Home ព័ត៌មានអន្តរជាតិ លោកបៃ​ដិ​ននិយ...

លោកបៃ​ដិ​ននិយាយថា​ការតែង​តាំង​មនុស្ស​ស្មោះត្រង់​រប​ស់​ត្រាំ​នៅ​មន្ទីរ​បញ្ច​កោណ​ធ្វើឱ្យ​ជាប់​គាំង​ដំណើរការ​ផ្ទេរ​តំណែង​និង​បង្ក​ហានិភ័យ​សន្តិសុខ​ជាតិ​

​ប្រែ​សម្រួល : កញ្ញា​ដា​លី​ស ៖ ប្រធានាធិបតី​ជាប់ឆ្នោត ចូ បៃ​ដិនបាន​និយាយ​កាលពី​ថ្ងៃ​ចន្ទ​ទី​២៨​ធ្នូ​ថា​ការតែងតាំង​មនុស្ស​ពី​សំណាក់​លោក​ដូណាល់ ត្រាំ នៅ​មន្ទីរ​បញ្ច​កោណ​កំពុង​ធ្វើ​ឱ្យ​ជាប់​គាំងដំណើរ​​ការផ្ទេរ​តំណែង​ហើយ​បាន​ព្រមាន​ថា សហរដ្ឋ​អាម៉េរិក​ប្រឈម​នឹង​ហានិភ័យ​ផ្នែក​សន្តិសុខ​ដោយសារតែ​រឿង​នេះ​។​

​បន្ទាប់ពី​លោក​និង​អនុ​ប្រធានាធិបតី​ជាប់ឆ្នោត កា​ម៉ា​ឡា ហារី​ស ត្រូវបាន​សង្ខេប​ជូន​ព័ត៌មាន​ដោយ​ក្រុម​ផ្ទេរ​តំណែង​របស់​ពួកគេ​ស្តី​ពី​សន្តិសុខ​ជាតិ លោកបៃ​ដិ​ននិយាយថា​ការតែង​តាំង​ខាង​នយោបាយ​​នៅ​មន្ទីរ​បញ្ច​កោណ​ក៏ដូចជា​ការិយាល័យ​គ្រប់គ្រង​និង​ថវិកា​បាន​ដាក់ “​ការបិទផ្លូវ​”​។​

​លោកបៃ​ដិននិយាយ​បន្ទាប់ពីកា​រ​សង្ខេប​ជូន​ព័ត៌មាន​នោះ​ថា “​ឥឡូវ​នេះ​យើង​មិនទាន់​ទទួលបាន​ព័ត៌មាន​ទាំងអស់​ដែល​យើង​ត្រូវការ​ពី​រដ្ឋបាល​ជិត​អស់​អាណត្តិ​នៅក្នុង​វិស័យ​សន្តិសុខ​ជាតិ​សំខាន់ៗ​នោះទេ​។ តាម​ទស្សនៈ​របស់​ខ្ញុំ វា​គ្មាន​ខុស​អី​ពី​ការ​ដែល​គ្មាន​ទំនួល​ខុស​ត្រូវ​នោះឡើយ​”​។​

​លោកបៃ​ដិ​ននិយាយថា​លោក​កំពុង​ស្វែងរក “​រូបភាព​ច្បាស់​មួយ​” ពី​រដ្ឋបាល​ជិត​ផុត​អាណត្តិ​ស្តីពី​ឥរិយាបថ​កម្លាំង​របស់​កងទ័ព​អាម៉េរិក​នៅ​ជុំវិញ​ពិភពលោក​។​

​លោកបៃ​ដិ​ននិយាយថា​”​យើង​ត្រូវការ​រូបភាព​មើលឃើញ​ពេញលេញ​ទៅក្នុង​ផែនការ​ថវិកា​ដែល​កំពុង​ដំណើរការ​នៅ​ក្រសួង​ការពារជាតិ​និង​ទីភ្នាក់ងារ​ដទៃទៀត​ដើម្បី​ចៀសវាង​ការភ័ន្តច្រឡំ​ឬ​ការដេញ​តាម​​ឱ្យទាន់​សត្រូវ​របស់​យើង ដែល​អាច​កំពុង​ព្យាយាម​កេងចំណេញ​”​។​

​លោក​ត្រាំ​បាន​បដិសេធ​មិន​ទទួលស្គាល់​ការបោះឆ្នោត​ថ្ងៃទី​០៣ ខែ​វិច្ឆិកា​ដែល​លោកបៃ​ដិនបាន​ឈ្នះ​ដោយ​សំឡេង​គាំទ្រ​ប្រមាណ ៧ លាន​និង​ឈ្នះ​អង្គ​បោះឆ្នោត ៣០៦-២៣២ ។​ប្រធានាធិបតី​ត្រាំ​បាន​​ធ្វើការ​អះអាង​ដោយ​គ្មាន​ភស្តុតាង​អំពី​ការ​ក្លែងបន្លំ​ឆ្នោត​។​

​រដ្ឋបាល​ត្រាំ​បាន​បង្ក​ការព្រួយបារម្ភ​ដោយ​ការរុះរើ​ថ្នាក់ដឹកនាំ​មន្ទីរ​បញ្ច​កោណ​ចាប់តាំងពី​ការបោះឆ្នោត រួម​មាន​ការបណ្តេញ​រដ្ឋមន្ត្រីការពារ​ជា​តិលោក ម៉ាក អេ​ស្ពើ​ដែល​បដិសេធ​មិន​ប្រើ​កម្លាំង​តាម​​សំណើ​របស់​ប្រធានាធិបតី​ប្រឆាំង​នឹង​ក្រុម​បាតុករ​ដែល​ប្រឆាំង​នឹង​ការរើសអើង​ជាតិ​សាសន៍​កាលពីដើមឆ្នាំ​នេះ​។​

​ការ​បន្តុប​មនុស្ស​ស្មោះត្រង់​របស់​លោក​ត្រាំ​នៅ​នាទីចុងក្រោយ​នៅ​មន្ទីរ​បញ្ច​កោណ​កើតឡើង​ចំ​ពេល​មាន​ភាព​តានតឹង​ខ្លាំង​ជាមួយ​អ៊ីរ៉ង់​ដែល​លោក​ត្រាំ​ស្តីបន្ទោស​ចំពោះ​ការវាយប្រហារ​ដោយ​គ្រាប់​​រ៉ុក្កែត​ទៅលើ​ស្ថានទូត​អាម៉េរិក​នៅ​អ៊ីរ៉ាក់ មុន​ថ្ងៃ​ខួប​នៃ​ការសម្លាប់​ឧត្តមសេនី​យ៍​អ៊ីរ៉ង់​ម្នាក់​ពី​សំណាក់​អាម៉េរិក​នៅ​ទីក្រុង​បា​កដាដ​៕

ប្រធានាធិបតី​ជាប់ឆ្នោត ចូ បៃ​ដិន

ទីតាំងផ្សាយពាណិជ្ជកម្ម

- Advertisment -



Most Popular