Home ព័ត៌មានជាតិ សុខាភិបាល ពលករ​ខ្មែរ មក...

ពលករ​ខ្មែរ មកពី​ប្រទេស​ថៃ បាន​ត្រូវធ្វើ​ច​ត្តា​ឡី​ស័ក ជិត ១.០០០ នាក់ ក្នុង​រយ​:​ពេល ១​សប្តាហ៍

ដោយៈ ភ្នំ​ខៀវ / បាត់ដំបងៈ អាជ្ញាធរ​ស្រុក​កំរៀង និង​អាជ្ញាធរខេត្ត​បាត់ដំបង បានទទួល​ពលករ​ខ្មែរ ដែល​វិលត្រឡប់​ពី​ប្រទេស​ថៃ ដោយសារ​ការរីក​រាល​ដាល ជំងឺ​កូ​វីដ​-១៩ ឲ្យ​ធ្វើ​ច​ត្តា​ឡី​ស័ក ជិត ១.០០០ នាក់ ក្នុង​រយៈពេល ១​សប្តាហ៍​។​

​លោក វឿ​ង ប៊ុន​រ៉េត ប្រធាន​មន្ទីរ​សុខាភិបាល ខេត្តបាត់ដំបង បានបង្ហាញ​ឲ្យ​ដឹង នៅ​ថ្ងៃទី​២៨ ខែធ្នូ ឆ្នាំ​២០២០​នេះ​ថាៈ រយ​:​ពេល ៧​ថ្ងៃ ចាប់ពី​ថ្ងៃទី​២១ ដល់​ថ្ងៃទី ២៧ ខែធ្នូ​នេះ អាជ្ញាធរ​ស្រុក​កំរៀង និង​អាជ្ញាធរខេត្ត​បាត់ដំបង បានទទួល​យក​ពលក​រ​ខ្មែរ និង​រៀបចំ​ធ្វើ​ច​ត្តា​ឡី​ស័ក នៅតាម​មណ្ឌល​ផ្សេងៗ សរុប​ចំនួន ៧៣២ នាក់ ក្នុងនោះ​ស្រី្ត និង​ក្មេង ២៩៥ នាក់ ដែល​បាន​សម្រុក​ចាកចេញ ពី​ប្រទេស​ថៃ កាត់​តាម​ច្រកទ្វា​ព្រំដែន​ជាច្រើន ដូចជា ច្រកទ្វា​ព្រំដែន តំបន់​ស្រុក​កំរៀង ខេត្តបាត់ដំបង ច្រក​ប៉ោយប៉ែត បន្ទាយមានជ័យ និង​ច្រក​អូរ​ស្មាច់ ខេត្ត​ឧ​ត្ត​រ​មានជ័យ​។​

​មន្ត្រី​មន្ទីរ​សុខាភិបាល នៃ​រដ្ឋបាល​ខេត្តបាត់ដំបង បានបញ្ជាក់​ថាៈ បច្ចុប្បន្ន ក្រុមគ្រូពេទ្យ កំពុង​បន្ត​ជំរុញ​ពិនិត្យ យក​វត្ថុ​សំណាក លើ​ពលករ​ខ្មែរ​ទាំងអស់ ជា​រៀងរាល់ថ្ងៃ នៅតាម​មណ្ឌល​ច​ត្តា​ឡី​ស័ក​នីមួយៗ ដោយ​មួយចំនួនធំ ទទួលបាន​លទ្ធផល​អ​វិជ្ជមាន និង​មួយចំនួន​តូច​ទៀត កំពុង​រង់ចាំ​លទ្ធផល នៃ​ការវិភាគ​ធ្វើតេស្ត​។ ពួកគាត់​ទាំងអស់គ្នា មាន​លំនៅស្ថាន មកពី​បណ្តា​ស្រុក ជាប់​ព្រំដែន​ក្នុងស្រុក​កំរៀង ស្រុក​សំពៅ​លូន មោងឫស្សី ភ្នំព្រឹក សំឡូត ប​វេ​ល ថ្មគោល និង​ស្រុក​រុក្ខ​គី​រី ខេត្តបាត់ដំបង​។​

​បច្ចុប្បន្ន រដ្ឋបាលខេត្ត​បាត់ដំបង បានរៀបចំ​មណ្ឌល​ធ្វើ​ច​ត្តា​ឡី​ស័ក ដាក់​ពលករ​ខ្មែរ ឲ្យ​នៅ​ដាច់ដោយឡែក មាន​ជាច្រើន​កន្លែង ពិសេស​នៅ​តំបន់ ជាប់​ព្រំដែន​ដូចជា ក្នុង​បរិវេណ​វិទ្យាល័យ​កំរៀង មណ្ឌល​សុខភាព​ត្រាង ក្នុងស្រុក​កំរៀង នៅ​បរិវេណ​សាលាបឋមសិក្សា ជ្រៃ​សីមា ឃុំ​ជ្រៃ​សីមា ស្រុក​សំពៅ​លូន និង​មណ្ឌល​ច​ត្តា​ឡី​ស័ក នៅក្នុង​បរិវេណ​វិទ្យាល័យ ព្រះមុនីវង្ស ក្នុង​ក្រុង​បាត់ដំបង ៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular