Home ព័ត៌មានអន្តរជាតិ ផ្ទុះ​គ្រាប់​...

ផ្ទុះ​គ្រាប់​កែច្នៃ​សម្លាប់​ទាហាន​បារាំង​បី​នាក់​នៅ​ម៉ាលី​

​ប្រែ​សម្រួល : កញ្ញា​ដា​លី​ស​/​ប៉ារីស ៖ ប្រធានាធិបតី​បារាំង​បាន​និយាយថា ទាហាន​បារាំង ៣ នាក់​ត្រូវបាន​សម្លាប់​កាលពី​ថ្ងៃ​ចន្ទ​ទី​២៨​ធ្នូ​នៅ​ប្រទេស​ម៉ាលី​នៅពេល​ដែល​គ្រឿងផ្ទុះ​កែច្នៃ​បាន​ប៉ះ​ចំ​រថពាសដែក​របស់​ពួកគេ​។​

​ប្រធានាធិបតី​បារាំង​បាន​និយាយ​នៅក្នុង​សេចក្តីថ្លែងការណ៍​មួយ​ថា ទាហាន​ទាំងនោះ​បាន​ចូលរួម​នៅក្នុង​ប្រតិបត្តិការ​យោធា​មួយ​នៅក្នុង​តំបន់​ហូ​ម​បូរី​នៃ​ខេត្ត​ម៉ូ​ប​ធី​ភាគ​កណ្តាល​ប្រទេស​ម៉ាលី ដែល​ជា​ផ្នែក​មួយ​នៃ​បេសកកម្ម​ធំ​សំដៅ​ប្រយុទ្ធប្រឆាំង​នឹង​ក្រុម​ជ្រុលនិយម​អ៊ីស្លាម​នៅក្នុង​តំបន់​សា​ហែល​របស់​អាហ្វ្រិក​។​

​រដ្ឋមន្ត្រី​ក្រសួង​ការពារជាតិ​លោក ផ្លរិន ផា​លី បាន​និយាយថា ទាហាន​កំពុងធ្វើការ “​នៅក្នុង​តំបន់​មួយ​ដែល​ក្រុម​ភេរ​វករ​កំពុង​វាយប្រហារ​ជន​ស៊ីវិល​និង​គំរាមកំហែង​ដល់​ស្ថិរភាព​ក្នុង​តំបន់​។​ពួកគេ​បាន​ចូល​​រួម​នៅ​ក្នុង​បេសកកម្ម​មួយ​ដែល​មាន​គោលបំណង​ជួយ​ម៉ាលី​ដើម្បី​អាច​ធានាបាន​នូវ​សន្តិសុខ​ផ្ទាល់ខ្លួន​របស់​ពួកគេ​បន្តិច​ម្តងៗ​”​។

​រដ្ឋមន្ត្រី​ក្រសួង​ការពារជាតិ​មិន​បាន​ផ្តល់​ព័ត៌មាន​លម្អិត​បន្ថែម​ទេ​។​

​បារាំង​បាន​ដាក់ពង្រាយ​ទាហាន​ជាង ៥.០០០ នាក់​នៅ​អាហ្វ្រិក​ខាងលិច​ដើម្បី​ជួយ​ប្រយុទ្ធប្រឆាំង​នឹង​ក្រុម​ជ្រុលនិយម ដែល​ជា​ផ្នែក​មួយ​នៃប្រតិបត្តិ​ការបា​កឃែន​។​

​ប្រធានាធិបតី​បារាំង​លោក អេម​ម៉ានុយ​អែល ម៉ា​ក្រុង បាន​ចូលរួម​គោរព​វិញ្ញាណក្ខន្ធ​ដល់​ទាហាន​ទាំង​បី​នាក់​ដែល​បាន​ស្លាប់​។​លោក​បាន​លើកឡើង​ពី​ការប្តេជ្ញា​ចិត្ត​របស់​បារាំង​ក្នុង​ការបន្ត​ការប្រយុទ្ធ​​ប្រឆាំង​នឹង​អំពើ​ភេរវកម្ម​នៅក្នុង​តំបន់​។​

​ក្រុម​ឧទ្ទាម​ជ្រុលនិយម​អ៊ីស្លាម​ត្រូវ​បាន​បណ្តេញចេញ​ពី​អំណាច​នៅ​ភាគ​ខាងជើង​ប្រទេស​ម៉ាលី​បន្ទាប់ពី​ប្រតិបត្តិការ​យោធា​ដឹកនាំ​ដោយ​បារាំង​កាលពី​ឆ្នាំ ២០១៣ ។​ក្រុម​ឧទ្ទាម​ទាំងនោះ​បាន​ប្រមូលផ្តុំ​គ្នា​​ឡើង​វិញ​នៅ​តំបន់​វាល​ខ្សាច់​ហើយ​ឥឡូវនេះ​ចាប់ផ្តើម​ការវាយប្រហារ​ជា​ញឹកញាប់​ទៅ​លើ​កងទ័ព​ម៉ាលី​និង​សម្ព័ន្ធមិត្ត​របស់ខ្លួន​៕

​ទាហាន​បារាំង​បី​នាក់​ស្លាប់​ក្នុង​ការផ្ទុះ​គ្រាប់​កែច្នៃ​នៅ​ម៉ាលី​កាលពី​ថ្ងៃ​ចន្ទ​

ទីតាំងផ្សាយពាណិជ្ជកម្ម

- Advertisment -

Most Popular