទាប់មក​ចុះ​មក​នៅត្រឹម​១,៦​ភាគរយ​។​

​ក្នុងពេល​ជាមួយគ្នា ជប៉ុន​បន្ត​នៅ​ជា​មហាអំណាច​សេដ្ឋកិច្ច​ទី​៣​ក្នុង​លោក​ដដែល បើ​និយាយ​អំពី​ទំហំ​សេដ្ឋកិច្ច​ជា​ដុល្លារ ។​ឋានៈ​នេះ​នឹង​បន្ត​រហូត​ដល់​ដើម​ទសវត្សរ៍​ឆ្នាំ​២០៣០​នៅពេល​ដែល​ប្រទេស​អាស៊ី​ខាង​​កើត​មួយ​នេះ​នឹង​ត្រូវ​ចូល​ជំនួស​ដោយ​ឥណ្ឌា ដោយ​រុញ​អាឡឺម៉ង់​ពី​ចំណាត់ថ្នាក់​ទី​៤​ទៅ​ទី​៥​។​

​ចក្រភព​អង់គ្លេស បច្ចុប្បន្ន​នៅ​លេខ​រៀង​ទី​៥ នឹង​ធ្លាក់​ចុះ​ដល់​ទី​៦​ចាប់ពី​ឆ្នាំ​២០២៤​ទៅ​។​

​តាមពិត​ចិន​បាន​ចូល​ជំនួស​អាម៉េរិក​រួចទៅហើយ​ក្នុងនាម​ជា ដៃគូ​ពាណិជ្ជកម្ម​ធំ​បំផុត​របស់​សហភាព​អឺរ៉ុប ក្នុងពេល​ផ្នែក​ផ្សេងៗ​កំពុង​ប្រឈម​ដោះស្រាយ​នឹង​ជំងឺ​ឆ្លងកូវី​ដ​១៩​។​ចាប់ពី​ត្រីមាស​ទី​៣​នៃ​ឆ្នាំ​២០២០​មក ចិន​បាន​វ៉ា​ដាច់​អាម៉េរិក​និង​បាន​ក្លាយជា​ដៃគូ​ពាណិជ្ជកម្ម​កំពូល​របស់​សហភាព​អឺរ៉ុប នៅពេល​ជំងឺឆ្លង​រារាំង​អាម៉េរិក នៅពេល​ចិន​កំពុង​ងើប​ស្ទុះ​ឡើង​វិញ​៕

​សកម្មភាព​សេដ្ឋកិច្ចចិនកំពុង​ងើប​ស្ទុះ​ឡើង​វិញ​ក្រោយ​ទប់ស្កាត់​កូវី​ដ​១៩​បាន​ជោគជ័យ ខណៈ​ដែល​អាម៉េរិក​ជួប​កំណើន​ឆ្លង​និង​ស្លាប់​ខ្ពស់ៗ​ប្រចាំថ្ងៃ​

ទីតាំងផ្សាយពាណិជ្ជកម្ម

- Advertisment -

Most Popular