Home ព័ត៌មានជាតិ សន្តិសុខ ជនសង្ស័យ​ម្នា...

ជនសង្ស័យ​ម្នាក់​ត្រូវ សមត្ថកិច្ច​ឃាត់ខ្លួន ក្រោយពី​ធ្វើ​សកម្មភាព គាស់​ទ្វារផ្ទះ​ចូល​លួច​យក​ម៉ូតូ​បានសម្រេច​

ដោយ​: ស​រិ​ទ្ធ / ភ្នំពេញ​: ជនសង្ស័យ​បាន​ម្នាក់​ក្នុងចំណោម​បក្ខពួក​៣​នាក់ បាន​ត្រូវ​សមត្ថកិច្ច​នគរបាល​ខ​ណ្ឌ​ដង្កោ​ឃាត់ខ្លួន កាលពី​ម៉ោង​០៣​និង​៥០​នាទី​ទៀបភ្លឺ ថ្ងៃទី​២៧ ខែធ្នូ ឆ្នាំ​២០២០ នៅ​ចំណុច​ផ្ទះ​លេខ​J60 ផ្លូវ​បេតុង ស្ថិតនៅ​ភូមិ​តា​ឡី សង្កាត់​ដង្កោ ខណ្ឌដង្កោ ក្រោយពី​ធ្វើ​សកម្មភាព គាស់​ទ្វារផ្ទះ​ចូល​លួច​យក​ម៉ូតូ​បានសម្រេច​។​

​ជនសង្ស័យ​ឈ្មោះ កូវ ពេជ្រ ភេទ​ប្រុស អាយុ​១៨​ឆ្នាំ ទីលំនៅ​ភូមិ​ដើម​ស្លែង សង្កាត់​ច្បារអំពៅ ខណ្ឌ​ច្បារអំពៅ រាជធានី​ភ្នំពេញ (​ជនសង្ស័យ​មាន​សារធាតុ​ញៀន​)​។​

​ជនរងគ្រោះ​ឈ្មោះ ង្វៀង វ៉ាន់​កាន់ ភេទ​ប្រុស អាយុ​៥៧​ឆ្នាំ ជនជាតិ​វៀតណាម មុខរបរ​ជាង​ធ្វើ​តុទូ ទីលំនៅ​ផ្ទះ​លេខ​J60 ផ្លូវ​លេខ​បេតុង ស្ថិតនៅ​ភូមិ​តា​ឡី សង្កាត់​ដង្កោ ខណ្ឌដង្កោ​។​

​លោក​វរសេនីយ៍ឯក ជឹម ស៊ីថា អធិការនគរបាល​ខ​ណ្ឌ​ដង្កោ បាន​ប្រាប់​ឱ្យដឹងថា កាលពី​ថ្ងៃទី​២៦ ខែធ្នូ ឆ្នាំ​២០២០ វេលា​ម៉ោង​៨​យប់ ជនរងគ្រោះ បាន​ទុក​ម៉ូតូ​១​គ្រឿង​ម៉ាក​ហុងដា FTR223 ពណ៌​ខ្មៅ ពាក់​ផ្លាកលេខ​ភ្នំពេញ​1CG-6804​នៅក្នុង​ផ្ទះ​រួច​បាន​ចាក់សោរ​ទ្វារ​ត្រឹម​ត្រូវតែ​ទ្វារផ្ទះ​មានតែ​ចំរឹង​ដែក ពុំទាន់​មាន​កញ្ចក់​ទេ ព្រោះ​ផ្ទះ​កំពុង​សាងសង់ ហើយ​ជនរងគ្រោះ​ក៏បាន​ឡើងទៅ​ដេក​នៅ​បន្ទប់​ជាន់​ទី​០១​ដូច​ធម្មតា​។ រហូតដល់​វេលា​ម៉ោង​០៣​និង​៥០​នាទី​ទៀបភ្លឺ ថ្ងៃទី​២៧ ខែធ្នូ ឆ្នាំ​២០២០ ស្រាប់តែ​ឮ​សម្លេង​បើកទ្វារ​ផ្ទះ​ខាងមុខ​។ ជនរងគ្រោះ​ក៏បាន​ចុះពីលើផ្ទះ​មកក្រោម ឃើញ​ទ្វារផ្ទះ​ចំហរ ហើយ​បាត់​ម៉ូតូ​ពី​កន្លែង​ទុក រួច​ជនរងគ្រោះ​ក៏បាន​យក​ម៉ូតូ​០១​គ្រឿង​ផ្សេងទៀត បើក​ចេញ​តាមរក​ដល់​ផ្សារ​សារឿន​យ៉ា​ន្នី ស្ថិតនៅ​ភូមិ​តា​ឡី​ខាងលើ ក៏​បានឃើញ​ជនសង្ស័យ​៣​នាក់ កំពុងតែ​សណ្តោង​ម៉ូតូ​របស់​ជនរងគ្រោះ​។ ពេលនោះ​ជនរងគ្រោះ​ក៏បាន​ស្រែកថា​ចោរៗ ធ្វើឱ្យ​ជនសង្ស័យ​ភ័យ​ក៏បាន​ទុក​ម៉ូតូ​របស់​ជនរងគ្រោះ​ចោល រួច​បើក​ម៉ូតូ​គេចខ្លួន​ទៅតាម​ផ្លូវ​២១៧ ហើយ​ក៏មាន​សមត្ថកិច្ច​ប៉ុស្តិ៍នគរបាល​រដ្ឋ​បាលដ​ង្កោ កំពុង​ជិះ​ម៉ូតូ​ល្បាត​ក្បែរ​នោះ បាន​ជួយ​អន្តរាគមន៍​ឃាត់ខ្លួន​បាន​ជនសង្ស័យ​ម្នាក់​យកមក​ធ្វើការ​សាកសួរ​នៅ​ប៉ុស្តិ៍នគរបាល​រដ្ឋ​បាលដ​ង្កោ​តាម​នីតិវិធី​ច្បាប់ ចំណែក​ជនសង្ស័យ​២​នាក់​ទៀត បាន​រត់​គេចខ្លួនបាត់​។​

​ជនសង្ស័យ​ត្រូវបាន​សមត្ថកិច្ច​កសាង​សំណុំរឿង បញ្ជូន​ទៅកាន់​សាលាដំបូង​រាជធានី​ភ្នំពេញ ដើម្បី​ចាត់ការ​បន្ត​៕

ទីតាំងផ្សាយពាណិជ្ជកម្ម

- Advertisment -

Most Popular